By രണ്ട് യുവാക്കളുടെ ജീവൻ കവർന്ന് ദേശീയപാതയിലെ ലോറിക്കെണി,തെയ്യം കാണാൻ പോയവർക്ക് മടക്കയാത്രയില്ല; ദേശീയപാതയിൽ നിർത്തിയിട്ട ലോറിക്ക് പിന്നിൽ ബൈക്കിടിച്ച് രണ്ട് യുവാക്കൾക്ക് ദാരുണാന്ത്യം.
നീലേശ്വരം: തെയ്യം കാണാനുള്ള ആഗ്രഹവുമായി വീട്ടിൽ നിന്നിറങ്ങിയ രണ്ട് യുവാക്കൾക്ക് വിധി കാത്തുവെച്ചത് ദാരുണമായ അന്ത്യം. ദേശീയപാതയിൽ നിർത്തിയിട്ടിരുന്ന ലോറിക്ക് പിന്നിൽ ബൈക്കിടിച്ച് രണ്ട് യുവാക്കൾക്ക് ദാരുണമരണം. പടന്നക്കാട് നെഹ്റു കോളജിന് മുന്നിൽ തിങ്കളാഴ്ച രാത്രി ഒൻപത് മണിയോടെയുണ്ടായ അപകടത്തിൽ പടിഞ്ഞാറ്റംകൊഴുവൽ സ്വദേശികളായ അനുരാഗ് (22), ആനന്ദകൃഷ്ണൻ (24) എന്നിവരാണ് മരിച്ചത്.
നീലേശ്വരത്ത് നിന്ന് കാഞ്ഞങ്ങാട് തെരുവത്ത് അറയിൽ ഭഗവതി ക്ഷേത്രത്തിലെ തെയ്യം കാണാൻ പോകുന്നതിനിടെയാണ് അപകടം. നീലേശ്വരം വസന്ത ഹോട്ടലിൽ കാഷ്യറായി ജോലി ചെയ്തുവരികയായിരുന്നു അനുരാഗ്. സന്തോഷത്തോടെ തുടങ്ങിയൊരു യാത്ര നിമിഷങ്ങൾക്കുള്ളിൽ രണ്ട് കുടുംബങ്ങളുടെയും തീരാനഷ്ടമായി മാറുകയായിരുന്നു.
നിർത്തിയിട്ടിരുന്ന ലോറിക്ക് പിന്നിലേക്ക് ബൈക്ക് ശക്തമായി ഇടിച്ചുകയറുകയായിരുന്നു. ഇടിയുടെ ആഘാതത്തിൽ ബൈക്ക് പൂർണമായും തകർന്നു. ഗുരുതരമായി പരിക്കേറ്റ ഇരുവരെയും നാട്ടുകാരും മറ്റ് യാത്രക്കാരും ചേർന്ന് ഉടൻ കാഞ്ഞങ്ങാട് ജില്ലാ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. മൃതദേഹങ്ങൾ ആശുപത്രി മോർച്ചറിയിൽ സൂക്ഷിച്ചിരിക്കുകയാണ്.
ദേശീയപാതയിലെ ലോറി പാർക്കിങ്; ഇനിയും എത്ര ജീവനുകൾ?
ഈ ദുരന്തം ഉയർത്തുന്ന ചോദ്യം കേവലം ഒരു വാഹനാപകടത്തിന്റെ കാരണങ്ങളിൽ ഒതുങ്ങുന്നില്ല. ദേശീയപാതകളിലും അതിവേഗ പാതകളിലും സുരക്ഷിതമല്ലാത്ത രീതിയിൽ ലോറികൾ നിർത്തിയിടുന്നത് വർധിച്ചുവരുന്നതായുള്ള ആശങ്കകൾ നേരത്തെയും ഉയർന്നിട്ടുണ്ട്. ഹൈവേയുടെ വശങ്ങളിലും യാത്രക്കാർക്ക് വ്യക്തമായി കാണാൻ കഴിയാത്ത ഇടങ്ങളിലും മുന്നറിയിപ്പ് സംവിധാനങ്ങളില്ലാതെ നിർത്തിയിടുന്ന വലിയ വാഹനങ്ങൾ രാത്രിയാത്രക്കാർക്ക് വലിയ അപകടഭീഷണിയാണ് സൃഷ്ടിക്കുന്നത്.
ഇതുമായി ബന്ധപ്പെട്ട് കഴിഞ്ഞ ദിവസവും ബിഎൻസി മലയാളം വാർത്ത നൽകിയിരുന്നു. നീലേശ്വരം മേഖലയിലെ ദേശീയപാതയിൽ ലോറികൾ നിർത്തിയിടുന്നതുമായി ബന്ധപ്പെട്ടായിരുന്നു ആ വാർത്ത. എന്നാൽ ഇത്തരം മുന്നറിയിപ്പുകൾക്കിടയിലും വീണ്ടും ഒരു ദുരന്തം സംഭവിച്ചിരിക്കുകയാണ്.
ദേശീയപാതയിൽ സുരക്ഷിതമല്ലാത്ത രീതിയിൽ വാഹനങ്ങൾ നിർത്തിയിടുന്ന സാഹചര്യം ഗൗരവമായി പരിശോധിക്കേണ്ടതുണ്ട്. രാത്രികാല പരിശോധന ശക്തമാക്കുകയും അപകടസാധ്യതയുള്ള ഇടങ്ങളിൽ വാഹനങ്ങൾ നിർത്തുന്നത് തടയുകയും ആവശ്യമായ മുന്നറിയിപ്പ് സംവിധാനങ്ങൾ ഉറപ്പാക്കുകയും വേണം.
ഓരോ അപകടത്തിനുശേഷവും അനുശോചനം രേഖപ്പെടുത്തി അവസാനിപ്പിക്കേണ്ടതല്ല ഈ വിഷയം. റോഡിലെ ഇത്തരം അപകടക്കെണികൾ ഒഴിവാക്കാൻ സമയബന്ധിതമായ നടപടികളാണ് വേണ്ടത്. അല്ലാത്തപക്ഷം അടുത്ത ദുരന്തവാർത്തയിൽ പേരുകൾ മാറും; കണ്ണീരിന്റെ കഥ മാത്രം ആവർത്തിക്കും.
