By കണ്ണീരിൽ കുളിച്ച് തയ്യിൽ; വീട്ടുമുറ്റത്ത് കാർ പിന്നോട്ടെടുക്കുന്നതിനിടെ പിതാവിന്റെ കൺമുന്നിൽ ഒന്നരവയസ്സുകാരിക്ക് ദാരുണാന്ത്യം; പിതാവിനെതിരെ പൊലീസ് കേസെടുത്തു
കണ്ണൂർ: ഒരു നോവായി മാറിയിരിക്കുകയാണ് ആ കുഞ്ഞുചിരി. കണ്ണൂർ തയ്യിലിൽ വീട്ടുമുറ്റത്ത് പിതാവ് പിന്നോട്ടെടുത്ത കാറിനടിയിൽപ്പെട്ടു ഒന്നരവയസ്സുകാരിക്ക് ദാരുണാന്ത്യം. ഷഫഖത് – അറക്കകത്ത് ശഹമ ദമ്പതികളുടെ മകൾ ഹൂറിൻ മഹബൂബിയാണ് മാതാപിതാക്കളുടെ കണ്ണീരിൽ നോവായി വിടപറഞ്ഞത്. രാവിലെ 11 മണിയോടെയായിരുന്നു നാടിനെ നടുക്കിയ ഈ ദുരന്തം നടന്നത്.
വീട്ടിനുള്ളിൽ കളിച്ചുകൊണ്ടിരുന്ന കുഞ്ഞ് പെട്ടെന്ന് അപ്രതീക്ഷിതമായി പുറത്തേക്ക് ഓടിവരികയായിരുന്നു. എന്നാൽ ഈ സമയം വീടിന്റെ മുറ്റത്ത് കാർ പിന്നോട്ടെടുക്കുകയായിരുന്ന പിതാവ് കുട്ടി വരുന്നത് ശ്രദ്ധിച്ചിരുന്നില്ല. പ്രതീക്ഷയുടെയും സന്തോഷത്തിന്റെയും മുഹൂർത്തങ്ങളെല്ലാം നിമിഷനേരംകൊണ്ട് ഒരു കുടുംബത്തിന് മേൽ കരിനിഴൽ വീഴ്ത്തിയ ദുരന്തമായി മാറി.
ഗുരുതരമായി പരിക്കേറ്റ കുഞ്ഞിനെ ഉടൻ തന്നെ ബന്ധുക്കളും നാട്ടുകാരും ചേർന്ന് ആശുപത്രിയിൽ എത്തിച്ചെങ്കിലും, ജീവൻ രക്ഷിക്കാനുള്ള ഡോക്ടർമാരുടെ തീവ്രശ്രമങ്ങളെല്ലാം വിഫലമാക്കി ഉച്ചയ്ക്ക് ഒരു മണിയോടെ ചികിത്സയിലിരിക്കെ ആ കുഞ്ഞുമുത്ത് വിടപറഞ്ഞു. സംഭവത്തിൽ പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്.
