വീട്ടുപറമ്പിൽ കയറിയ പെരുമ്പാമ്പിനെ പിടികൂടി അത്താഴത്തിന് ഫ്രൈ ആക്കി ; വിരുന്ന് കഴിഞ്ഞയുടൻ വനംവകുപ്പിന്റെ വക ‘എട്ടിന്റെ പണി’

വീട്ടുപറമ്പിൽ കയറിയ പെരുമ്പാമ്പിനെ പിടികൂടി അത്താഴത്തിന് ഫ്രൈ ആക്കി ; വിരുന്ന് കഴിഞ്ഞയുടൻ വനംവകുപ്പിന്റെ വക ‘എട്ടിന്റെ പണി’

തൃശൂർ: വീട്ടുപറമ്പിൽ കയറിയ പെരുമ്പാമ്പിനെ പിടികൂടി കഷണങ്ങളാക്കി പാകം ചെയ്തു കഴിച്ച മൂന്ന് യുവാക്കൾ വനംവകുപ്പിന്റെ പിടിയിലായി. മാന്നമംഗലത്തിനടുത്തുള്ള ചെറുകുന്ന് സ്വദേശികളായ ജിൻസൺ ജോസ് (36), ജിഷ്ണു (30), വിവേക് ​​(30) എന്നിവരെയാണ് വനംവകുപ്പ് ഉദ്യോഗസ്ഥർ അറസ്റ്റ് ചെയ്തത്. വൈദ്യപരിശോധനയ്ക്കു ശേഷം കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.

വെള്ളിയാഴ്ച രാത്രിയാണ് കേസിനാസ്പദമായ സംഭവം. പ്രതികളിലൊരാളുടെ വീടിന് സമീപം പെരുമ്പാമ്പിനെ കണ്ടതിനെ തുടർന്ന്, വനംവകുപ്പിനെയോ ലൈസൻസുള്ള സ്നേക്ക് റെസ്ക്യൂവർമാരെയോ വിവരമറിയിക്കുന്നതിന് പകരം യുവാക്കൾ ഇതിനെ ജീവനോടെ പിടികൂടുകയായിരുന്നു. തുടർന്ന് ഇറച്ചിയാക്കി പാകം ചെയ്ത് സുഹൃത്തുക്കൾക്കൊപ്പം കഴിക്കുകയായിരുന്നുവെന്ന് ഉദ്യോഗസ്ഥർ വ്യക്തമാക്കി.

രഹസ്യവിവരത്തെ തുടർന്ന് മാന്നമംഗലം ഫോറസ്റ്റ് സ്റ്റേഷൻ ഡെപ്യൂട്ടി റേഞ്ച് ഫോറസ്റ്റ് ഓഫീസർ എം. ഷാജഹാന്റെ നേതൃത്വത്തിലുള്ള സംഘം സ്ഥലത്തെത്തി നടത്തിയ പരിശോധനയിലാണ് സംഭവം പുറത്തറിയുന്നത്. പാമ്പിനെ കൊന്ന് ഭക്ഷിച്ചതുമായി ബന്ധപ്പെട്ട നിർണായക തെളിവുകൾ ഉദ്യോഗസ്ഥർ സ്ഥലത്തുനിന്നും ശേഖരിച്ചു. ഉദ്യോഗസ്ഥരായ എസ്. രാജേഷ്, ടി.യു. രാജ്കുമാർ, കെ.എസ്. അനിൽകുമാർ, കെ.എ. സലിം, എം.ആർ. രാഹുൽ ശങ്കർ, പി.വി. അമ്മിണി എന്നിവരും അന്വേഷണ സംഘത്തിലുണ്ടായിരുന്നു. പ്രതികൾ മുൻപ് ക്രിമിനൽ പശ്ചാത്തലമുള്ളവരല്ലെങ്കിലും വന്യജീവി സംരക്ഷണ നിയമത്തിന്റെ ലംഘനം അതീവ ഗുരുതരമാണെന്ന് തൃശൂർ ഡിവിഷണൽ ഫോറസ്റ്റ് ഓഫീസിലെ സീനിയർ സൂപ്രണ്ട് കെ.ജി. ജയകൃഷ്ണൻ വ്യക്തമാക്കി.

പെരുമ്പാമ്പ് നിസ്സാരക്കാരനല്ല; കാത്തിരിക്കുന്നത് കഠിനതടവ്

1972-ലെ വന്യജീവി (സംരക്ഷണ) നിയമപ്രകാരം ഷെഡ്യൂൾ I-ൽ ഉൾപ്പെടുത്തി അതീവ സംരക്ഷണം നൽകിയിട്ടുള്ള ജീവിവർഗ്ഗമാണ് പെരുമ്പാമ്പുകൾ (Python). ഇത്തരം ജീവികളെ വേട്ടയാടുകയോ കൊല്ലുകയോ കൈവശം വെക്കുകയോ മാംസം ഭക്ഷിക്കുകയോ ചെയ്യുന്നത് ജാമ്യമില്ലാ വകുപ്പുകൾ പ്രകാരമുള്ള ക്രിമിനൽ കുറ്റമാണ്. സെക്ഷൻ 51 പ്രകാരം കുറ്റം തെളിയിക്കപ്പെട്ടാൽ പ്രതികൾക്ക് കുറഞ്ഞത് മൂന്ന് വർഷം മുതൽ ഏഴ് വർഷം വരെ കഠിനതടവും ചുരുങ്ങിയത് ₹25,000 രൂപ പിഴയും ലഭിക്കാം. കുറ്റകൃത്യത്തിന് ഉപയോഗിച്ച ഉപകരണങ്ങൾ, പാകം ചെയ്ത പാത്രങ്ങൾ, മറ്റ് വസ്തുക്കൾ എന്നിവ കണ്ടുകെട്ടാനും നിയമത്തിൽ വ്യവസ്ഥയുണ്ട്.

2025 സെപ്റ്റംബറിൽ കണ്ണൂർ പാണപ്പുഴയിലും സമാനമായ രീതിയിൽ പെരുമ്പാമ്പിനെ കൊന്ന് പാചകം ചെയ്ത രണ്ട് യുവാക്കളെ വനംവകുപ്പ് അറസ്റ്റ് ചെയ്തിരുന്നു. ആവാസവ്യവസ്ഥയുടെ സന്തുലിതാവസ്ഥ നിലനിർത്തുന്നതിൽ വലിയ പങ്കുവഹിക്കുന്ന വിഷമില്ലാത്ത പാമ്പുകളാണ് പെരുമ്പാമ്പുകൾ. വീടുകൾക്ക് സമീപം പാമ്പുകളെ കണ്ടാൽ യാതൊരു കാരണവശാലും അവയെ ഉപദ്രവിക്കരുതെന്നും, ഉടൻ തന്നെ വനംവകുപ്പിനെയോ അംഗീകൃത പാമ്പ് രക്ഷാപ്രവർത്തകരെയോ വിവരം അറിയിക്കണമെന്നും അധികൃതർ കർശന മുന്നറിയിപ്പ് നൽകി.