By എസ്. ശ്രീജിത്തിന്റെ ഡിജിപി സ്ഥാനക്കയറ്റം: ‘വിജിലൻസ് ക്ലിയറൻസ് വാങ്ങിയിരുന്നോ?’ സർക്കാരിനോട് ഹൈക്കോടതിയുടെ നിർണായക ചോദ്യം
തിരുവനന്തപുരം: സംസ്ഥാന പൊലീസ് മേധാവിയായി എസ്. ശ്രീജിത്തിനെ സ്ഥാനക്കയറ്റം നൽകിയ നടപടിക്കെതിരെ സമർപ്പിച്ച ഹർജി പരിഗണിക്കവെ സംസ്ഥാന സർക്കാരിനോട് നിർണായക ചോദ്യങ്ങളുമായി ഹൈക്കോടതി. എഡിജിപി സ്ഥാനത്ത് നിന്ന് ഡിജിപി സ്ഥാനത്തേക്ക് പ്രമോഷൻ നൽകുന്നതിന് മുൻപ് വിജിലൻസ് ക്ലിയറൻസ് വാങ്ങിയിരുന്നോയെന്നാണ് കോടതി സർക്കാരിനോട് ചോദിച്ചത്.
കെ.എം. ഷാജാൻ സമർപ്പിച്ച ഹർജിയിലാണ് ജസ്റ്റിസ് എ. ബദറുദ്ദീൻ അധ്യക്ഷനായ ബെഞ്ച് ഇക്കാര്യം ഉന്നയിച്ചത്. പുതിയ പരാതികൾ നിലനിൽക്കുന്ന സാഹചര്യത്തിൽ, പ്രമോഷൻ നൽകുന്നതിന് തൊട്ടുമുമ്പ് വീണ്ടും വിജിലൻസ് ക്ലിയറൻസ് തേടേണ്ടിയിരുന്നില്ലേയെന്നും കോടതി ചോദിച്ചു.
അതേസമയം, എസ്. ശ്രീജിത്തിന്റെ സ്ഥാനക്കയറ്റം പതിവ് നടപടിക്രമങ്ങളുടെ ഭാഗമായിരുന്നുവെന്നാണ് സംസ്ഥാന സർക്കാർ കോടതിയെ അറിയിച്ചത്. ഐപിഎസ് ഉദ്യോഗസ്ഥരുടെ സീനിയോറിറ്റി പട്ടിക നേരത്തേ തന്നെ തയ്യാറാക്കിയിരുന്നുവെന്നും, ഡിജിപിയായി സ്ഥാനക്കയറ്റം ലഭിക്കേണ്ടിയിരുന്ന എം.ആർ. അജിത് കുമാർ സസ്പെൻഷനിലായതിനെ തുടർന്നാണ് തൊട്ടടുത്ത സീനിയറായ എസ്. ശ്രീജിത്തിന് പ്രമോഷൻ നൽകിയതെന്നും സർക്കാർ വിശദീകരിച്ചു.
സ്ഥാനക്കയറ്റവുമായി ബന്ധപ്പെട്ട ആവശ്യമായ നടപടിക്രമങ്ങളും വിജിലൻസ് പരിശോധനകളും മുമ്പേ പൂർത്തിയാക്കിയിരുന്നുവെന്ന നിലപാടും സർക്കാർ കോടതിയിൽ സ്വീകരിച്ചു. എന്നാൽ, പ്രമോഷൻ ഉത്തരവ് പുറപ്പെടുവിക്കുന്ന സമയത്തെ സാഹചര്യങ്ങൾ കൂടി പരിഗണിച്ച് പുതിയതായി വിജിലൻസ് ക്ലിയറൻസ് വാങ്ങേണ്ടതില്ലായിരുന്നോയെന്ന ചോദ്യമാണ് കോടതി വീണ്ടും ഉയർത്തിയത്.
വിജിലൻസ് സംബന്ധിച്ച പരാതിയിൽ സർക്കാരിന് മറുപടി സമർപ്പിക്കാൻ ഈ മാസം 10 വരെ സമയം അനുവദിച്ചിരിക്കുകയാണ് ഹൈക്കോടതി. രണ്ടാഴ്ചത്തെ സാവകാശം സർക്കാർ ആവശ്യപ്പെട്ടിരുന്നെങ്കിലും അത് കോടതി അനുവദിച്ചില്ല.
കേസിൽ മറ്റൊരു പ്രധാന നിരീക്ഷണവും ഹൈക്കോടതി നടത്തി. എസ്. ശ്രീജിത്തിന് ഡിജിപി സ്ഥാനക്കയറ്റം നൽകുന്നതിൽ നിയമപരമായ നടപടിക്രമങ്ങൾ ലംഘിച്ചിട്ടുണ്ടെന്ന് ഹർജിക്കാരന് തോന്നുന്നുവെങ്കിൽ, അതിനെ പ്രത്യേകം ചോദ്യം ചെയ്ത് പുതിയ ഹർജി സമർപ്പിക്കാമെന്ന് കോടതി വ്യക്തമാക്കി. അതിലൂടെ പ്രമോഷൻ നടപടിയുടെ നിയമസാധുത പിന്നീട് പ്രത്യേകം പരിശോധിക്കാനുള്ള സാധ്യതയും കോടതി തുറന്നുവെച്ചു.
ഇതിനിടെ എസ്. ശ്രീജിത്തിനെ ഡിജിപിയായി നിയമിച്ചുള്ള സർക്കാർ ഉത്തരവ് നിലവിൽ പ്രാബല്യത്തിലുണ്ട്. എന്നാൽ സ്ഥാനക്കയറ്റ നടപടികളിൽ നിയമപരമായ വീഴ്ചകൾ ഉണ്ടായിട്ടുണ്ടോയെന്ന കാര്യത്തിൽ ഹൈക്കോടതിയുടെ തുടർപരിഗണനയും സർക്കാരിന്റെ വിശദീകരണവും നിർണായകമാകും.
