ഭഗവാൻ ജഗന്നാഥന് ‘പനി’; സ്റ്റെതസ്കോപ്പുമായി ഡോക്ടർമാരെത്തി, സോഷ്യൽ മീഡിയയിൽ വൈറലായി ജൗൻപൂരിലെ അപൂർവ ആചാരം

ജൗൻപൂർ: വാർഷിക രഥയാത്രയ്ക്ക് മുന്നോടിയായി ജഗന്നാഥ ഭഗവാന്റെ ആചാരപരമായ ആരോഗ്യ പരിശോധന നടത്തുന്ന ഡോക്ടർമാരുടെ ദൃശ്യങ്ങൾ സോഷ്യൽ മീഡിയയിൽ വൈറലാകുന്നു. ഉത്തർപ്രദേശിലെ ജൗൻപൂരിലുള്ള പ്രശസ്തമായ റാസ്മണ്ഡൽ ക്ഷേത്രത്തിൽ ചൊവ്വാഴ്ചയാണ് ഈ സവിശേഷ ചടങ്ങ് നടന്നത്. സ്റ്റെതസ്കോപ്പുകൾ ഉപയോഗിച്ച് പ്രതീകാത്മകമായി ദേവനെ പരിശോധിക്കുന്ന ഒരു കൂട്ടം ഡോക്ടർമാരെ വീഡിയോയിൽ കാണാം. ഭഗവാൻ ജഗന്നാഥന്റെ വാർഷിക ആഘോഷങ്ങളുമായി ബന്ധപ്പെട്ട നൂറ്റാണ്ടുകൾ പഴക്കമുള്ള പാരമ്പര്യത്തിന്റെ ഭാഗമാണ് ഈ ആചാരം.

എന്തുകൊണ്ടാണ് ഭഗവാൻ ജഗന്നാഥന് രോഗം പിടിപെടുമെന്ന് വിശ്വസിക്കുന്നത്?

ജ്യേഷ്ഠ മാസത്തിലെ പൂർണ്ണിമ ദിനത്തിൽ നടക്കുന്ന ‘സ്നാനപൂർണ്ണിമ’ ചടങ്ങിന് ശേഷമാണ് ഭഗവാൻ ജഗന്നാഥന് പനി പിടിപെടുന്നതെന്നാണ് വിശ്വാസം. വിപുലമായ ഈ ആചാരപരമായ കുളിക്ക് ശേഷമാണ് ദേവന് അസുഖം ബാധിക്കുന്നത് എന്ന് ഭക്തർ വിശ്വസിക്കുന്നതായി മാധ്യമങ്ങൾ റിപ്പോർട്ട് ചെയ്യുന്നു.

സ്നാനപൂർണ്ണിമയുടെ പിറ്റേന്ന് മുതൽ ആഷാഢ മാസത്തിലെ കൃഷ്ണപക്ഷ അമാവാസി വരെയുള്ള കാലയളവിൽ ഭഗവാൻ ജഗന്നാഥൻ പൊതുജനങ്ങളിൽ നിന്ന് പൂർണ്ണമായും അകന്നു നിൽക്കും. ഭഗവാൻ വിശ്രമത്തിലാണെന്നും രോഗത്തിൽ നിന്ന് സുഖം പ്രാപിക്കുകയാണെന്നുമാണ് വിശ്വാസം. അതിനാൽ ഈ ദിവസങ്ങളിൽ ഭക്തർക്ക് ക്ഷേത്രത്തിൽ ദർശനം അനുവദിക്കാറില്ല.