By ജാവിദ് ഭായിയുടെ ‘വലതു കൈ’; ബാംഗ്ലൂരിൽ നിന്നും എം.ഡി.എം.എ കടത്തി കാസർകോട് വിൽപന നടത്തിവന്ന ഇർഷാദ് 1.68 ഗ്രാം എം.ഡി.എം.എയുമായി മേൽപ്പറമ്പ് പോലീസിന്റെ പിടിയിൽ
കാസർകോട്: മേൽപ്പറമ്പ് പോലീസ് സ്റ്റേഷൻ പരിധിയിലെ കോളിയടുക്കത്ത് കാറിൽ കടത്തുകയായിരുന്ന മാരക മയക്കുമരുന്നായ 1.68 ഗ്രാം എം.ഡി.എം.എയുമായി പ്രതി പിടിയിൽ. പെരുമ്പള കോളിയടുക്കം ഹൗസിൽ ഇർഷാദ് എം.എ. (35) ആണ് അറസ്റ്റിലായത്. ഷാഫി അബ്ദുൽ റഹ്മാൻ മുഹമ്മദാണ് ഇയാളുടെ പിതാവ്. ബാംഗ്ലൂരിൽ നിന്നും ‘ജാവിദ് ഭായ്’ എന്നയാളുടെ പക്കൽ നിന്നുമാണ് മയക്കുമരുന്ന് വാങ്ങിയതെന്ന് പ്രതി പോലീസിനോട് സമ്മതിച്ചിട്ടുണ്ട്.
15/09/2026 തീയതി രാത്രി മേൽപ്പറമ്പ് പോലീസ് സ്റ്റേഷൻ പരിധിയിലെ ഗണേശോത്സവത്തോടനുബന്ധിച്ചുള്ള ബന്തവസ്സ് ഡ്യൂട്ടിയിലുണ്ടായിരുന്ന സബ് ഇൻസ്പെക്ടർ അഖിൽ ടിക്ക് ലഭിച്ച രഹസ്യവിവരത്തിന്റെ അടിസ്ഥാനത്തിലാണ് പരിശോധന നടന്നത്. ജില്ലാ ഡാൻസ് സ്കോഡ് അംഗമായ രജീഷ് കാട്ടാമ്പള്ളിയിൽ നിന്നും ലഭിച്ച വിവരപ്രകാരം, എൻ.ഡി.പി.എസ്. (NDPS) ഇനത്തിൽപ്പെട്ട വസ്തുക്കൾ വിൽപ്പന നടത്തുന്നതിനായി കാറിൽ എത്തിയ ഇർഷാദിനെ കോളിയടുക്കം കൂളിക്കുന്ന് റോഡിൽ വെച്ച് ഡാൻസാഫ് സംഘം തടഞ്ഞു വെച്ചിട്ടുണ്ടായിരുന്നു. തുടർന്ന് മേൽപ്പറമ്പ് പോലീസ് സംഘം സ്ഥലത്തെത്തി നടത്തിയ പരിശോധനയിലാണ് പ്രതി പിടിയിലായത്. കാറിന്റെ ഡ്രൈവിംഗ് സീറ്റിൽ ഇരിക്കുകയായിരുന്ന പ്രതിയെ ചോദ്യം ചെയ്യുകയും, തുടർന്ന് വിദഗ്ദ്ധ പരിശോധനയ്ക്കായി വിദ്യാനഗർ പോലീസ് ഇൻസ്പെക്ടർ പ്രമോദ് സ്ഥലത്തെത്തുകയും ചെയ്തു.
സ്വതന്ത്ര സാക്ഷികളുടെയും വിദ്യാനഗർ ഇൻസ്പെക്ടറുടെയും സാന്നിധ്യത്തിൽ നടത്തിയ പരിശോധനയിൽ പ്രതിയുടെ പാൻ്റിന്റെ പോക്കറ്റിൽ നിന്നും ആപ്പിൾ സ്മാർട്ട്ഫോണും 20 രൂപയും കണ്ടെടുത്തു. തുടർന്ന് കാറിൽ നടത്തിയ പരിശോധനയിൽ ഡ്രൈവർ സീറ്റിന്റെ കാർ മാറ്റടിയിൽ നിന്നും സിപ്പ് ലോക്ക് കവറിലൊളിച്ചുവെച്ച വെള്ളപ്പൊടി രൂപത്തിലുള്ള എം.ഡി.എം.എ കണ്ടെത്തുകയായിരുന്നു. കാസർകോട് എക്സൈസ് സ്പെഷ്യൽ സ്ക്വാഡിൽ നിന്നും എത്തിച്ച ഡിജിറ്റൽ ത്രാസ് ഉപയോഗിച്ച് കോളിയടുക്കത്തെ ഒരു സ്ഥാപനത്തിൽ വെച്ച് നടത്തിയ തൂക്ക പരിശോധനയിലാണ് 1.68 ഗ്രാം എം.ഡി.എം.എയാണ് ഇതെന്ന് വ്യക്തമായത്. ബാംഗ്ലൂരിൽ നിന്നും ‘ജാവിദ് ഭായ്’ എന്നയാളുടെ പക്കൽ നിന്നുമാണ് മയക്കുമരുന്ന് വാങ്ങിയതെന്ന് പ്രതി പോലീസിനോട് സമ്മതിച്ചിട്ടുണ്ട്.
മയക്കുമരുന്ന് കൈവശം വെച്ചതിന് എൻ.ഡി.പി.എസ്. ആക്ട് വകുപ്പ് 22(b) പ്രകാരം മേൽപ്പറമ്പ് പോലീസ് സ്റ്റേഷനിൽ ക്രൈം നമ്പർ 443/2026 ആയി കേസ് രജിസ്റ്റർ ചെയ്തു. 1.68 ഗ്രാം എം.ഡി.എം.എ, കാർ കടത്താൻ ഉപയോഗിച്ച മാരുതി സ്വിഫ്റ്റ് കാർ (KL 14 AH 6663), മൊബൈൽ ഫോൺ, കറൻസി എന്നിവ പോലീസ് കസ്റ്റഡിയിലെടുത്തു. തുടർനടപടികൾക്കായി പ്രതിയെ മേൽപ്പറമ്പ് പോലീസ് സ്റ്റേഷൻ സബ് ഇൻസ്പെക്ടർ ഷൈജുവിന്റെ ചുമതലയിലേക്ക് കൈമാറി.
