By പ്രണയക്കുരുക്കിൽ ഭീഷണിയും പീഡനവും: ഒൻപതാം ക്ലാസുകാരിയെ വീട്ടിൽ വിളിച്ചുവരുത്തി പീഡിപ്പിച്ച മൂന്ന് വിദ്യാർത്ഥികൾ കസ്റ്റഡിയിൽ
തിരുവനന്തപുരം: കൗമാരപ്രണയത്തിന്റെ മറവിൽ വിശ്വാസം മുതലെടുത്ത് ഒൻപതാം ക്ലാസ് വിദ്യാർത്ഥിനിയെ പീഡിപ്പിച്ച സംഭവത്തിൽ പ്രായപൂർത്തിയാകാത്ത മൂന്ന് സ്കൂൾ വിദ്യാർത്ഥികളെ മണ്ണന്തല പോലീസ് കസ്റ്റഡിയിലെടുത്തു. 16, 17 വയസ്സ് പ്രായമുള്ള വിദ്യാർത്ഥികളാണ് പിടിയിലായത്.
പെൺകുട്ടിയുമായി പ്രണയം നടിച്ച വിദ്യാർത്ഥി പെൺകുട്ടിയെ സ്വന്തം വീട്ടിലേക്ക് വിളിച്ചുവരുത്തുകയായിരുന്നു. സ്കൂളിൽ പോകാതെ കാമുകന്റെ വീട്ടിലെത്തിയ പെൺകുട്ടിയെ അവിടെയെത്തിച്ച് ഭീഷണിപ്പെടുത്തുകയും, തുടർന്ന് അവിടെ കാത്തുനിന്ന മറ്റ് രണ്ട് സുഹൃത്തുക്കളുമായി ചേർന്ന് നിർബന്ധിത ലൈംഗിക പീഡനത്തിന് ഇരയാക്കുകയുമായിരുന്നുവെന്നാണ് പോലീസിന് ലഭിച്ച പരാതി. പെൺകുട്ടിയും പിടിയിലായ കുട്ടികളും നഗരത്തിലെ വിവിധ സ്കൂളുകളിലെ വിദ്യാർത്ഥികളാണ്.
വിശ്വാസത്തിന്റെ പേരിൽ ഒരുക്കിയ കെണിയിലൂടെ വിദ്യാർത്ഥിനിയെ മാനസികമായും ശാരീരികമായും ഭീഷണിപ്പെടുത്തിയാണ് സംഘം ക്രൂരതയ്ക്ക് വിധേയയാക്കിയത്. സംഭവം പുറത്തുപറയാതിരിക്കാൻ പെൺകുട്ടിയെ നിരന്തരം ഭയപ്പെടുത്തുകയും ചെയ്തിരുന്നു.
സ്കൂളിൽ വിദ്യാർത്ഥികൾക്കായി നടത്തിയ പതിവ് കൗൺസിലിംഗിനിടെയാണ് പെൺകുട്ടി താൻ നേരിട്ട പീഡനവിവരം തുറന്നുപറഞ്ഞത്. പെൺകുട്ടിയുടെ പെരുമാറ്റത്തിൽ അസ്വാഭാവികത കണ്ട അധ്യാപകരും കൗൺസിലറും കാര്യങ്ങൾ ചോദിച്ചറിഞ്ഞതോടെയാണ് പ്രണയക്കെണിയിലൂടെ നടന്ന ചതിയുടെ ചുരുളഴിഞ്ഞത്.
സ്കൂൾ അധികൃതർ ഉടൻതന്നെ കുട്ടിയുടെ രക്ഷിതാക്കളെ വിവരമറിയിക്കുകയും തുടർന്ന് പോലീസിൽ പരാതി നൽകുകയുമായിരുന്നു. വിവരമറിഞ്ഞയുടൻ അന്വേഷണം ആരംഭിച്ച മണ്ണന്തല പോലീസ് പെൺകുട്ടിയുടെ മൊഴി രേഖപ്പെടുത്തുകയും പ്രതികളായ മൂന്ന് വിദ്യാർത്ഥികളെയും കസ്റ്റഡിയിലെടുക്കുകയും ചെയ്തു.
പോക്സോ (POCSO) ഉൾപ്പെടെയുള്ള വകുപ്പുകൾ പ്രകാരമാണ് പോലീസ് കേസ് എടുത്തിരിക്കുന്നത്. പിടിയിലായവർ പ്രായപൂർത്തിയാകാത്തവരായതിനാൽ നിയമപരമായ എല്ലാ നടപടിക്രമങ്ങളും പൂർത്തിയാക്കി ഇവരെ ജുവനൈൽ ജസ്റ്റിസ് ബോർഡിന് മുന്നിൽ ഹാജരാക്കുമെന്ന് മണ്ണന്തല പോലീസ് അറിയിച്ചു.
