By കാസർഗോഡ്: ഭയം കാരണം ഏറെക്കാലം മനസ്സിൽ ഒതുക്കിവെച്ചിരുന്ന ഒരു വെളിപ്പെടുത്തൽ ഒടുവിൽ കൗൺസിലിംഗിനിടെ പുറത്തുവന്നതോടെ, 16 വയസ്സുകാരിയെ പീഡിപ്പിച്ചെന്ന പരാതിയിൽ 25 വയസ്സുള്ള യുവതിക്കെതിരെ മേൽപ്പറമ്പ് പോലീസ് പോക്സോ കേസ് രജിസ്റ്റർ ചെയ്തു.
തളിപ്പറമ്പ് പുളിപ്പറമ്പ് സ്വദേശിനിയായ സ്നേഹ മെർളിനെതിരെയാണ് കേസ്. പരാതിക്കാരിയായ പെൺകുട്ടിയുടെ മാതാവിന്റെ സുഹൃത്തായ പ്രതി വീട്ടിലെത്തിയ അവസരത്തിൽ പീഡനം നടന്നുവെന്നാണ് പരാതിയിൽ പറയുന്നത്.
സംഭവത്തെക്കുറിച്ച് ഭയവും മാനസിക സമ്മർദ്ദവും മൂലം പെൺകുട്ടി ആദ്യം ആരോടും വെളിപ്പെടുത്തിയിരുന്നില്ല. പിന്നീട് കൗൺസിലിംഗിനിടെ നടത്തിയ നിർണായക വെളിപ്പെടുത്തലാണ് കേസിലേക്ക് നയിച്ചതെന്ന് പോലീസ് അറിയിച്ചു.
ഇതിനിടെ, പ്രതിക്കെതിരെ നേരത്തെയും പോക്സോ നിയമപ്രകാരം കേസുകൾ നിലവിലുണ്ടെന്ന് അന്വേഷണ ഉദ്യോഗസ്ഥർ വ്യക്തമാക്കി. സഹോദരങ്ങളായ ഒരു ആൺകുട്ടിയെയും പെൺകുട്ടിയെയും പീഡിപ്പിച്ചതുമായി ബന്ധപ്പെട്ട രണ്ട് കേസുകളും മറ്റൊരു ആൺകുട്ടിയെ പീഡിപ്പിച്ചെന്ന പരാതിയിലുള്ള മറ്റൊരു കേസും ഉൾപ്പെടെ മൂന്ന് കേസുകൾ തളിപ്പറമ്പ് പോലീസ് സ്റ്റേഷനിൽ രജിസ്റ്റർ ചെയ്തിട്ടുണ്ടെന്നാണ് വിവരം.
പരാതിയുടെ അടിസ്ഥാനത്തിൽ മേൽപ്പറമ്പ് പോലീസ് വിശദമായ അന്വേഷണം ആരംഭിച്ചിട്ടുണ്ട്. കേസുമായി ബന്ധപ്പെട്ട കൂടുതൽ വിവരങ്ങൾ ശേഖരിച്ചുവരികയാണെന്നും പോലീസ് അറിയിച്ചു.
