By കുട്ടികൾക്ക് വാഹനം നൽകിയാൽ കളി മാറും; കാസർകോട് രണ്ട് രക്ഷിതാക്കൾക്കെതിരെ പോലീസ് കേസ്; മദ്യപിച്ച് വാഹനം ഓടിച്ച 6 പേരും വലയിൽ
ബദിയടുക്ക: ജില്ലയിൽ പ്രായപൂർത്തിയാകാത്ത കുട്ടികൾക്ക് വാഹനം ഓടിക്കാൻ നൽകുന്ന രക്ഷിതാക്കൾക്കെതിരെ പോലീസ് നടപടി ശക്തമാക്കുന്നു. ബദിയടുക്ക പോലീസ് സ്റ്റേഷൻ പരിധിയിൽ കഴിഞ്ഞദിവസം നടത്തിയ കർശന പരിശോധനയിൽ പ്രായപൂർത്തിയാകാത്ത രണ്ട് കുട്ടികളെ സ്കൂട്ടർ ഓടിച്ച നിലയിൽ കണ്ടെത്തുകയും, ഇവർക്ക് വാഹനം നൽകിയ രക്ഷിതാക്കൾക്കെതിരെ പോലീസ് കേസെടുക്കുകയും ചെയ്തു. മനുഷ്യജീവന് അപകടമുണ്ടാക്കുന്ന രീതിയിലുള്ള അശ്രദ്ധമായ കൈകാര്യം ചെയ്യലിനും മോട്ടോർ വാഹന നിയമപ്രകാരവുമാണ് കേസ്.
ബദിയടുക്ക സബ് ഇൻസ്പെക്ടർ രൂപേഷ് ടി, ജി.എസ്.സി.പി.ഒ വിജിൽ, സി.പി.ഒ അജിത്ത് എന്നിവരടങ്ങിയ സംഘം ക്രമസമാധാന പാലനത്തിന്റെ ഭാഗമായി നടത്തിയ പട്രോളിങ്ങിനിടയിലാണ് രണ്ട് വ്യത്യസ്ത സംഭവങ്ങളിലായി കുട്ടികളെ പിടികൂടിയത്.
ബേള ഗ്രാമത്തിലെ നീർച്ചാൽ-മധൂർ റോഡിൽ കൊറത്തികുണ്ട് പാലത്തിന് സമീപം KL 55 AG 1560 നമ്പറിലുള്ള സ്കൂട്ടർ ഓടിച്ചെത്തിയ 16-കാരനെ പോലീസ് തടഞ്ഞുനിർത്തി. പരിശോധനയിൽ കുട്ടിക്ക് ലൈസൻസ് ഇല്ലെന്ന് കണ്ടെത്തുകയും, ആധാർ കാർഡ് പ്രകാരം പ്രായപൂർത്തിയായിട്ടില്ലെന്ന് ബോധ്യപ്പെടുകയും ചെയ്തു. കുട്ടിയുടെ പിതാവായ സാബിർ ആണ് വാഹനം ഓടിക്കാൻ നൽകിയതെന്ന് വ്യക്തമായതിനെ തുടർന്ന് ഇയാൾക്കെതിരെ ഭാരതീയ ന്യായ സംഹിത (BNS) സെക്ഷൻ 125, മോട്ടോർ വാഹന നിയമം 199 A(2) എന്നിവ പ്രകാരം കേസെടുത്തു (Cr. No 331/2026). വാഹനം പോലീസ് കസ്റ്റഡിയിലെടുത്തു. ഇതേ സ്ഥലത്ത് വെച്ച് തന്നെ നടത്തിയ മറ്റൊരു പരിശോധനയിൽ KL 60 P 1346 നമ്പറിലുള്ള സ്കൂട്ടറുമായി എത്തിയ മറ്റൊരു 17-കാരനെയും പോലീസ് സംഘം കണ്ടെത്തി. ഈ കുട്ടിക്ക് വാഹനം ഓടിക്കാൻ നൽകിയത് ഉമ്മയായ മുബീന ആണെന്ന് വ്യക്തമായതോടെ, ഇവർക്കെതിരെയും സമാനമായ വകുപ്പുകൾ പ്രകാരം പോലീസ് കേസെടുത്തു (Cr. No 332/2026). ഈ വാഹനവും പോലീസ് കസ്റ്റഡിയിലെടുത്തിട്ടുണ്ട്.
പിടികൂടിയ കുട്ടികളെ രണ്ടുപേരെയും പോലീസ് സ്റ്റേഷനിൽ എത്തിച്ച ശേഷം സുരക്ഷിതമായി രക്ഷിതാക്കളെ ഏൽപ്പിക്കുകയും, പ്രായപൂർത്തിയാകാത്തവർ വാഹനം ഓടിക്കുന്നതിൻ്റെ ഭവിഷ്യത്തുകളെയും നിയമപരമായ പ്രശ്നങ്ങളെയും കുറിച്ച് ബോധവൽക്കരണം നൽകുകയും ചെയ്തു.
മദ്യപിച്ച് വാഹനമോടിച്ചവർക്കെതിരെയും കർശന നടപടി
ഇതിന് പുറമേ, കാസർകോട് ജില്ലയുടെ വിവിധ ഭാഗങ്ങളിൽ പോലീസ് നടത്തിയ പരിശോധനയിൽ മദ്യപിച്ച് വാഹനമോടിച്ച ആറോളം പേർക്കെതിരെയും കേസുകൾ രജിസ്റ്റർ ചെയ്തിട്ടുണ്ട്. വരും ദിവസങ്ങളിലും പരിശോധനകൾ കൂടുതൽ കർശനമാക്കുമെന്നും പ്രായപൂർത്തിയാകാത്ത കുട്ടികൾക്ക് യാതൊരു കാരണവശാലും വാഹനങ്ങൾ കൈമാറരുതെന്നും പോലീസ് അറിയിച്ചു.
പ്രായപൂർത്തിയാകാത്ത കുട്ടി വാഹനമോടിച്ച് പിടിയിലായാൽ, ആ വാഹനത്തിന്റെ ഉടമയോ അല്ലെങ്കിൽ കുട്ടിയുടെ രക്ഷിതാവോ കുറ്റം ചെയ്തതായി കണക്കാക്കും.
- തടവുശിക്ഷ: 3 വർഷം വരെ തടവ് ശിക്ഷ ലഭിക്കാം.
- പിഴ: 25,000 രൂപ വരെ പിഴ ഈടാക്കാം.
- കോടതി നടപടികൾ: രക്ഷിതാവ്/ഉടമ കുറ്റക്കാരനല്ലെന്ന് തെളിയിക്കുകയോ (തന്റെ അറിവോടെയല്ല കുട്ടി വാഹനം എടുത്തത് എന്ന്) അല്ലെങ്കിൽ കുറ്റം തടയാൻ പരമാവധി ശ്രമിച്ചിരുന്നു എന്ന് ബോധ്യപ്പെടുത്തുകയോ ചെയ്യാത്ത പക്ഷം ഈ ശിക്ഷ നേരിടേണ്ടി വരും.
2. വാഹനത്തിനെതിരെയുള്ള നടപടികൾ
- ആർ.സി. റദ്ദാക്കൽ: കുട്ടി ഓടിച്ച വാഹനത്തിന്റെ രജിസ്ട്രേഷൻ സർട്ടിഫിക്കറ്റ് (RC) 12 മാസത്തേക്ക് (ഒരു വർഷം) റദ്ദാക്കുന്നതാണ്.
3. കുട്ടിക്കെതിരെയുള്ള നടപടികൾ
- ലൈസൻസ് വിലക്ക്: വാഹനം ഓടിച്ച കുട്ടിക്ക് 25 വയസ്സ് തികയുന്നത് വരെ ലേണേഴ്സ് ലൈസൻസോ (Learner’s License) ഡ്രൈവിംഗ് ലൈസൻസോ ലഭിക്കില്ല.
- ജുവനൈൽ ജസ്റ്റിസ് ആക്ട്: കുട്ടിക്ക് എതിരെ ജുവനൈൽ ജസ്റ്റിസ് ആക്ട് (Juvenile Justice Act) പ്രകാരം കേസ് എടുക്കുകയും പ്രോസിക്യൂഷൻ നടപടികൾ നേരിടേണ്ടി വരികയും ചെയ്യും.
⚠️ പ്രത്യേക ശ്രദ്ധയ്ക്ക് (അപകടങ്ങൾ ഉണ്ടായാൽ): പ്രായപൂർത്തിയാകാത്ത കുട്ടി ഓടിച്ച വാഹനം ഇടിച്ച് മറ്റൊരാൾക്ക് പരിക്കേൽക്കുകയോ മരണം സംഭവിക്കുകയോ ചെയ്താൽ ഭാരതീയ ന്യായ സംഹിത (BNS – ഭേദഗതി ചെയ്ത പുതിയ ക്രിമിനൽ നിയമം) പ്രകാരം നരഹത്യയ്ക്കോ ഗുരുതരമായ പരിക്കേൽപ്പിക്കലിനോ ഉള്ള ജാമ്യമില്ലാ വകുപ്പുകൾ കൂടി രക്ഷിതാവിനെതിരെ ചുമത്താം. കൂടാതെ അത്തരം സാഹചര്യങ്ങളിൽ ഇൻഷുറൻസ് കമ്പനികൾ നഷ്ടപരിഹാര തുക നൽകില്ല; ആ ബാധ്യതയും പൂർണ്ണമായും വാഹന ഉടമ വഹിക്കേണ്ടി വരും.
