By വിവാഹം എന്നത് വെറുമൊരു ചടങ്ങോ സാമൂഹിക ഉടമ്പടിയോ മാത്രമല്ല; രണ്ട് ജീവിതങ്ങളുടെ പ്രതീക്ഷകളും ഒരു കുടുംബത്തിന്റെ ഭാവിയും നാളെ പിറവിയെടുക്കേണ്ട പുതിയൊരു തലമുറയുടെ സ്വപ്നങ്ങളും പരസ്പരം കൈകോർക്കുന്ന പവിത്രമായ നിമിഷമാണ്. ആ വലിയ ഉത്തരവാദിത്തത്തിലേക്ക് കാലെടുത്തു വെക്കുമ്പോൾ, സ്നേഹത്തിനൊപ്പം പരസ്പരമുള്ള കരുതലും സത്യസന്ധതയും അനിവാര്യമാണെന്ന ചിന്ത സമൂഹം ഗൗരവത്തോടെ കാണേണ്ട സമയമാണിത്. മാർത്തോമാ സഭയിലെ വൈദിക ട്രസ്റ്റി റവ. ഡോ. കെ. തോമസ് വിവാഹത്തിന് മുമ്പ് വധൂവരന്മാർക്ക് എച്ച്.ഐ.വി പരിശോധന നിർബന്ധമാക്കണമെന്ന് മുന്നോട്ടുവെച്ച നിർദ്ദേശം തുടക്കത്തിൽ സമ്മിശ്ര പ്രതികരണങ്ങൾക്ക് ഇടയാക്കിയെങ്കിലും, ദിവസങ്ങൾ പിന്നിടുമ്പോൾ അതൊരു സഭയുടെ നാലതിരുകൾ വിട്ട് കേരളമൊട്ടാകെ വലിയൊരു ജനകീയ ചർച്ചയായി പടരുകയാണ്.
സ്നേഹമുള്ളിടത്ത് എന്തിനാണ് പരിശോധനയെന്ന് വൈകാരികമായി ചിന്തിക്കുന്നവരുണ്ടാകാം. എന്നാൽ തനിക്ക് പ്രിയപ്പെട്ട ആളുടെ ജീവനും ആരോഗ്യത്തിനും സംരക്ഷണം നൽകുക എന്നതിനേക്കാൾ വലിയൊരു സ്നേഹപ്രകടനം വേറെയില്ല. കേരളം പൊതുജനാരോഗ്യ രംഗത്ത് വലിയ മാതൃകകൾ സൃഷ്ടിച്ച നാടാണ്. 2010നെ അപേക്ഷിച്ച് പുതിയ എച്ച്.ഐ.വി ബാധിതരുടെ എണ്ണത്തിൽ 75.9 ശതമാനത്തിന്റെ കുറവ് സംസ്ഥാനം കൈവരിച്ചിട്ടുമുണ്ട്. എങ്കിലും കൺമുന്നിലെ യാഥാർഥ്യം പൂർണമായും ശുഭകരമല്ലെന്നതാണ് ആശങ്കയുണർത്തുന്ന വസ്തുത. കേരള ആരോഗ്യവകുപ്പിന്റെ ഔദ്യോഗിക കണക്കുകൾ പ്രകാരം ഏകദേശം 23,608 പേരാണ് സംസ്ഥാനത്ത് എച്ച്.ഐ.വിയുമായി ജീവിക്കുന്നത്. മാസംതോറും ശരാശരി നൂറോളം പുതിയ കേസുകൾ റിപ്പോർട്ട് ചെയ്യപ്പെടുമ്പോൾ, അതിൽ ഏറ്റവും നെഞ്ചുപിടയ്ക്കുന്നത് യുവതലമുറയിലെ കണക്കുകളാണ്. 15 മുതൽ 24 വയസ്സുവരെയുള്ള ചെറുപ്പക്കാരിൽ പുതിയ കേസുകളുടെ നിരക്ക് 9 ശതമാനത്തിൽ നിന്ന് 15.4 ശതമാനമായി കുതിച്ചുയർന്നിരിക്കുന്നു. ജീവിതം കണ്ടുതുടങ്ങും മുമ്പേ അറിവില്ലായ്മയുടെ പേരിൽ മാത്രം രോഗത്തിന്റെ ഇരുളിലേക്ക് വീണുപോകുന്ന ഈ തലമുറയെ കാത്തുസൂക്ഷിക്കാൻ ആരോഗ്യപരിശോധനയോളം വലിയൊരു കവചം വേറെന്തുണ്ട്?
ഇതൊരു അപ്രായോഗിക പരീക്ഷണമല്ലെന്ന് തെളിയിച്ച വിദേശ രാജ്യങ്ങൾ നമുക്ക് മുന്നിലുണ്ട്. മലേഷ്യയിൽ വിവാഹിതരാകാൻ പോകുന്ന ദമ്പതികൾക്ക് സർക്കാർ ക്ലിനിക്കുകൾ വഴിയുള്ള എച്ച്.ഐ.വി പരിശോധന നിർബന്ധമാണ്. ഫലം പോസിറ്റീവായാൽ അവരെ തള്ളിപ്പറയുകയല്ല, മറിച്ച് കൃത്യമായ കൗൺസിലിംഗും ചികിത്സയും നൽകി ഒരുമിച്ച് മുന്നോട്ടുപോകാനുള്ള വഴി കാട്ടുകയാണ് ഭരണകൂടം ചെയ്യുന്നത്. സൗദി അറേബ്യയും യു.എ.ഇയും തങ്ങളുടെ വിവാഹ രജിസ്ട്രേഷൻ നടപടികളുടെ ഭാഗമായി മെഡിക്കൽ സ്ക്രീനിംഗ് നടപ്പാക്കിയിട്ട് കാലങ്ങളായി. എച്ച്.ഐ.വിക്ക് പുറമെ ഹെപ്പറ്റൈറ്റിസും ജനിതക രോഗങ്ങളും പരിശോധിച്ച് ഭാവിയിലെ കുഞ്ഞുങ്ങളുടെ സുരക്ഷിതത്വം ഉറപ്പാക്കുകയാണ് ഈ നാടുകൾ ചെയ്യുന്നത്. ഈ മാതൃകകളിലൊന്നും പരിശോധന എന്നത് വ്യക്തികളെ സമൂഹത്തിൽ നിന്ന് മാറ്റിനിർത്താനുള്ള ശിക്ഷയല്ല, മറിച്ച് അറിവോടെയും ഉത്തരവാദിത്തത്തോടെയും ജീവിതം ആരംഭിക്കാനുള്ള അവസരമാണ്.
വിവാഹശേഷം പങ്കാളികളിലൊരാൾ രോഗബാധിതനാണെന്ന് അപ്രതീക്ഷിതമായി അറിയുമ്പോൾ തകരുന്നത് ഒരു മനസ്സ് മാത്രമല്ല, ഒരു കുടുംബത്തിന്റെ നിലനിൽപ് കൂടിയാണ്. വഞ്ചിക്കപ്പെട്ടു എന്ന തോന്നൽ ഉണ്ടാക്കുന്ന മാനസികാഘാതം മരണതുല്യമാണ്. എന്നാൽ വിവാഹത്തിന് മുമ്പ് ഇരുവരും പരസ്പരം ഈ പരിശോധനയ്ക്ക് തയ്യാറാകുമ്പോൾ ദാമ്പത്യത്തിന്റെ ആദ്യ അടിത്തറയായി മാറുന്നത് പരസ്പര വിശ്വാസമാണ്. രോഗം നേരത്തെ തിരിച്ചറിയുന്നത് ആധുനിക എ.ആർ.ടി ചികിത്സ വേഗത്തിൽ തുടങ്ങാൻ സഹായിക്കും. ഇതുവഴി രക്തത്തിലെ വൈറസിന്റെ സാന്നിധ്യം നിയന്ത്രിച്ച് പങ്കാളിയിലേക്ക് അണുബാധ പകരുന്നത് തടയാനും സാധിക്കും. ഇതിലും ഉപരിയായി, കൃത്യമായ വൈദ്യസഹായത്തിലൂടെ അമ്മയിൽ നിന്ന് കുഞ്ഞിലേക്ക് എച്ച്.ഐ.വി പകരുന്നത് പൂർണമായി തടഞ്ഞ് ആരോഗ്യമുള്ള ഒരു തലമുറയെ വാർത്തെടുക്കാൻ ശാസ്ത്രത്തിന് സാധിക്കുമെന്നത് ഈ പരിശോധനയുടെ ഏറ്റവും വലിയ അനുഗ്രഹമാണ്.
അതേസമയം, ഈ വിഷയത്തിൽ ഉയരുന്ന ഏറ്റവും വലിയ ആശങ്ക പരിശോധന ഒരു സാമൂഹിക വിലക്കോ വിവേചനമോ ആയി മാറുമോ എന്നതാണ്. എച്ച്.ഐ.വി ബാധ ഒരാളുടെ സ്വഭാവത്തിന്റെയോ ധാർമികതയുടെയോ അളവുകോലല്ല. ലോകാരോഗ്യ സംഘടന ചൂണ്ടിക്കാണിക്കുന്നത് പോലെ, സമ്മതവും രഹസ്യസ്വഭാവവും കൃത്യമായ കൗൺസിലിംഗും ഉറപ്പുവരുത്തിക്കൊണ്ടുള്ള ശാസ്ത്രീയ സമീപനമാണ് ഇവിടെ ആവശ്യം. ടെസ്റ്റ് ചെയ്ത് രോഗം കണ്ടെത്തിയാൽ വിവാഹം വിലക്കുക എന്നതല്ല, മറിച്ച് പരിശോധനയും കൃത്യമായ ചികിത്സയും നൽകി പങ്കാളികൾക്ക് പക്വതയോടെ മുന്നോട്ട് തീരുമാനമെടുക്കാനുള്ള അവസരമൊരുക്കുക എന്നതായിരിക്കണം നിലപാട്.
മറച്ചുവെക്കുന്നതിനേക്കാൾ വലിയ അപകടമില്ല, ഭയത്തേക്കാൾ വലുതാണ് അറിവ്. വിവാഹത്തിന് മുമ്പ് ലാബിൽ നൽകുന്ന ആ ഒരു തുള്ളി ചോരയ്ക്ക് ചിലപ്പോൾ രണ്ട് ജീവിതങ്ങളുടെ ഭാവിയെയും നാളെ ജനിക്കാനിരിക്കുന്ന ഒരു കുഞ്ഞിന്റെ പുഞ്ചിരിയെയും കാത്തുരക്ഷിക്കാൻ സാധിക്കും. വിവാഹപ്പന്തലിലെ ധൂർത്തിനും ആർഭാടങ്ങൾക്കും നൽകുന്ന പ്രാധാന്യത്തേക്കാൾ, ഒരുമിച്ചുള്ള ജീവിതം സുരക്ഷിതമാണെന്ന് പരസ്പരം ഉറപ്പുവരുത്തുന്നതിലല്ലേ യഥാർത്ഥ പ്രണയവും ഉത്തരവാദിത്തവും കുടികൊള്ളുന്നത്? അതുകൊണ്ടുതന്നെ എച്ച്ഐവി ടെസ്റ്റ് നിയമപരമായി തന്നെ നിർബന്ധിതമാക്കുക എന്നുള്ളതാണ് ഏറ്റവും നല്ലത് .
