By കാഞ്ഞങ്ങാട്ടും കാസർകോടും പൈപ്പ് പൊട്ടി കുടിവെള്ളം പാഴാകുന്നു; തിരിഞ്ഞുനോക്കാതെ വാട്ടർ അതോറിറ്റി
കാഞ്ഞങ്ങാട്/കാസർകോട്: കാഞ്ഞങ്ങാട്, കാസർകോട് നഗരസഭാ പരിധികളിൽ പ്രധാന പൈപ്പുകൾ പൊട്ടി ദിവസങ്ങളായി ശുദ്ധജലം പാഴായി ഒഴുകുന്നു. കടുത്ത വേനലിലേക്ക് കടക്കാനിരിക്കെ ലിറ്റർ കണക്കിന് ശുദ്ധജലം തെരുവിലൂടെ ഒഴുകി നഷ്ടപ്പെടുമ്പോഴും വാട്ടർ അതോറിറ്റി അധികൃതർ തിരിഞ്ഞുനോക്കുന്നില്ലെന്നാണ് നാട്ടുകാരുടെ പരാതി. രണ്ടിടങ്ങളിലെയും പൈപ്പ് ചോർച്ച കാരണം പരിസരത്തെ നൂറുകണക്കിന് വീടുകളിൽ കുടിവെള്ള വിതരണം പൂർണ്ണമായും നിലച്ചിരിക്കുകയാണ്.
കാഞ്ഞങ്ങാട് ദേവൻ റോഡിൽ ഒരു മാസമായി ചോർച്ച
കാഞ്ഞങ്ങാട് നഗരസഭാ പരിധിയിലെ ദേവൻ റോഡിൽ പ്രൈമറി അഗ്രികൾച്ചറൽ സർവീസ് സഹകരണ ബാങ്കിന് മുന്നിലാണ് പ്രധാന പൈപ്പ് തകർന്നത്. മേലാങ്കോട്ട് ഭാഗത്തുനിന്ന് വരുന്ന പൈപ്പ് പൊട്ടി ഒരു മാസത്തോളമായി റോഡിലൂടെ വെള്ളമൊഴുകുന്നു. ഇടവിട്ട് മഴ പെയ്തിരുന്നതിനാൽ റോഡിലൂടെ ഒഴുകിയിരുന്നത് മഴവെള്ളമാണെന്നാണ് നാട്ടുകാർ ആദ്യം കരുതിയത്. എന്നാൽ മഴ മാറി വെയിൽ വന്നിട്ടും ഈ ഭാഗത്ത് മാത്രം വെള്ളമൊഴുക്ക് തുടർന്നതോടെ നടത്തിയ പരിശോധനയിലാണ് പൈപ്പ് പൊട്ടിയ വിവരം വ്യക്തമായത്.
തളങ്കരയിൽ കുഴിയെടുത്തിട്ടിട്ട് ഒരാഴ്ച; പണി തീർക്കാതെ അധികൃതർ
കാസർകോട് നഗരസഭയിലെ തളങ്കര കെ.എസ്. അബ്ദുല്ല റോഡിൽ പൈപ്പ് പൊട്ടിയിട്ട് ഒരാഴ്ച പിന്നിട്ടു. ചോർച്ച അടയ്ക്കാനായി വാട്ടർ അതോറിറ്റി റോഡിൽ കുഴിയെടുത്തതല്ലാതെ തുടർനടപടികളൊന്നും പൂർത്തിയാക്കിയില്ല. പണി പാതിവഴിയിൽ ഉപേക്ഷിച്ചുപോയതോടെ കുഴിയിൽനിന്ന് വൻതോതിൽ വെള്ളം പുറത്തേക്ക് പരന്നൊഴുകുകയാണ്.
ദുരിതത്തിലായി യാത്രക്കാരും നാട്ടുകാരും
റോഡിലൂടെ വെള്ളം പരന്നൊഴുകി പലയിടത്തും കെട്ടിക്കിടക്കുന്നത് കാൽനടയാത്രക്കാർക്കും വാഹനങ്ങൾക്കും വലിയ ദുരിതമാണ് സൃഷ്ടിക്കുന്നത്. ടാർ ഇളകി റോഡ് തകരുന്നതിനൊപ്പം കൊതുകുജന്യ രോഗങ്ങൾ പടരാനുള്ള ഭീഷണിയുമുണ്ട്. രണ്ട് പ്രദേശങ്ങളിലും ജല അതോറിറ്റിക്ക് നിരവധി തവണ പരാതി നൽകിയിട്ടും യാതൊരു നടപടിയും ഉണ്ടായിട്ടില്ല. യുദ്ധകാലാടിസ്ഥാനത്തിൽ പൈപ്പിലെ ചോർച്ചയടച്ച് റോഡ് ഗതാഗതയോഗ്യമാക്കണമെന്നും കുടിവെള്ള വിതരണം പുനഃസ്ഥാപിക്കണമെന്നും നാട്ടുകാർ ആവശ്യപ്പെടുന്നു.
