By ഒഡേസ തീരത്ത് റഷ്യൻ മിസൈൽ ആക്രമണം; കാസർകോട് സ്വദേശി അഖിൽ ജോയൻ ഉൾപ്പെടെ 10 നാവികർ കൊല്ലപ്പെട്ടു
ദില്ലി/കീവ്: യുക്രെയ്നിലെ ഒഡേസ തുറമുഖത്തിന് സമീപം ഭക്ഷ്യധാന്യങ്ങളുമായി സഞ്ചരിച്ചിരുന്ന ചരക്ക് കപ്പലിന് നേരെയുണ്ടായ റഷ്യൻ മിസൈൽ ആക്രമണത്തിൽ കാസർകോട് വെള്ളരിക്കുണ്ട് എ.കെ.ജി നഗർ സ്വദേശി അഖിൽ ജോയൻ (26) ഉൾപ്പെടെ 10 പേർ കൊല്ലപ്പെട്ടു. കരിങ്കടലിൽ സമീപകാലത്ത് നടന്ന ഏറ്റവും മാരകമായ കപ്പൽ ആക്രമണങ്ങളിലൊന്നായാണ് ഇതിനെ വിലയിരുത്തുന്നത്.
ഗിനിയ-ബിസാവു പതാകയിലായിരുന്ന “Golden Leo” എന്ന ചരക്ക് കപ്പൽ ഒഡേസ തുറമുഖത്ത് നിന്ന് ചോളം കയറ്റി യാത്രതിരിച്ചതിന് പിന്നാലെയാണ് ആക്രമണം നടന്നത്. യുക്രെയ്ൻ നാവികസേനയുടെ വിവരമനുസരിച്ച് കപ്പലിന് നേരെ മൂന്ന് ക്രൂയിസ് മിസൈലുകൾ പതിക്കുകയും തുടർന്ന് കപ്പലിൽ വൻ തീപിടിത്തമുണ്ടാകുകയും ചെയ്തു.
കപ്പലിൽ ആകെ 17 ജീവനക്കാരാണ് ഉണ്ടായിരുന്നത്. ഇന്ത്യൻ, സിറിയൻ പൗരന്മാരായിരുന്നു കപ്പലിലെ ഭൂരിഭാഗം ജീവനക്കാരും. ഇവർക്കൊപ്പം യുക്രെയ്ൻ തുറമുഖ അതോറിറ്റിയുടെ ഒരു മാരിടൈം പൈലറ്റും കപ്പലിലുണ്ടായിരുന്നു. ആക്രമണത്തിൽ ഒമ്പത് കപ്പൽ ജീവനക്കാരും യുക്രെയ്ൻ പൈലറ്റും ഉൾപ്പെടെ 10 പേർ കൊല്ലപ്പെട്ടതായി യുക്രെയ്ൻ തുറമുഖ അതോറിറ്റി അറിയിച്ചു. രാത്രി മുഴുവൻ നീണ്ട രക്ഷാപ്രവർത്തനത്തിനൊടുവിൽ 8 പേരെ ജീവനോടെ രക്ഷപ്പെടുത്തി.
മുംബൈ ആസ്ഥാനമായ Ocean Grace Shipping Ltd-യുടെ ഉടമസ്ഥതയിലുള്ള കപ്പലാണ് Golden Leo. കപ്പൽ മാനേജ്മെന്റ് കമ്പനി സംഭവത്തെക്കുറിച്ച് ഇതുവരെ ഔദ്യോഗിക പ്രതികരണം നടത്തിയിട്ടില്ല. ആക്രമണത്തെക്കുറിച്ച് റഷ്യയും ഉടൻ പ്രതികരിച്ചിട്ടില്ല.
