ട്രംപിനൊപ്പം ചാടിയ മസ്കിന് വിപണിയിൽ കനത്ത അടി! ട്രില്യൺ സ്വപ്നത്തിന് തിരിച്ചടി; 80 ബില്യൺ ഡോളർ ആവിയായി, സക്കർബർഗിനും കോടികളുടെ നഷ്ടം

അമേരിക്കൻ രാഷ്ട്രീയത്തിൽ പണമെറിഞ്ഞ് അധികാരത്തിന്റെ ഇടനാഴികളിൽ സ്വാധീനം ഉറപ്പിക്കാമെന്ന് കരുതിയ ടെക് ലോകത്തെ അതികായന്മാർക്ക് ഇപ്പോൾ ഓഹരി വിപണിയുടെ വക കനത്ത പ്രഹരം. ഡൊണാൾഡ് ട്രംപിനുവേണ്ടി കോടികൾ ഒഴുക്കി, തിരഞ്ഞെടുപ്പ് പ്രചാരണത്തിൽ നിറഞ്ഞുനിന്ന ഇലോൺ മസ്കിനാണ് ഏറ്റവും വലിയ തിരിച്ചടി. ട്രംപിന്റെ രാഷ്ട്രീയ വിജയത്തിൽ സ്വന്തം വിജയവും ഭാവിയിലെ വൻ നേട്ടങ്ങളും സ്വപ്നം കണ്ട മസ്കിന് ഇപ്പോൾ വിപണിയിലെ നഷ്ടത്തിന്റെ കണക്കുകൾക്കു മുന്നിൽ തലകുനിക്കേണ്ട അവസ്ഥയാണ്.

റിപ്പോർട്ട് ചെയ്യപ്പെട്ട കണക്കുകൾ പ്രകാരം മസ്കിന്റെ ആസ്തിയിൽ ഏകദേശം 80 ബില്യൺ ഡോളറിന്റെ ഇടിവുണ്ടായതോടെ ലോകത്തെ ഏറ്റവും സമ്പന്നനായ മനുഷ്യൻ എന്ന നിലയിലുള്ള അദ്ദേഹത്തിന്റെ സാമ്പത്തിക സാമ്രാജ്യത്തിനും വലിയ ആഘാതമേറ്റു. ട്രില്യൺ ഡോളർ സമ്പത്തിന്റെ കൊടുമുടി സ്വപ്നം കണ്ടിരുന്ന മസ്കിന് ഇപ്പോൾ ആ ലക്ഷ്യത്തിലേക്കുള്ള യാത്രയിൽ വൻ തിരിച്ചടി. ട്രംപിന്റെ തിരഞ്ഞെടുപ്പ് പ്രചാരണത്തിനായി കോടിക്കണക്കിന് ഡോളർ ചെലവഴിച്ച മസ്കിന്റെ രാഷ്ട്രീയ നിക്ഷേപത്തിന് വിപണി നൽകുന്ന മറുപടി അത്ര സുഖകരമല്ല.

ട്രംപിനെ അധികാരത്തിലെത്തിക്കാൻ പണമൊഴുക്കിയപ്പോൾ മസ്ക് കരുതിയിരുന്നത് രാഷ്ട്രീയ സ്വാധീനവും ഭരണകൂടവുമായുള്ള അടുപ്പവും തന്റെ ബിസിനസ് സാമ്രാജ്യത്തിന് കൂടുതൽ കരുത്താകുമെന്നായിരിക്കാം. രാഷ്ട്രീയത്തിലെ ചങ്ങാത്തം ഓഹരി വിപണിയിൽ ലാഭവിഹിതമായി മാറിയില്ല എന്ന കാഴ്ചയാണ് അമേരിക്കയിൽ കാണുന്നത്

ടെസ്ലയുടെ ഓഹരികളിലുണ്ടായ കനത്ത ഇടിവും സ്പേസ് എക്സുമായി ബന്ധപ്പെട്ട വിപണി തിരിച്ചടികളും മസ്കിന്റെ സമ്പത്തിൽ വലിയ ചലനമുണ്ടാക്കി. ടെസ്ലയുടെ ഓഹരിയിൽ 11.5 ശതമാനത്തോളം ഇടിവുണ്ടായെന്ന കണക്കുകൾ പുറത്തുവന്നതോടെ നിക്ഷേപകർക്കിടയിലും ആശങ്ക ശക്തമായി. ലോകത്തെ മാറ്റിമറിക്കുമെന്ന് പ്രഖ്യാപിച്ച റോക്കറ്റുകളും ഇലക്ട്രിക് കാറുകളും നിർമിക്കുന്ന ശതകോടീശ്വരന് സ്വന്തം സമ്പത്തിന്റെ ഗ്രാഫ് താഴേക്ക് പോകുന്നത് തടയാൻ കഴിയാത്ത സാഹചര്യമാണ് മുന്നിലുള്ളത് .

മസ്കിന് മാത്രമല്ല, ട്രംപിനെ പിന്തുണച്ച ടെക് ലോകത്തെ മറ്റൊരു വമ്പനായ മാർക്ക് സക്കർബർഗിനും തിരിച്ചടിയുണ്ടായി. മെറ്റയുടെ ഓഹരികളിലെ ഇടിവിനെത്തുടർന്ന് അദ്ദേഹത്തിന്റെ ആസ്തിയിലും ഏകദേശം 9.4 ബില്യൺ ഡോളറിന്റെ കുറവുണ്ടായെന്നാണ് റിപ്പോർട്ടുകൾ.

ട്രംപിന്റെ രാഷ്ട്രീയ പദ്ധതികൾക്ക് പിന്തുണ നൽകാൻ ടെക് ഭീമന്മാർ വലിയ തോതിൽ പണം ചെലവഴിച്ചുവെന്നത് പരസ്യമായ കാര്യമാണ്. മസ്കിന്റെ തിരഞ്ഞെടുപ്പ് ഇടപെടലും സാമ്പത്തിക പിന്തുണയും അതിൽ ഏറ്റവും ശ്രദ്ധേയമായിരുന്നു. ട്രംപിന്റെ രാഷ്ട്രീയ വിജയത്തിനായി കോടികൾ ചെലവഴിച്ചവർക്ക് അധികാരത്തിന്റെ തണലിൽ കൂടുതൽ നേട്ടങ്ങൾ പ്രതീക്ഷിക്കാമായിരുന്നു. എന്നാൽ രാഷ്ട്രീയത്തിലെ കണക്കും ഓഹരി വിപണിയിലെ കണക്കും രണ്ടാണെന്ന് ഇപ്പോൾ അവർക്ക് ബോധ്യപ്പെടുന്നുണ്ടാകാം.

ഇതിനിടെ നിർമിതബുദ്ധി മേഖലയിലെ നിക്ഷേപങ്ങളും പുതിയ രാഷ്ട്രീയ ചർച്ചകൾക്ക് വഴിയൊരുക്കുകയാണ്. എഐ ഡാറ്റാ സെന്ററുകളുടെ വൻതോതിലുള്ള നിർമാണം വൈദ്യുതി ഉപഭോഗം, പരിസ്ഥിതി, പൊതുജനങ്ങളുടെ സുരക്ഷ, പ്രാദേശിക വിഭവങ്ങളുടെ ഉപയോഗം തുടങ്ങിയ വിഷയങ്ങളിൽ ആശങ്കകൾ ഉയർത്തുന്നുണ്ട്. ചില ഡെമോക്രാറ്റിക് നേതാക്കൾ ഡാറ്റാ സെന്റർ നിർമാണത്തിന് താൽക്കാലിക നിയന്ത്രണങ്ങളോ മൊറട്ടോറിയമോ വേണമെന്ന ആവശ്യം ഉയർത്തിയിട്ടുണ്ട്. അതായത് ട്രംപിന്റെ ഭരണകൂടവുമായി അടുപ്പം പുലർത്തിയതുകൊണ്ടുമാത്രം ടെക് കമ്പനികൾക്ക് അമേരിക്കയിലെ എല്ലാ രാഷ്ട്രീയ എതിർപ്പുകളെയും മറികടക്കാനാവില്ല.

മസ്കിന്റെ രാഷ്ട്രീയ നിലപാടുകളിലും ഇപ്പോൾ മാറ്റത്തിന്റെ സൂചനകളുണ്ടെന്ന തരത്തിലുള്ള വാർത്തകളും പുറത്തുവരുന്നുണ്ട്. ട്രംപിനെ പിന്തുണച്ചുകൊണ്ടുള്ള ചില എക്സ് പോസ്റ്റുകൾ അദ്ദേഹം നീക്കം ചെയ്തതായുള്ള റിപ്പോർട്ടുകളും ചർച്ചയാകുന്നു. ഒരുകാലത്ത് ട്രംപിന്റെ ഏറ്റവും വലിയ രാഷ്ട്രീയ പ്രചാരകരിലൊരാളായി രംഗത്തുണ്ടായിരുന്ന മസ്ക് ഇപ്പോൾ നിലപാടുകൾ പുനഃപരിശോധിക്കാൻ ഒരുങ്ങുകയാണ്,

ലോകത്തെ ഭരിക്കാനുള്ള സാങ്കേതികവിദ്യയും ചൊവ്വയിൽ മനുഷ്യനെ എത്തിക്കാനുള്ള റോക്കറ്റുകളും കൈവശമുണ്ടെന്ന് അവകാശപ്പെടുന്ന മസ്കിന് സ്വന്തം സമ്പത്തിന്റെ തകർച്ചയുടെ വേഗത തടയാനാകുന്നില്ല. രാഷ്ട്രീയത്തിൽ ട്രംപിനൊപ്പം ചാടിയവർക്ക് വിപണിയിൽ കാലിടറി. ലോകത്തെ മാറ്റാൻ ഇറങ്ങിയ ശതകോടീശ്വരന്മാർക്ക് സ്വന്തം സമ്പത്ത് സംരക്ഷിക്കാനുള്ള പരീക്ഷണമാണ് ഇപ്പോൾ മുന്നിലുള്ളത്.