By കാസർകോട്: കേരള കേന്ദ്ര സർവകലാശാലയിൽ ആർ.എസ്.എസ് പ്രചാരകൻ പങ്കെടുത്ത സെമിനാറിനെതിരെ വിദ്യാർത്ഥികളുടെ ശക്തമായ പ്രതിഷേധം. പരിപാടി തടഞ്ഞാൽ മൂന്ന് വർഷം തടവും പിഴയും ലഭിക്കുമെന്ന സർവകലാശാലാ അധികൃതരുടെ കർശന മുന്നറിയിപ്പ് പൂർണ്ണമായും തള്ളിക്കളഞ്ഞാണ് വിവിധ വിദ്യാർത്ഥി സംഘടനകൾ സംയുക്തമായി പ്രതിഷേധം തീർത്തത്. കാമ്പസിലെ കാവിവൽക്കരണ നീക്കങ്ങൾക്കും ആർ.എസ്.എസ് സ്വാധീനത്തിനുമെതിരെയാണ് എസ്.എഫ്.ഐ, കെ.എസ്.യു, എം.എസ്.എഫ്, എ.ഐ.എസ്.എഫ് സംഘടനകൾ ഒന്നിച്ചത്.
സർവകലാശാല ലൈബ്രറി ഹാളിൽ സംഘടിപ്പിച്ച വന്ദേമാതര സെമിനാറിൽ ആർ.എസ്.എസ് പ്രചാരകൻ ജെ. നന്ദകുമാർ മുഖ്യപ്രഭാഷകനായതാണ് പ്രതിഷേധത്തിന് കാരണം. വിദ്യാർത്ഥി മുന്നേറ്റത്തെ ചെറുക്കുന്നതിന്റെ ഭാഗമായി, പരിപാടി തടസ്സപ്പെടുത്തിയാൽ നിയമനടപടിയും തടവുശിക്ഷയും നേരിടേണ്ടിവരുമെന്ന് കാണിച്ച് അധികൃതർ മുൻകൂട്ടി സർക്കുലർ ഇറക്കിയിരുന്നു. എന്നാൽ ഈ ഭീഷണികളെല്ലാം വിദ്യാർത്ഥികൾ കാറ്റിൽപ്പറത്തുകയായിരുന്നു.
തുടർന്ന് വൻ പൊലീസ് സന്നാഹത്തിന്റെ അകമ്പടിയോടെ ലൈബ്രറി വാതിലുകൾ അടച്ചിട്ടാണ് സെമിനാർ സംഘടിപ്പിച്ചത്. പരിപാടിയിലേക്ക് പ്രവേശനം നിഷേധിക്കപ്പെട്ടതിനെ തുടർന്ന് നൂറുകണക്കിന് വിദ്യാർത്ഥികൾ ഹാളിലേക്ക് മാർച്ച് നടത്തുകയും ‘ജെ. നന്ദകുമാർ ഗോ ബാക്ക്’ വിളികളുമായി പ്രതിഷേധം ശക്തമാക്കുകയും ചെയ്തു.
ദേശീയഗാനത്തിന്റെ ചരിത്രത്തെയോ ആലാപനത്തെയോ അല്ല, മറിച്ച് വർഗീയ താത്പര്യങ്ങളോടെ കാമ്പസിൽ നടപ്പിലാക്കാൻ ശ്രമിക്കുന്ന കാവിവൽക്കരണ അജണ്ടയെയാണ് തങ്ങൾ എതിർക്കുന്നതെന്ന് വിദ്യാർത്ഥി സംഘടനകൾ വ്യക്തമാക്കി. വിദ്യാർത്ഥികളുടെ കനത്ത പ്രതിഷേധം കാരണം സെമിനാറിനിടെ മുഖ്യപ്രഭാഷകൻ ജെ. നന്ദകുമാറിന് പ്രസംഗം പലതവണ നിർത്തേണ്ടി വന്നു. പ്രസംഗത്തിനിടയിൽ ആശയക്കുഴപ്പത്തിലായ അദ്ദേഹം വാക്കുകൾ കിട്ടാതെ പ്രയാസപ്പെടുന്നതും വ്യക്തമായിരുന്നു. ഭരണകൂട ഭീഷണികളെ അതിജീവിച്ചുള്ള വിദ്യാർത്ഥികളുടെ ഈ പ്രതിഷേധം കാമ്പസിൽ വലിയ ചർച്ചയായിരിക്കുകയാണ്.
