By ചന്ദ്രനിലോ ചൊവ്വയിലോ കാസർഗോഡ് നഗരം? എം.ജി റോഡിൽ പൊടിപടലം മൂടി വ്യാപാരികൾ വലഞ്ഞു; ഒടുവിൽ റോഡ് ഉപരോധം
കാസറഗോഡ് : വെളുപ്പാൻകാലത്ത് പതിവുപോലെ കടകൾ തുറക്കാനെത്തിയ വ്യാപാരികളും യാത്രക്കാരും കാസർഗോഡ് എം.ജി റോഡിലെത്തിയപ്പോൾ ഒരുനിമിഷം കണ്ണുതിരുമ്മി നിന്നുപോയി. പരിചിതമായ നഗരവീഥിയല്ല കൺമുന്നിൽ തെളിഞ്ഞത്; അന്യഗ്രഹമായ ചൊവ്വയിലോ ഉപഗ്രഹമായ ചന്ദ്രനിലോ എത്തിയതുപോലെ ചാരനിറത്തിലുള്ള കനത്ത പൊടിപടലങ്ങളാൽ മൂടപ്പെട്ടു കിടക്കുകയായിരുന്നു നാടും നഗരവും. കടകളുടെ ബോർഡുകളും ഷട്ടറുകളും തിരിച്ചറിയാൻ കഴിയാത്തവിധം സിമന്റുപൊടി വന്നുമൂടിയ കാഴ്ച കണ്ട് അമ്പരപ്പും തുടർന്ന് അമർഷവുമായിരുന്നു നഗരവാസികൾക്ക്.
കുടിവെള്ള പൈപ്പ് ലൈൻ സ്ഥാപിക്കാനായി എടുത്ത കുഴികൾ നേരത്തെ സിമന്റിട്ടു നികത്തിയിരുന്നു. എന്നാൽ റോഡ് ടാറിങ് നടത്തി പൂർവ്വസ്ഥിതിയിലാക്കാനുള്ള പ്രവൃത്തികളുടെ ഭാഗമായി, കാസർഗോഡ് പഴയ ബസ് സ്റ്റാൻഡ് മുതൽ ജാൽസൂർ ജംഗ്ഷൻ വരെയുള്ള റോഡിന്റെ ഇടതുവശം അശാസ്ത്രീയമായി കിളച്ചുമാറ്റി. സിമന്റ് മിശ്രിതം അടങ്ങിയ അടിത്തറ അപ്പാടെ ഇളക്കിമാറ്റിയതോടെയാണ് നഗരത്തെ ശ്വാസംമുട്ടിക്കുന്ന തരത്തിൽ അതിരൂക്ഷമായ പൊടിപടലം അന്തരീക്ഷത്തിൽ ഉയർന്നത്. തിരക്കേറിയ ഒരു വാണിജ്യ കേന്ദ്രങ്ങൾ പ്രവർത്തിക്കുന്ന യാതൊരുവിധ ആസൂത്രണവുമില്ലാതെ നടത്തിയ ഈ അറ്റകുറ്റപ്പണി തീർത്തും ജനദ്രോഹപരമായി മാറി.
പ്രശ്നത്തിന്റെ ഗൗരവം ബോധ്യപ്പെടുത്താൻ കരാറുകാരനെ പലതവണ ഫോണിൽ ബന്ധപ്പെടാൻ ശ്രമിച്ചെങ്കിലും ഇയാൾ ഫോൺ എടുക്കാൻ കൂട്ടാക്കിയില്ല. ഉത്തരവാദപ്പെട്ടവർ തികഞ്ഞ നിസ്സംഗത പാലിച്ചതോടെ വ്യാപാരികളുടെ ക്ഷമ നശിച്ചു. തുടർന്ന് കേരള വ്യാപാരി വ്യവസായി ഏകോപന സമിതിയുടെ നേതൃത്വത്തിൽ വ്യാപാരികൾ എം.ജി റോഡ് ഉപരോധിച്ചു. റോഡിൽ ഗതാഗതം പൂർണമായി തടസ്സപ്പെട്ടതോടെ പോലീസ് സംഘം സ്ഥലത്തെത്തി ഇടപെട്ടു. വ്യാപാരികളുമായി നടത്തിയ ചർച്ചയ്ക്കൊടുവിൽ കരാറുകാരനെ നേരിട്ട് വിളിച്ചുവരുത്തുകയും, റോഡിലെ പൊടി ശമിക്കുന്നതിനായി കൃത്യമായ ഇടവേളകളിൽ വെള്ളം തളിക്കാമെന്ന ഉറപ്പ് നൽകുകയും ചെയ്തതോടെയാണ് ഉപരോധം താൽക്കാലികമായി അവസാനിപ്പിച്ചത്.
അധികൃതരുടെ ഉറപ്പുകൾ നടപ്പിലാക്കാൻ മണിക്കൂറുകൾ വൈകുമെന്ന് കണ്ട വ്യാപാരികൾ ഒടുവിൽ സ്വന്തം നിലയിൽ വെള്ളം സംഘടിപ്പിച്ച് റോഡിൽ തളിക്കുകയായിരുന്നു. എന്നാൽ നനവ് മാറുമ്പോൾ വീണ്ടും നഗരം പൊടിയിലാകുമെന്ന ആശങ്ക വ്യാപാരികൾക്കും നാട്ടുകാർക്കുമുണ്ട്. വാഗ്ദാനം ചെയ്തതുപോലെ കരാറുകാരൻ ആവശ്യത്തിന് വെള്ളം തളിക്കാൻ തയ്യാറായില്ലെങ്കിൽ കടകളെല്ലാം പൂർണമായി അടച്ചിട്ട് പി.ഡബ്ല്യു.ഡി ഓഫീസ് ഉപരോധം അടക്കമുള്ള ശക്തമായ സമരത്തിലേക്ക് കടക്കുമെന്നാണ് വ്യാപാരി വ്യവസായി ഏകോപന സമിതിയുടെ മുന്നറിയിപ്പ്.
