By ഇഷ്ടപ്പെട്ട കറിയില്ലെന്ന് പറഞ്ഞ് തർക്കം; മലപ്പുറം വണ്ടൂരിൽ ഭാര്യയെ ഭർത്താവ് കുത്തിക്കൊലപ്പെടുത്തി
മലപ്പുറം: ഉച്ചഭക്ഷണത്തിന് ഇഷ്ടപ്പെട്ട കറി ഉണ്ടാക്കിയില്ലെന്ന നിസ്സാര കാരണത്തെച്ചൊല്ലിയുണ്ടായ തർക്കത്തിനൊടുവിൽ ഭർത്താവ് ഭാര്യയെ കുത്തിക്കൊലപ്പെടുത്തി. വണ്ടൂർ കാപ്പിൽ പാറശ്ശേരി സ്വദേശിയായ ഫസീലയാണ് (38) കൊല്ലപ്പെട്ടത്. സംഭവവുമായി ബന്ധപ്പെട്ട് ഭർത്താവ് റഷീദിനെ (48) പൊലീസ് കസ്റ്റഡിയിലെടുത്തു.
ഇന്ന് ഉച്ചയോടെയാണ് നാടിനെ നടുക്കിയ ഈ ദാരുണ സംഭവം അരങ്ങേറിയത്. അടുക്കളയിൽ ഭക്ഷണം തയാറാക്കുന്ന തിരക്കിലായിരുന്നു ഫസീല. ഉച്ചഭക്ഷണ സമയത്ത് മേശയിലെത്തിയ കറിയെച്ചൊല്ലി റഷീദ് അതൃപ്തി പ്രകടിപ്പിച്ചതോടെയാണ് പ്രശ്നങ്ങളുടെ തുടക്കം. തനിക്കിഷ്ടപ്പെട്ട കറി ഉണ്ടാക്കിയില്ലെന്ന് ആരോപിച്ച് റഷീദ് ഭാര്യയുമായി തുടങ്ങിയ വാക്കുതർക്കം മിനിറ്റുകൾക്കകം രൂക്ഷമായ വഴക്കിലേക്ക് വഴിമാറുകയായിരുന്നു.
നിയന്ത്രണം വിട്ട റഷീദ് വീട്ടിലുണ്ടായിരുന്ന കത്തിയെടുത്ത് ഫസീലയുടെ നെഞ്ചിന് താഴെയായി ആഴത്തിൽ കുത്തിപ്പരിക്കേൽപ്പിക്കുകയായിരുന്നു. രക്തത്തിൽ കുളിച്ചുവീണ ഫസീലയെ ഉടൻതന്നെ ആശുപത്രിയിൽ എത്തിക്കാൻ ശ്രമിച്ചെങ്കിലും അപ്പോഴേക്കും മരണം സംഭവിച്ചിരുന്നു.
റഷീദ് പതിവായി മദ്യപിച്ചെത്തി വീട്ടിൽ നിരന്തരം പ്രശ്നങ്ങളുണ്ടാക്കാറുണ്ടെന്ന് നാട്ടുകാർ പറയുന്നു. കൊലപാതകം നടക്കുമ്പോൾ ഇയാൾ മദ്യലഹരിയിലായിരുന്നോ എന്നതുൾപ്പെടെയുള്ള കാര്യങ്ങൾ പൊലീസ് പരിശോധിച്ച് വരികയാണ്. ഫസീലയുടെ മൃതദേഹം പോസ്റ്റുമോർട്ടം നടപടികൾക്കായി വണ്ടൂരിലെ സ്വകാര്യ ആശുപത്രിയിലേക്ക് മാറ്റി. സംഭവത്തിൽ കേസെടുത്ത പൊലീസ് വിശദമായ അന്വേഷണം ആരംഭിച്ചിട്ടുണ്ട്.
