By ഗോവധക്കേസിൽ പ്രതികൾക്ക് ജീവപര്യന്തം നൽകി ഗാന്ധിനഗർ കോടതി,വേദങ്ങളും മനുസ്മൃതിയും വിധിന്യായത്തിൽ ;തക്കതായ ശിക്ഷ നൽകിയില്ലെങ്കിൽ, മാതാവായ പശുക്കൾക്ക് കാലക്രമേണ വംശനാശം സംഭവിച്ചുപോകുമെന്നും കോടതി അതീവ ഗൗരവത്തോടെ നിരീക്ഷിച്ചു
അഹമ്മദാബാദ്: പശുക്കളെ വെറും മൃഗങ്ങളായല്ല, മറിച്ച് പ്രപഞ്ചത്തിന്റെ മാതാക്കളായാണ് നമ്മുടെ പ്രാചീന ഗ്രന്ഥങ്ങൾ കാണുന്നത്, ഗോവധ കേസിൽ മൂന്ന് പ്രതികൾക്ക് ജീവപര്യന്തം തടവ് ശിക്ഷ വിധിച്ചുകൊണ്ട് ഗാന്ധിനഗർ സെഷൻസ് കോടതി പുറപ്പെടുവിച്ച വിധിന്യായമാണ് ഇപ്പോൾ ഏറെ ശ്രദ്ധ നേടുന്നത്. വേദങ്ങളും മനുസ്മൃതിയും ഉദ്ധരിച്ചുകൊണ്ട് കോടതി പുറപ്പെടുവിച്ച ഈ വിധി കേരളത്തിലും പുറത്തും വലിയ ചർച്ചയായി മാറിയിരിക്കുകയാണ്.
അഹമ്മദാബാദ് സ്വദേശികളായ വസീം ഖുറേഷി, മുഹമ്മദ് റഫീഖ് ഖുറേഷി, അസ്ഫാക് ബഹെലിം എന്നീ മൂന്ന് പേരെയാണ് അഡീഷണൽ സെഷൻസ് ജഡ്‌ജി ബി. ആർ. രാജ്പുത് കുറ്റക്കാരായി കണ്ടെത്തിയത്. വിലകുറഞ്ഞതും പാലുൽപാദനം ഇല്ലാത്തതുമായ പശുക്കളെയും എരുമകളെയും വാങ്ങി കശാപ്പ് ചെയ്ത് മാംസം വിൽപന നടത്തുന്നതായിരുന്നു ഇവരുടെ രീതി. ഗുജറാത്ത് മൃഗസംരക്ഷണ (ഭേദഗതി) നിയമം, മൃഗങ്ങളോട് ക്രൂരത കാണിക്കുന്നത് തടയൽ നിയമം തുടങ്ങിയ കടുത്ത വകുപ്പുകളാണ് ഇവർക്കെതിരെ ചുമത്തിയത്.
വിധിന്യായത്തിന്റെ ആദ്യ നാല് പേജുകളും പശുക്കളുടെ സാംസ്കാരിക പ്രാധാന്യത്തെക്കുറിച്ചും മാതൃത്വത്തെക്കുറിച്ചുമാണ് സംസാരിക്കുന്നത്. പശുക്കളിൽ 33 കോടി ദേവതകൾ വസിക്കുന്നുവെന്നാണ് ഹൈന്ദവ വിശ്വാസമെന്നും, പ്രാചീന ഗ്രന്ഥങ്ങൾ അവയെ എത്രമാത്രം പവിത്രമായാണ് കാണുന്നതെന്നും വിധിയിൽ ചൂണ്ടിക്കാണിക്കുന്നു.
പശുക്കളുടെ സാംസ്കാരിക പ്രാധാന്യം പൂർണ്ണമായി അറിഞ്ഞുകൊണ്ട് തന്നെ പ്രതികൾ മനപ്പൂർവ്വം കശാപ്പ് നടത്തുകയായിരുന്നു. ഇത്തരം പ്രവൃത്തികൾക്ക് തക്കതായ ശിക്ഷ നൽകിയില്ലെങ്കിൽ, മാതാവായ പശുക്കൾക്ക് കാലക്രമേണ വംശനാശം സംഭവിച്ചുപോകുമെന്നും കോടതി അതീവ ഗൗരവത്തോടെ നിരീക്ഷിച്ചു. നിയമത്തിന്റെ കടുത്ത കൈകളിൽ നിന്ന് രക്ഷപ്പെടാൻ പ്രതികൾക്കായില്ലെങ്കിലും, വിധിന്യായത്തിൽ ഉൾപ്പെടുത്തിയ വേദവചനങ്ങൾ ഇപ്പോൾ സോഷ്യൽ മീഡിയയിലും നിയമവൃത്തങ്ങളിലും ഒരുപോലെ കൗതുകമുണർത്തുന്നുണ്ട്.
