ഓപ്പറേഷൻ തൂഫാനിൽ കാസർകോട് വിറച്ച മാന്യന്മാരായ സുന്ദരന്മാർ : എം.ഡി.എം.എയുമായി യുവാക്കൾ കുടുങ്ങിയപ്പോൾ പുറത്തുവന്നത് ഞെട്ടിക്കുന്ന വിവരങ്ങൾ. ഫോൺ ചാറ്റ് കണ്ട് അമ്പരന്നു പോലീസ് .

ഇൻസ്റ്റാഗ്രാമിലെ തൊലി വെളുപ്പിനപ്പുറം ..ഓപ്പറേഷൻ തൂഫാനിൽ കാസർകോട് വിറച്ച മാന്യന്മാരായ സുന്ദരന്മാർ : എം.ഡി.എം.എയുമായി യുവാക്കൾ കുടുങ്ങിയപ്പോൾ പുറത്തുവന്നത് ഞെട്ടിക്കുന്ന വിവരങ്ങൾ. ഫോൺ ചാറ്റ് കണ്ട് അമ്പരന്നു പോലീസ് .

കാസർകോട്:  കാസർകോട് ജില്ലയിൽ ലഹരി മാഫിയയുടെ വേരറുക്കാൻ പോലീസ് നടത്തുന്ന ‘ഓപ്പറേഷൻ തൂഫാൻ’ രാത്രികാല പരിശോധനയിൽ വൻ മയക്കുമരുന്ന് വേട്ട. കുമ്പളയിലും ഹോസ്ദുർഗിലുമായി നടന്ന വിവിധ റെയ്ഡുകളിൽ മാരക മയക്കുമരുന്നായ എം.ഡി.എം.എയും ബൈക്കുകളും കാറും സഹിതം പ്രതികൾ വലയിലായി. പോലീസിനെ വെട്ടിച്ച് സിനിമാറ്റിക് സ്റ്റൈലിൽ ഓടി രക്ഷപ്പെടാൻ നോക്കിയ പ്രതികളെ സാഹസികമായാണ് പോലീസ് സംഘം പിടികൂടിയത്. കാണാൻ നല്ല ആരോഗ്യവും ലുക്കുമുള്ള ചെറുപ്പക്കാരാണ് പിടിയിലായവരെല്ലാം എന്നതും ഇതിന്റെ പിന്നാമ്പുറ കഥകളുമാണ് ഇപ്പോൾ നാട്ടുകാരെ അമ്പരപ്പിക്കുന്നത്.

സിനിമയെ വെല്ലുന്ന ചേസും വീഴ്ചയും

പടന്നക്കാട് ദേശീയപാതയിൽ നിർമ്മാണത്തിലിരിക്കുന്ന മേൽപ്പാലത്തിന് സമീപം ഹോസ്ദുർഗ് സബ് ഇൻസ്പെക്റ്റർ ജിതിൻ കെ.വി-യുടെ നേതൃത്വത്തിൽ വാഹന പരിശോധന നടത്തുന്നതിനിടയിലാണ് നാടകീയ രംഗങ്ങൾ അരങ്ങേറിയത്. കാഞ്ഞങ്ങാട് ഭാഗത്ത് നിന്നും വന്ന വെള്ള കാർ പോലീസ് പരിശോധന കണ്ട് പെട്ടെന്ന് റോഡരികിലേക്ക് നിർത്തി. തുടർന്ന് കാറിലുണ്ടായിരുന്ന പെരിങ്ങോം സ്വദേശി അനസ്.കെ.വി (27), ചെറുപുഴ സ്വദേശി തബ്ഷീർ എം.ടി.പി (33) എന്നിവർ ചാടിയിറങ്ങി സർവീസ് റോഡിലേക്ക് ഓടുകയായിരുന്നു. എന്നാൽ ഓട്ടത്തിനിടയിൽ കൺഫ്യൂഷനായ ഒരു പ്രതി റോഡിൽ തെന്നിവീണു. ഒട്ടും സമയം കളയാതെ പോലീസ് സംഘം പിന്നാലെ ഓടി ഇവരെ രണ്ടുപേരെയും പൊക്കുകയായിരുന്നു. കാറിന്റെ ഡാഷ് ബോർഡിൽ സൂക്ഷിച്ചിരുന്ന ‘കൂൾ ലിപ്’ പാക്കറ്റിനുള്ളിൽ ഒളിപ്പിച്ച നിലയിലായിരുന്നു 1.140 ഗ്രാം എം.ഡി.എം.എ കണ്ടെടുത്തത്.

മൊബൈൽ തുറന്നപ്പോൾ പോലീസും ഞെട്ടി: ഒരേസമയം നാല് പ്രണയവും മയക്കുമരുന്ന് ചാറ്റുകളും

പിടിയിലായ പ്രതികളുടെ ഫോണുകൾ പരിശോധിച്ച പോലീസിന് ലഹരി ഇടപാടുകൾക്ക് പുറമെ കൗതുകകരമായ മറ്റൊരു വിവരവും ലഭിച്ചു. കൂട്ടത്തിലെ ഒരു ‘ലഹരി സുന്ദരന്’ ഒരേസമയം നാല് പെൺകുട്ടികളുമായാണ് പ്രണയമുള്ളത്. നാലുപേരെയും ഒരേസമയം പ്രണയവലയിലാക്കി കൊണ്ടുനടന്ന പ്രതിയുടെ ചാറ്റുകൾ കണ്ട് പോലീസ് പോലും അല്പം അന്തിച്ചുപോയി. എന്നാൽ കാര്യങ്ങൾ അവിടെയും തീർന്നില്ല, ഇവരുടെ സുഹൃത്തുക്കളിൽ ഭൂരിഭാഗം പേരും ഇത്തരം മയക്കുമരുന്ന് സ്ഥിരമായി ഉപയോഗിക്കുന്നവരാണെന്നാണ് ഫോണിലെ ചാറ്റുകൾ വ്യക്തമാക്കുന്നത്. ഇതിലും ഞെട്ടിക്കുന്ന കാര്യം, ഈ പ്രതികളിൽ ഒരാളുടെ കുടുംബാംഗങ്ങൾ വരെ ലഹരിമരുന്ന് ഉപയോഗിക്കുന്നവരുടെ കൂട്ടത്തിലുണ്ടെന്നതാണ്. ലഹരി മാഫിയ കുടുംബങ്ങളിലേക്ക് വരെ എത്രത്തോളം ആഴത്തിൽ പടർന്നിട്ടുണ്ടെന്നതിന്റെ തെളിവാണ് ഇത്.

വലവിരിച്ചത് ഇങ്ങനെ: നൂറോളം പേരെ ചോദ്യം ചെയ്തതിലൂടെ കിട്ടിയ വഴിത്തിരിവ്

ഈ പ്രധാന പ്രതികളിലേക്ക് പോലീസ് എത്തിയതിന് പിന്നിൽ കൃത്യമായ പ്ലാനിങ് ഉണ്ടായിരുന്നു. കാസർകോട് ജില്ലയിൽ കഴിഞ്ഞ ദിവസങ്ങളിൽ നൂറോളം കടുത്ത പരിശോധനകളാണ് പോലീസ് നടത്തിയത്. ഇതിൽ എം.ഡി.എം.എ ഉപയോഗിക്കുന്ന നിരവധി പേരെ പോലീസ് പിടികൂടി ചോദ്യം ചെയ്തിരുന്നു. ഇവർക്കെതിരെ എൻ.ഡി.പി.എസ് ആക്ട് സെക്ഷൻ 27 പ്രകാരം (ലഹരി ഉപയോഗിച്ചതിന്) കേസ് ചാർജ് ചെയ്ത് പിന്നീട് വിട്ടയക്കുകയാണുണ്ടായത്. എന്നാൽ ഇവരെ വിശദമായി ചോദ്യം ചെയ്തപ്പോഴാണ് തങ്ങൾക്ക് മയക്കുമരുന്ന് എത്തിച്ചു നൽകുന്ന പ്രധാന കണ്ണികളെക്കുറിച്ചുള്ള വിവരങ്ങൾ പോലീസിന് ലഭിക്കുന്നത്. ഈ വിവരങ്ങളുടെ അടിസ്ഥാനത്തിലാണ് കാത്തിരുന്ന് പ്രധാന പ്രതികളെ പോലീസ് വലയിലാക്കിയത്.

മറ്റു കേസുകൾ ഇങ്ങനെ:

ഈ അന്വേഷണങ്ങളുടെ തുടർച്ചയായി ഞായറാഴ്ച പുലർച്ചെ ഒന്നിന് കോയിപ്പാടി നാരായണമംഗലം റോഡിൽ ബൈക്കിലിരിക്കുകയായിരുന്ന കോയിപ്പാടി സ്വദേശി ബിനീഷ് കെ (29) 0.92 ഗ്രാം എം.ഡി.എം.എയുമായി കുമ്പള പോലീസിന്റെ പിടിയിലായി. തുടർന്ന് കാഞ്ഞങ്ങാട് പുഞ്ചാവി ജുമാ മസ്ജിദ് കമാനത്തിന് സമീപം വെച്ച് പുഞ്ചാവി സ്വദേശി തൽഹത്ത്.പി (27) എന്നയാളെ 0.370 ഗ്രാം എം.ഡി.എം.എയുമായി ഹോസ്ദുർഗ് പോലീസ് പൊക്കി.

ഇയാൾ നൽകിയ മൊഴിയുടെ അടിസ്ഥാനത്തിൽ പുലർച്ചെ 01:20 ഓടെ പടന്നക്കാട് കെ.എസ്.ഇ.ബി പരിസരത്ത് പോലീസ് മിന്നൽ പരിശോധന നടത്തിയപ്പോൾ, പോലീസിനെ കണ്ട് ഭയന്ന് കൈവശമുണ്ടായിരുന്ന 0.87 ഗ്രാം എം.ഡി.എം.എയും ബൈക്കും ഉപേക്ഷിച്ച് കരുവളം സ്വദേശി നജീബുദ്ധീൻ എസ്.കെ (27) ഇരുട്ടിലേക്ക് ഓടിമറയുകയായിരുന്നു. ഇയാൾക്കായുള്ള തിരച്ചിൽ പോലീസ് ശക്തമാക്കിയിട്ടുണ്ട്.

പിടിച്ചെടുത്ത മയക്കുമരുന്നുകളും വാഹനങ്ങളും മൊബൈൽ ഫോണുകളും പോലീസ് കസ്റ്റഡിയിലെടുത്തു. പ്രതികൾക്കെതിരെ എൻ.ഡി.പി.എസ് ആക്ട് പ്രകാരം കേസ് രജിസ്റ്റർ ചെയ്ത് തുടർനടപടികൾ സ്വീകരിച്ചു വരുന്നു. ഹോസ്ദുർഗ് എസ്‌.ഐ ജിതിൻ കെ.വി-ക്കൊപ്പം എസ്‌.ഐ നീതു തച്ചഞ്ചേരി, പ്രൊബേഷൻ എസ്‌.ഐ അഞ്ജലി, സി.പി.ഒ ഹരീഷ് എന്നിവരും ലഹരി വേട്ട സംഘത്തിൽ ഉണ്ടായിരുന്നു.