By ന്യൂഡൽഹി: മുഖ്യ തെരഞ്ഞെടുപ്പ് കമ്മീഷണർ (CEC) ഗ്യാനേഷ് കുമാറിന്റെ രാജി ആവശ്യപ്പെട്ട് ഡൽഹിയിൽ INDIA സഖ്യം നടത്തുന്ന പ്രതിഷേധം രണ്ടാം ദിവസവും സംഘർഷത്തിലേക്ക്. ജന്തർ മന്തറിലേക്ക് മാർച്ച് നടത്തിയ പ്രതിപക്ഷ എംപിമാരെ ഡൽഹി പൊലീസ് തടഞ്ഞതിനെ തുടർന്ന് രാഹുൽ ഗാന്ധി, പ്രിയങ്ക ഗാന്ധി വാദ്ര തുടങ്ങിയ നേതാക്കളെ പൊലീസ് കസ്റ്റഡിയിലെടുത്ത് നീക്കി. പ്രതിഷേധക്കാരെ പൊലീസ് ബസുകളിലേക്ക് മാറ്റുന്നതിനിടെ ചില നേതാക്കളെ റോഡിലൂടെ വലിച്ചിഴച്ചാണ് കൊണ്ടുപോയത് .
ജന്തർ മന്തറിലേക്ക് പോകുന്നതിനായി പ്രതിപക്ഷ എംപിമാർ എത്തിയ ബസുകൾ പൊലീസ് പ്രതിഷേധസ്ഥലത്തിന് സമീപം തടഞ്ഞു. മാർച്ചിന് അനുമതി ലഭിച്ചിട്ടില്ലെന്നും ഡൽഹിയിലെ ചില മേഖലകളിൽ ഭാരതീയ നാഗരിക സുരക്ഷാ സംഹിതയിലെ (BNSS) വകുപ്പ് 163 പ്രകാരമുള്ള നിയന്ത്രണങ്ങൾ നിലവിലുണ്ടെന്നും പൊലീസ് വിശദീകരിച്ചു. അതേസമയം, ജനാധിപത്യപരമായ പ്രതിഷേധം നടത്താനുള്ള അവകാശം തടയുകയാണെന്നാണ് പ്രതിപക്ഷത്തിന്റെ ആരോപണം.
‘ഓരോ എഫ്‌ഐആറും ഓരോ മെഡൽ’ രാഹുൽ ഗാന്ധി
പ്രതിഷേധത്തിന് പുറപ്പെടുന്നതിന് മുമ്പ് രാഹുൽ ഗാന്ധി നിലപാട് കൂടുതൽ കടുപ്പിച്ചു.
തനിക്കെതിരെ നിലവിൽ ഏകദേശം 45 എഫ്‌ഐആറുകൾ രജിസ്റ്റർ ചെയ്തിട്ടുണ്ടെന്നും എണ്ണം 100 ആകണമെന്നാണ് തന്റെ ആഗ്രഹമെന്നും രാഹുൽ പറഞ്ഞു. തനിക്കെതിരെ രജിസ്റ്റർ ചെയ്യുന്ന ഓരോ എഫ്‌ഐആറും തനിക്ക് ഒരു ‘മെഡൽ’ പോലെയാണെന്നും അദ്ദേഹം വ്യക്തമാക്കി.
ഗ്യാനേഷ് കുമാർ മുഖ്യ തെരഞ്ഞെടുപ്പ് കമ്മീഷണറായി തുടരാൻ യോഗ്യനല്ലെന്നും അദ്ദേഹം രാജിവെക്കണമെന്നും രാഹുൽ ആവശ്യപ്പെട്ടു. തെരഞ്ഞെടുപ്പ് കമ്മീഷന്റെ നടപടികൾക്ക് പിന്നിൽ പ്രധാനമന്ത്രി നരേന്ദ്ര മോദിയാണെന്നും അത് ജനാധിപത്യത്തെ ദുർബലപ്പെടുത്താനുള്ള ശ്രമമാണെന്നും രാഹുൽ ആരോപിച്ചു.
രാഹുലിനും പ്രിയങ്കയ്ക്കുമെതിരെ എഫ്‌ഐആർ
ആകാശവാണി ഭവൻ പരിസരത്ത് അനുമതിയില്ലാതെ പ്രവേശിച്ച് പ്രതിഷേധിച്ചതുമായി ബന്ധപ്പെട്ട് രാഹുൽ ഗാന്ധി, പ്രിയങ്ക ഗാന്ധി വാദ്ര എന്നിവർക്കെതിരെയും മറ്റ് നേതാക്കൾക്കെതിരെയും ഡൽഹി പൊലീസ് എഫ്‌ഐആർ രജിസ്റ്റർ ചെയ്തിട്ടുണ്ട്. സർക്കാർ സ്ഥാപനത്തിന്റെ പരിസരത്ത് അനുമതിയില്ലാതെ പ്രവേശിച്ചുവെന്ന പരാതിയിലാണ് കേസ്. ഇതിനിടെയാണ് ഇന്ന് വീണ്ടും പ്രതിപക്ഷം തെരുവിലിറങ്ങിയത്. അതോടെ തെരഞ്ഞെടുപ്പ് കമ്മീഷനെതിരായ പ്രതിപക്ഷ പ്രതിഷേധം ഒരു ദിവസത്തെ രാഷ്ട്രീയ പ്രതിഷേധത്തിൽ നിന്ന് കേന്ദ്രസർക്കാരും പ്രതിപക്ഷവും തമ്മിലുള്ള വലിയ രാഷ്ട്രീയ ഏറ്റുമുട്ടലായി മാറുകയാണ്.
