By കൊച്ചിയിലെ ആഡംബര കാറപകടം: അന്വേഷണം ക്രൈംബ്രാഞ്ചിന്; ജഡ്ജിയായ പിതാവിനെതിരെ കേസെടുത്തു, സസ്പെൻഷൻ നടപടികൾക്ക് നീക്കം
കൊച്ചി: ചേരാനല്ലൂരിൽ പ്രായപൂർത്തിയാകാത്തയാൾ ഓടിച്ച ആഡംബര കാറിടിച്ച് സ്‌കൂട്ടർ യാത്രക്കാരൻ ദാരുണമായി കൊല്ലപ്പെട്ട കേസിന്റെ അന്വേഷണം ജില്ല ക്രൈംബ്രാഞ്ചിന് കൈമാറി. സംഭവത്തിൽ വാഹന ഉടമയും അഡീഷണൽ ജില്ലാ ജഡ്‌ജിയുമായ റെനോ ഫ്രാൻസിസ് സേവ്യറിനെതിരെ പൊലീസ് കേസെടുത്തിട്ടുണ്ട്. കൊച്ചി സിറ്റി പൊലീസ് കമീഷണർ കാളിരാജ് മഹേഷ് കുമാറാണ് അന്വേഷണം മാറ്റുന്നതായി അറിയിച്ചത്.
ഇന്നലെ പുലർച്ചെ കൊച്ചി ചേരാനല്ലൂർ കണ്ടെയ്‌നർ റോഡിലായിരുന്നു നാടിനെ നടുക്കിയ ഈ ദാരുണാപകടം ഉണ്ടായത്. തട്ടുകട നടത്തി ഉപജീവനം നടത്തിവന്നിരുന്ന ചിറ്റൂർ സ്വദേശി ജയബാലകൃഷ്ണൻ കടയടച്ച് വീട്ടിലേക്ക് മടങ്ങുന്നതിനിടയിലാണ് അമിതവേഗതയിലെത്തിയ ബെൻസ് കാർ അദ്ദേഹത്തിന്റെ സ്‌കൂട്ടറിന് പിന്നിലിടിച്ചത്. ലൈസൻസില്ലാതെ പ്രായപൂർത്തിയാകാത്ത കുട്ടി ഓടിച്ച ഈ ആഡംബര കാറിന്റെ വേഗത മണിക്കൂറിൽ 100 കിലോമീറ്ററിന് മുകളിലായിരുന്നുവെന്ന് പൊലീസ് വ്യക്തമാക്കി.
അപകടം വരുത്തിയ 17 കാരന്റെ ജാമ്യം റദ്ദാക്കാൻ ആവശ്യമായ കർശന നിയമനടപടികൾ സ്വീകരിക്കുമെന്ന് കമീഷണർ അറിയിച്ചു. പൊലീസിന്റെ ഭാഗത്തുനിന്ന് എന്തെങ്കിലും വീഴ്ച സംഭവിച്ചിട്ടുണ്ടോ എന്ന് പരിശോധിക്കാൻ ആഭ്യന്തര അന്വേഷണവും പ്രഖ്യാപിച്ചിട്ടുണ്ട്. പ്രായപൂർത്തിയാകാത്തയാൾക്ക് വാഹനം നൽകിയതിനും അപകടത്തിന് കാരണക്കാരനായതിനും ഉത്തരവാദിത്തത്തിൽനിന്ന് മാതാപിതാക്കൾക്ക് ഒഴിഞ്ഞുമാറാൻ കഴിയില്ലെന്ന് വ്യക്തമാക്കിയ കമീഷണർ, വാഹന ഉടമയായ ജഡ്‌ജിക്കെതിരെ മോട്ടോർ വാഹന നിയമപ്രകാരമാണ് കേസെടുത്തതെന്നും കൂട്ടിച്ചേർത്തു. ജഡ്‌ജിയുടെ പേരിലാണ് അപകടമുണ്ടാക്കിയ ബെൻസ് കാർ രജിസ്റ്റർ ചെയ്തിരുന്നത്.
അതിനിടയിൽ, നിയമം സംരക്ഷിക്കാൻ ബാധ്യസ്ഥനായ ഒരു ഉന്നത ജഡ്‌ജിയിൽ നിന്നുണ്ടായ ഈ ഉത്തരവാദിത്തമില്ലാത്ത പെരുമാറ്റവും തുടർന്നുള്ള നീക്കങ്ങളും നീതിന്യായ വ്യവസ്ഥയ്ക്ക് തന്നെ വലിയ അവമതിയാണ് ഉണ്ടാക്കിയിരിക്കുന്നതെന്ന വ്യാപകമായ വിലയിരുത്തൽ വിവിധ കോണുകളിൽ നിന്നും ഉയരുന്നുണ്ട്. ഇതിന്റെ പശ്ചാത്തലത്തിൽ ജഡ്‌ജിയെ സർവീസിൽനിന്ന് സസ്പെൻഡ് ചെയ്യുന്നത് ഉൾപ്പെടെയുള്ള കടുത്ത നടപടികൾക്കായുള്ള ഔദ്യോഗിക നീക്കങ്ങളും ഇതിനോടകം ആരംഭിച്ചുകഴിഞ്ഞു.
