കുമ്പളയിലെ പ്രവാസിയുടെ ‘ചക്ക പ്രണയം’ സോഷ്യൽ മീഡിയയിലും നാട്ടിലും ചർച്ചയായി

കാസർകോട്: ഗൾഫിൽ നിന്ന് മാസങ്ങൾക്കു ശേഷം നാട്ടിലെത്തിയ യുവാവിന് ഭാര്യ സ്‌നേഹത്തോടെ ഒരുക്കിയ പ്രത്യേക വിഭവം ഒടുവിൽ ആശുപത്രിവരെ എത്തിച്ച സംഭവമാണ് ഇപ്പോൾ കുമ്പളയിൽ ചിരിയോടെയും കൗതുകത്തോടെയും സംസാര വിഷയം.

കഴിഞ്ഞ ദിവസം രാത്രിയാണ് സംഭവം. വിദേശത്ത് ജോലി ചെയ്യുന്ന യുവാവ് രാത്രി രണ്ടുമണിയോടെയാണ് വീട്ടിലെത്തിയത്. ഭർത്താവിന്റെ പ്രിയപ്പെട്ട വിഭവം എന്താണെന്ന് നന്നായി അറിയാവുന്ന ഭാര്യ, ഇത്തവണ ഒരു ചെറിയ ‘വെറൈറ്റി പരീക്ഷണം’ നടത്തുകയായിരുന്നു. പണ്ടേ ചക്കയ്ക്ക് ജീവൻ കൊടുക്കുന്ന ഭർത്താവിനായി ചക്കയും ബീഫും ചേർത്ത് സ്പെഷ്യൽ കറി പാകം ചെയ്തു വെച്ചിരുന്നു.

ഗൾഫിൽ മാസങ്ങളോളം ‘ഷവർമയും കുബൂസും’ മാത്രം കണ്ടു മടുത്ത യുവാവിന്, വീട്ടിലെ ചൂടൻ ചപ്പാത്തിയോടൊപ്പം നൽകിയ ചക്ക-ബീഫ് കറിയുടെ മണവും രുചിയും കൺട്രോൾ നഷ്ടപ്പെടുത്തുകയായിരുന്നു. “ഇനി കുറച്ചു കൂടി…” എന്ന നിലയിൽ പല തവണയായി കറി അകത്താക്കിയതായാണ് വീട്ടുകാർ പറയുന്നത്.

എന്നാൽ പുലർച്ചെ നാലുമണിയോടെ കാര്യങ്ങൾ മാറി. യുവാവിന് ശ്വാസതടസ്സം പോലെയും കടുത്ത വയറുവേദനയും അനുഭവപ്പെട്ടതോടെ വീട്ടുകാർ ഭയന്ന് ആശുപത്രിയിലേക്ക് കൊണ്ടുപോയി. നെഞ്ചുവേദന പോലുള്ള അസ്വസ്ഥതയും ഉണ്ടായതോടെ കുടുംബം ഒരു ഘട്ടത്തിൽ വലിയ ആശങ്കയിലായി.

പരിശോധനകൾക്ക് ശേഷം ഡോക്ടർമാർ പറഞ്ഞ വിശദീകരണമാണ് ഒടുവിൽ എല്ലാവരെയും ചിരിപ്പിച്ചത്.
“അമിതമായി ചക്ക കഴിച്ചതിനെ തുടർന്ന് ഉണ്ടായ ഗ്യാസും വയറിലെ അസ്വസ്ഥതയുമാണ് ഹൃദയസംബന്ധമായ പ്രശ്നം പോലെ തോന്നാൻ കാരണം” എന്നായിരുന്നു ഡോക്ടർമാരുടെ വിലയിരുത്തൽ.

സംഭവം വീട്ടിൽ നിന്ന് നാട്ടിലേക്കും, നാട്ടിൽ നിന്ന് വാട്സാപ്പ് ഗ്രൂപ്പുകളിലേക്കും പടരാൻ അധിക സമയം എടുത്തില്ല. ഇപ്പോൾ യുവാവിനെ പലരും വിളിക്കുന്നത് ആരോഗ്യ വിവരങ്ങൾ അറിയാനല്ല, “ചക്ക-ബീഫ് കറിയുടെ റെസിപ്പി ഒന്ന് പറയാമോ?” എന്ന ചോദ്യവുമായാണ്.

ഇതോടെ കുമ്പള പ്രദേശത്ത് ചില പ്ലാവുകളിൽ ഉണ്ടായിരുന്ന ചക്കകൾ ‘രഹസ്യമായി അപ്രത്യക്ഷമാകുന്നുവെന്ന’ റിപ്പോർട്ടും പുറത്തുവരുന്നുണ്ട്. ചിലർ ഇതിനകം തന്നെ വീട്ടിൽ “ഗൾഫ് സ്പെഷ്യൽ ചക്ക ബീഫ്” പരീക്ഷണം തുടങ്ങിക്കഴിഞ്ഞതായും നാട്ടുകാർ തമാശയായി പറയുന്നു.

ഇനി ഇതിന്റെ റെസിപ്പിക്കായി എവിടെയും തേടി നടക്കേണ്ട സംഭവം താഴെ കൊടുത്തിട്ടുണ്ട്

കേരള സ്റ്റൈൽ ചക്ക – ബീഫ് കറി

നാട്ടിൻപുറത്തിന്റെ അസൽ രുചിയിൽ ഒരു കിടിലൻ കോമ്പിനേഷൻ

ആവശ്യമായ സാധനങ്ങൾ

ബീഫ് മാരിനേറ്റ് ചെയ്യാൻ

• ബീഫ് – 500 ഗ്രാം
• മഞ്ഞൾപ്പൊടി – ½ ടീസ്പൂൺ
• മുളകുപൊടി – 1 ടീസ്പൂൺ
• കുരുമുളകുപൊടി – ½ ടീസ്പൂൺ
• ഇഞ്ചി വെളുത്തുള്ളി പേസ്റ്റ് – 1 ടേബിൾസ്പൂൺ
• ഉപ്പ് – ആവശ്യത്തിന്

ചക്ക ഭാഗം

• പച്ച ചക്ക (കുരു നീക്കി കട്ടിയായി അരിഞ്ഞത്) – 3 കപ്പ്
• മഞ്ഞൾപ്പൊടി – ¼ ടീസ്പൂൺ
• ഉപ്പ് – അല്പം

കറിയ്ക്ക്

• തേങ്ങഎണ്ണ – 3 ടേബിൾസ്പൂൺ
• സവാള – 3 എണ്ണം (നന്നായി അരിഞ്ഞത്)
• പച്ചമുളക് – 3 എണ്ണം
• ഇഞ്ചി – ചെറിയ കഷണം
• വെളുത്തുള്ളി – 8 പല്ല്
• കറിവേപ്പില – ആവശ്യത്തിന്
• തക്കാളി – 1 എണ്ണം
• മല്ലിപ്പൊടി – 2 ടീസ്പൂൺ
• മുളകുപൊടി – 1½ ടീസ്പൂൺ
• ഗരം മസാല – 1 ടീസ്പൂൺ
• കുരുമുളകുപൊടി – 1 ടീസ്പൂൺ
• പെരുംജീരകപ്പൊടി – ½ ടീസ്പൂൺ
• തേങ്ങാക്കൊത്ത് – ¼ കപ്പ്

തയ്യാറാക്കുന്ന വിധം

1️⃣ ബീഫ് വേവിക്കുക

മാരിനേറ്റ് ചെയ്ത ബീഫിൽ അല്പം വെള്ളം ചേർത്ത് കുക്കറിൽ 5–6 വിസിൽ വരെ വേവിക്കുക.

2️⃣ ചക്ക വേവിക്കുക

ചക്ക കഷണങ്ങളിൽ അല്പം മഞ്ഞളും ഉപ്പും ചേർത്ത് പകുതി വേവിച്ച് മാറ്റിവയ്ക്കുക.

3️⃣ മസാല തയ്യാറാക്കുക

ചീനച്ചട്ടിയിൽ തേങ്ങഎണ്ണ ചൂടാക്കി തേങ്ങാക്കൊത്ത് ഇട്ട് ബ്രൗൺ നിറമാകുന്നത് വരെ വറുക്കുക.
ശേഷം സവാള, ഇഞ്ചി, വെളുത്തുള്ളി, പച്ചമുളക്, കറിവേപ്പില എന്നിവ ചേർത്ത് നന്നായി വഴറ്റുക.

തക്കാളി ചേർത്ത് ഇളക്കിയ ശേഷം മല്ലിപ്പൊടി, മുളകുപൊടി, പെരുംജീരകപ്പൊടി എന്നിവ ചേർക്കുക.

4️⃣ എല്ലാം ഒരുമിപ്പിക്കുക

ഇതിലേക്ക് വേവിച്ച ബീഫും ചക്കയും ചേർത്ത് നന്നായി ഇളക്കുക.
ആവശ്യത്തിന് വെള്ളം ചേർത്ത് ചെറിയ തീയിൽ 10–15 മിനിറ്റ് വേവിക്കുക.

അവസാനം കുരുമുളകുപൊടി, ഗരംമസാല, കറിവേപ്പില എന്നിവ ചേർത്ത് തീ ഓഫ് ചെയ്യുക.