പ്രവാസികൾക്കും പങ്കാളിത്തം ഉറപ്പാക്കി ഓൺലൈൻ ഗ്രാമസഭകൾ വരുന്നു; തദ്ദേശ സ്ഥാപനങ്ങളുടെ പുനഃസംഘടനയും പരിഗണനയിലെന്ന് മന്ത്രി കെ.എം. ഷാജി

സംസ്ഥാനത്ത് ഇനി മുതൽ പ്രവാസികൾക്കും പങ്കുചേരാവുന്ന രീതിയിൽ ഓൺലൈൻ ഗ്രാമസഭകൾ ആരംഭിക്കുമെന്ന് തദ്ദേശ സ്വയംഭരണ വകുപ്പ് മന്ത്രി കെ.എം. ഷാജി അറിയിച്ചു. ഒരാഴ്ച മുൻപ് തന്നെ ഗ്രാമസഭയുടെ ലിങ്ക് ലഭ്യമാക്കുകയും, നേരിട്ട് നടക്കുന്ന സഭയിലെ സ്ക്രീൻ വഴി വിദേശത്തിരുന്നും പ്രവാസികൾക്ക് വികസന കാര്യങ്ങളിൽ അഭിപ്രായങ്ങൾ രേഖപ്പെടുത്താനും സാധിക്കും. തെരുവ് വിളക്കുകൾ സ്ഥാപിക്കുന്നത് പോലുള്ള പ്രാദേശിക ആവശ്യങ്ങളിൽ ദുബായ്, ഖത്തർ, റാസൽഖൈമ തുടങ്ങിയ സ്ഥലങ്ങളിലെ പ്രവാസി കൂട്ടായ്മകൾക്ക് നേരിട്ട് സംഭാവനകൾ നൽകാനും പുതിയ സാങ്കേതികവിദ്യ വഴി അവസരമൊരുങ്ങും. ഇതോടൊപ്പം, നഗരകേന്ദ്രീകൃതമായ പഞ്ചായത്തുകളെ ഉൾപ്പെടുത്തി തദ്ദേശ സ്ഥാപനങ്ങളെ ഗ്രാമപഞ്ചായത്ത്, നഗരപഞ്ചായത്ത്, മുൻസിപ്പാലിറ്റി, കോർപ്പറേഷൻ എന്നിങ്ങനെ പുനഃസംഘടിപ്പിക്കുന്ന കാര്യവും സർക്കാരിന്റെ സജീവ പരിഗണനയിലാണ്. ഇത് പഠിക്കാനായി നിലവിൽ സമിതിയൊന്നും രൂപീകരിച്ചിട്ടില്ലെങ്കിലും, ഒരു പ്രത്യേക സമിതി രൂപീകരിക്കുന്നതിനെക്കുറിച്ച് ആലോചിച്ചുവരികയാണെന്നും മന്ത്രി വ്യക്തമാക്കി.