By ‘മുജാഹിദുകൾ ഗൂഗിൾ മാപ്പ് പോലെ, കണ്ണുമടച്ച് പോയാൽ കുണ്ടിൽ ചാടും’: സദസ്സിനെ ചിരിപ്പിച്ച് ജിഫ്രി തങ്ങളുടെ വൈറൽ പ്രസംഗം
പുന്നപ്ര: ആധുനിക മുജാഹിദ് പ്രബോധകരുടെ രീതികളെ ഗൂഗിൾ മാപ്പിന്റെ വഴിതെറ്റലുകളോട് ഉപമിച്ച് സമസ്ത കേരള ജംഇയ്യത്തുൽ ഉലമ പ്രസിഡന്റ് സയ്യിദ് മുഹമ്മദ് ജിഫ്രി മുത്തുക്കോയ തങ്ങൾ നടത്തിയ പ്രസംഗം സമൂഹമാധ്യമങ്ങളിൽ വൻ തരംഗമാകുന്നു. ആലപ്പുഴ പുന്നപ്രയിൽ സംഘടിപ്പിച്ച സമസ്ത ആശയ പ്രചാരണ-ആദർശ സമ്മേളനത്തിൽ സംസാരിക്കവെയായിരുന്നു സദസ്സിൽ ചിരിയും ഒപ്പം ആഴത്തിലുള്ള ചിന്തയും പടർത്തിയ തങ്ങളുടെ രസകരമായ പ്രസംഗം.
ഖുർആനും ഹദീസും മുൻഗാമികളായ പണ്ഡിതന്മാരുടെ വ്യാഖ്യാനങ്ങളില്ലാതെ സ്വന്തം നിലയ്ക്ക് മനസ്സിലാക്കാൻ ശ്രമിക്കുന്നവരെയാണ് തങ്ങൾ സ്വന്തം യാത്രാനുഭവവുമായി ബന്ധപ്പെടുത്തി പരിഹസിച്ചത്. മുജാഹിദുകൾ പറയുന്ന വാദങ്ങൾ കേട്ട് സാധാരണക്കാരായ വിശ്വാസികൾ ഒട്ടും ഭയപ്പെടേണ്ടതില്ലെന്ന് അദ്ദേഹം പ്രസംഗത്തിൽ വ്യക്തമാക്കി. “എല്ലാം സ്വന്തമായി ഖുർആൻ, ഹദീസ് എന്ന് പറഞ്ഞ് ഇറങ്ങിപ്പുറപ്പെട്ടാൽ ഗൂഗിൾ മാപ്പ് നോക്കി സ്ഥലം കണ്ടുപിടിക്കാൻ പോയതുപോലെയാകും അവസ്ഥ. ചിലപ്പോൾ വല്ല വലിയ കുണ്ടിലും ചെന്ന് ചാടും,” എന്നായിരുന്നു തങ്ങളുടെ പരിഹാസം.
തന്റെ സ്വന്തം ജീവിതത്തിലുണ്ടായ അനുഭവം പങ്കുവെച്ചുകൊണ്ട് അദ്ദേഹം വിഷയം കൂടുതൽ സരസമാക്കി. ഒരിക്കൽ ഒരു യാത്രയ്ക്കിടെ വലിയ ഗതാഗതക്കുരുക്കിൽ പെട്ടപ്പോൾ എളുപ്പവഴി തേടി ഗൂഗിൾ മാപ്പ് നോക്കി പോയതും, ഒടുവിൽ വലിയൊരു കരിങ്കൽ ക്വാറിയുടെ നടുവിൽ ചെന്ന് കുടുങ്ങിയതുമായ സംഭവം തങ്ങൾ വിവരിച്ചു. വലിയ ലോറികൾ മാത്രം പോകുന്ന ആ ഇടുങ്ങിയ വഴിയിൽ കാറുമായി മുന്നോട്ടുപോകാൻ കഴിയാതെ കുടുങ്ങിപ്പോയതുപോലെയാണ്, കാര്യങ്ങൾ കൃത്യമായി പഠിക്കാതെ പുതിയ പുതിയ വർത്തമാനങ്ങൾ കേട്ട് ദീനിനെ മനസ്സിലാക്കാൻ ഇറങ്ങിത്തിരിക്കുന്നവരുടെ അവസ്ഥയെന്ന് അദ്ദേഹം പറഞ്ഞു. ഇത്തരം വ്യാഖ്യാനങ്ങളുടെ പിന്നാലെ പോയാൽ ലക്ഷ്യത്തിലെത്താതെ വഴിമുട്ടിപ്പോകുമെന്ന് അദ്ദേഹം സദസ്സിനെ ഓർമ്മിപ്പിച്ചു.
മതപരമായ കാര്യങ്ങളിൽ പാരമ്പര്യ പണ്ഡിത പരമ്പര കാണിച്ചുതന്ന പാതയാണ് ഏറ്റവും സുരക്ഷിതമെന്ന് തങ്ങൾ ചൂണ്ടിക്കാട്ടി. നമ്മൾ ചെയ്യുന്ന കാര്യങ്ങളുടെ പൂർണ്ണമായ ആന്തരികാർത്ഥം ഒരുപക്ഷേ സാധാരണക്കാർക്ക് ഒറ്റനോട്ടത്തിൽ വ്യക്തമായില്ലെങ്കിലും, വിശുദ്ധരായ മഹാന്മാരുടെ കൈമാറിവന്ന പരമ്പരയിലൂടെ ലഭിച്ചതാണെങ്കിൽ അതിന് വ്യക്തമായ ലക്ഷ്യങ്ങളുണ്ടാകും. ഇക്കാലത്ത് ഉയർത്തപ്പെടുന്ന പല എതിർവാദങ്ങൾക്കും മുൻഗാമികളായ പണ്ഡിതന്മാർ പണ്ടേ വ്യക്തമായ അർത്ഥവും മറുപടികളും രേഖപ്പെടുത്തിയിട്ടുണ്ട്. അതുകൊണ്ടുതന്നെ പുതിയ പരീക്ഷണങ്ങൾക്ക് മുതിരാതെ പാരമ്പര്യ വഴി മുറുകെപ്പിടിക്കുകയാണ് വിശ്വാസികൾ ചെയ്യേണ്ടതെന്നും അദ്ദേഹം വ്യക്തമാക്കി.
മതവിശ്വാസികൾക്കെതിരായ ലിബറൽ ആശയക്കാരുടെ നിക്ഷിപ്ത താൽപര്യങ്ങൾ സ്കൂൾ പാഠ്യപദ്ധതികളിലും കലോത്സവ വേദികളിലും ഒളിച്ചുകടത്താനുള്ള ശ്രമങ്ങൾക്കെതിരെയും, വർധിച്ചുവരുന്ന ഇസ്ലാമോഫോബിയ പ്രചാരണങ്ങൾക്കെതിരെയും ശക്തമായ താക്കീതുകൾ ഉയർന്ന വേദി കൂടിയായിരുന്നു പുന്നപ്രയിലേത്. എന്നാൽ, തങ്ങളുടെ സ്വാഭാവികമായ നർമ്മ ശൈലിയിലുള്ള ഈ ‘ഗൂഗിൾ മാപ്പ്’ ഉപമയാണ് ഇപ്പോൾ സമൂഹമാധ്യമങ്ങളിൽ ചെറു ക്ലിപ്പുകളായി അതിവേഗം പ്രചരിക്കുന്നത്.
