‘പൈസയില്ലാത്ത ബസിൽ സ്ത്രീകൾ തള്ളിക്കയറുന്നു’ മന്ത്രി മന്ത്രി സി.പി. ജോണിന്റെ വാവിട്ട പ്രസംഗം വിവാദത്തിൽ , സ്ത്രീകളെ അടിച്ചോടിച്ചിട്ടില്ലെന്ന് ,അതുതന്നെ ഭാഗ്യം എന്ന് വിമർശനം

തിരുവനന്തപുരം: സ്ത്രീകളെ ലക്ഷ്യമിട്ട് നടത്തിയ പരാമർശങ്ങളുടെ പേരിൽ ഗതാഗത മന്ത്രി സി.പി. ജോൺ കടുത്ത വിവാദത്തിൽ. “പൈസയില്ലാത്ത ട്രാൻസ്പോർട്ട് ബസിൽ സ്ത്രീകൾ തള്ളിക്കയറുന്നു”, “മക്കളെ ഫീസ് നൽകി സ്വകാര്യ സ്കൂളിൽ പഠിപ്പിക്കുന്നു”, “അസുഖം വന്നാൽ സർക്കാർ ആശുപത്രിയുടെ വരാന്തയിൽ കിടക്കുന്നു” തുടങ്ങിയ പരാമർശങ്ങളാണ് മന്ത്രിക്കെതിരെ വ്യാപക പ്രതിഷേധത്തിന് വഴിവെച്ചത്.

കേരള ബസ് ട്രാൻസ്പോർട്ട് അസോസിയേഷന്റെ സംസ്ഥാന സമ്മേളനം പാലക്കാട് ഉദ്ഘാടനം ചെയ്യുന്നതിനിടെയായിരുന്നു മന്ത്രിയുടെ പ്രസംഗം. സർക്കാർ നടപ്പാക്കിയ ‘പ്രിയദർശിനി’ സൗജന്യ ബസ് യാത്രാ പദ്ധതിയുടെ ഗുണഭോക്താക്കളായ സ്ത്രീകളെ അപമാനിക്കുന്ന തരത്തിലാണ് പ്രസംഗമെന്ന വിമർശനം ഉയർന്നത്.

‘തള്ളിക്കയറുന്ന സ്ത്രീകൾ’, ‘പൈസയില്ലാത്തവർ’… മന്ത്രിയുടെ വിവാദ വാക്കുകൾ

പ്രസംഗത്തിൽ മന്ത്രി പറഞ്ഞത്, കൂലി കൊടുക്കേണ്ടതില്ലാത്ത സർക്കാർ ബസുകളിൽ സ്ത്രീകൾ “തള്ളിക്കയറുകയാണ്” എന്നായിരുന്നു. അതേസമയം, സ്വന്തം കുട്ടികളെ സർക്കാർ സ്കൂളിൽ ചേർക്കാതെ ഫീസ് നൽകി സ്വകാര്യ സ്കൂളിൽ പഠിപ്പിക്കുന്നുവെന്നും, അസുഖം വന്നാൽ സ്വകാര്യ ആശുപത്രികളെ ഒഴിവാക്കി സർക്കാർ ആശുപത്രികളുടെ വരാന്തയിൽ കിടക്കാൻ തയ്യാറാകുന്നുവെന്നും മന്ത്രി പറഞ്ഞു.

കേരളത്തിലെ ജനങ്ങളുടെ, പ്രത്യേകിച്ച് സ്ത്രീകളുടെ പൊതുഗതാഗതം, പൊതുവിദ്യാഭ്യാസം, പൊതുജനാരോഗ്യം എന്നിവയോടുള്ള സമീപനമാണ് തന്നെ അതിശയിപ്പിക്കുന്നതെന്നും മന്ത്രി പ്രസംഗത്തിൽ ആവർത്തിച്ചു.

സ്ത്രീകളുടെ സാമ്പത്തിക സ്വാതന്ത്ര്യവും സുരക്ഷിത യാത്രയും ലക്ഷ്യമിട്ട് സർക്കാർ നടപ്പാക്കിയ പ്രധാന പദ്ധതികളിലൊന്നാണ് പ്രിയദർശിനി സൗജന്യ ബസ് യാത്രാ പദ്ധതി. കൂടുതൽ സ്ത്രീകളെ പൊതുഗതാഗതത്തിലേക്ക് ആകർഷിക്കുകയും കുടുംബങ്ങളുടെ സാമ്പത്തിക ഭാരം കുറയ്ക്കുകയും ചെയ്യുക എന്നതായിരുന്നു പദ്ധതിയുടെ ലക്ഷ്യം.

എന്നാൽ അതേ പദ്ധതിയുടെ ചുമതലയുള്ള വകുപ്പ് കൈകാര്യം ചെയ്യുന്ന മന്ത്രി തന്നെ, പദ്ധതി ഉപയോഗിക്കുന്ന സ്ത്രീകളെ “പൈസയില്ലാത്തവർ”, “തള്ളിക്കയറുന്നവർ” എന്ന രീതിയിൽ വിശേഷിപ്പിച്ചതാണ് ഏറ്റവും വലിയ വിരോധാഭാസമെന്നാണ് വിമർശനം.

സർക്കാർ തന്നെ ജനങ്ങളോട് ഉപയോഗിക്കാൻ ആവശ്യപ്പെട്ട ഒരു പദ്ധതിയുടെ ഗുണഭോക്താക്കളെ, പദ്ധതിയുടെ മന്ത്രി തന്നെ പൊതുവേദിയിൽ പരിഹസിക്കുന്ന തരത്തിലായിരുന്നു പ്രസംഗമെന്ന് പ്രതിപക്ഷവും സാമൂഹിക മാധ്യമങ്ങളും ആരോപിച്ചു.

വിവാദം കത്തിയപ്പോൾ ന്യായീകരണവുമായി മന്ത്രി

പരാമർശങ്ങൾക്കെതിരെ പ്രതിഷേധം ശക്തമായതോടെ മന്ത്രി വിശദീകരണവുമായി രംഗത്തെത്തി.തന്റെ പ്രസംഗം തെറ്റിദ്ധരിക്കപ്പെട്ടതാണെന്നും, സ്ത്രീകളെ അപമാനിക്കാനല്ല ഉദ്ദേശിച്ചതെന്നും മന്ത്രി പറഞ്ഞു. സ്വയം ആത്മ വിമർശനമാണ് നടത്തിയതെന്നും

പ്രിയദർശിനി പദ്ധതിയുടെ വിജയം സർക്കാരിന്റെ നേട്ടമല്ല, കേരളത്തിൽ ഇന്നും നിലനിൽക്കുന്ന ദാരിദ്ര്യത്തിന്റെ പ്രതിഫലനമാണെന്നാണ് താൻ പറഞ്ഞതെന്ന് മന്ത്രി വിശദീകരിച്ചു.ഒരു ബസ് ടിക്കറ്റ് വാങ്ങാൻ പോലും കഴിയാത്തവിധം സാമ്പത്തിക ബുദ്ധിമുട്ട് അനുഭവിക്കുന്ന നിരവധി ആളുകൾ ഇന്നും കേരളത്തിലുണ്ടെന്നും, ആ യാഥാർഥ്യത്തിലേക്ക് സർക്കാരും സമൂഹവും കണ്ണുതുറക്കണമെന്ന സന്ദേശമാണ് തന്റെ പ്രസംഗത്തിന്റെ ഉദ്ദേശ്യമെന്നും അദ്ദേഹം പറഞ്ഞു.

അതുപോലെ സർക്കാർ ആശുപത്രികളിൽ രോഗികൾക്ക് വരാന്തയിൽ കിടക്കേണ്ടിവരുന്ന സാഹചര്യം പൊതുജനാരോഗ്യ രംഗത്തിന്റെ വെല്ലുവിളിയാണെന്നും, സർക്കാർ സ്കൂളുകൾ സൗജന്യമാണെങ്കിലും പല കുടുംബങ്ങളും കടം വാങ്ങിയും കഷ്ടപ്പെട്ടും സ്വകാര്യ സ്കൂളുകളിലേക്ക് കുട്ടികളെ അയയ്ക്കുന്നത് അവരുടെ പ്രതീക്ഷകളുടെ പ്രതിഫലനമാണെന്നും മന്ത്രി വിശദീകരിച്ചു.പൊതുഗതാഗതം, പൊതുജനാരോഗ്യം, പൊതുവിദ്യാഭ്യാസം എന്നീ മൂന്ന് മേഖലകളെയും കൂടുതൽ ശക്തിപ്പെടുത്തണമെന്ന ആശയമാണ് പ്രസംഗത്തിൽ മുന്നോട്ടുവെച്ചതെന്നും, തന്റെ വാക്കുകൾ മറ്റൊരു രീതിയിൽ വ്യാഖ്യാനിക്കപ്പെട്ടുവെന്നുമാണ് മന്ത്രിയുടെ വിശദീകരണം.

ന്യായീകരണം വിമർശനം ശമിപ്പിച്ചില്ല

എന്നാൽ മന്ത്രിയുടെ വിശദീകരണം വന്നിട്ടും വിവാദം അവസാനിച്ചിട്ടില്ല.

കാരണം, പ്രസംഗത്തിന്റെ പൂർണ്ണരൂപത്തിൽ സ്ത്രീകളെ കുറിച്ച് ഉപയോഗിച്ച ഭാഷയും പ്രയോഗങ്ങളും തന്നെയാണ് പ്രതിഷേധത്തിന് കാരണമായതെന്നാണ് വിമർശനം. “പൈസയില്ലാത്ത ബസിൽ സ്ത്രീകൾ തള്ളിക്കയറുന്നു”, “സ്വകാര്യ സ്കൂളിൽ കുട്ടികളെ പഠിപ്പിക്കുന്നു”, “സർക്കാർ ആശുപത്രിയുടെ വരാന്തയിൽ കിടക്കുന്നു” തുടങ്ങിയ പരാമർശങ്ങൾ ഒരു സാമൂഹിക നിരീക്ഷണത്തിന്റെ പരിധി കടന്ന്, ദാരിദ്ര്യത്തെയും സ്ത്രീകളുടെ ജീവിത സാഹചര്യങ്ങളെയും പരിഹാസത്തിനും അധിക്ഷേപത്തിനും വിധേയമാക്കിയെന്ന വിമർശനമാണ് വിവിധ കോണുകളിൽ നിന്ന് ഉയരുന്നത്.

ഒരു ക്ഷേമപദ്ധതി ഉപയോഗിക്കുന്നത് കുറ്റമല്ല; മറിച്ച് അത് ആ പദ്ധതിയുടെ ലക്ഷ്യം പൂർത്തീകരിക്കപ്പെടുന്നതിന്റെ തെളിവാണ്. അത്തരമൊരു പദ്ധതിയുടെ ഗുണഭോക്താക്കളെ തന്നെ പൊതുവേദിയിൽ അപമാനിക്കുന്ന തരത്തിൽ സംസാരിച്ചത് ഒരു മന്ത്രിയിൽ നിന്ന് പ്രതീക്ഷിക്കാനാകാത്ത സമീപനമാണെന്നും വിമർശകർ ചൂണ്ടിക്കാട്ടുന്നു.

‘സ്ത്രീകളെ അടിച്ചോടിച്ചിട്ടില്ലെന്ന് മാത്രമാണ് ബാക്കി’ എന്ന വിമർശനം

മന്ത്രിയുടെ പിന്നാലെയുള്ള വിശദീകരണത്തിൽ ദാരിദ്ര്യത്തെക്കുറിച്ചുള്ള ആശങ്കയാണ് ഉദ്ദേശിച്ചതെന്ന് പറയുന്നുണ്ടെങ്കിലും, ആദ്യ പ്രസംഗത്തിൽ സ്ത്രീകളെ വിശേഷിപ്പിച്ച രീതി തന്നെയാണ് പൊതുജനങ്ങളിൽ ശക്തമായ പ്രതിഷേധത്തിന് കാരണമായത്.

ക്ഷേമപദ്ധതി ഉപയോഗിക്കുന്ന സ്ത്രീകളെ ‘തള്ളിക്കയറുന്നവർ’, ‘പൈസയില്ലാത്തവർ’ എന്നിങ്ങനെ വിശേഷിപ്പിച്ച പ്രസംഗം, സാമൂഹിക ബോധവൽക്കരണമെന്നതിനേക്കാൾ അവരെ പൊതുവേദിയിൽ അപമാനിക്കുന്നതായാണ് പലരും വിലയിരുത്തുന്നത്.

“സ്ത്രീകളെ അടിച്ചോടിച്ചിട്ടില്ലെന്ന് മാത്രമാണ് മന്ത്രി ചെയ്യാത്തത്; ബാക്കിയെല്ലാം പ്രസംഗത്തിലൂടെ പറഞ്ഞുകഴിഞ്ഞു.”