By തിരുവനന്തപുരം: അന്താരാഷ്ട്ര യോഗാദിനാചരണത്തിന്റെ ഒരുക്കങ്ങൾ വിലയിരുത്താൻ ഗവർണർ രാജേന്ദ്ര വിശ്വനാഥ് അർലേക്കർ വിളിച്ച പ്രത്യേക യോഗം പുതിയ രാഷ്ട്രീയ വിവാദങ്ങൾക്ക് വഴിവെച്ചിരിക്കുകയാണ്. വിവിധ സർക്കാർ വകുപ്പുകളിലെ ഉന്നത ഉദ്യോഗസ്ഥരും സർവകലാശാല വൈസ് ചാൻസലർമാരും നാഷണൽ ഹെൽത്ത് മിഷൻ സംസ്ഥാന മേധാവിയും പങ്കെടുത്ത യോഗത്തിൽ, കോളേജുകളിലും സർവകലാശാലകളിലും യോഗാദിനാചരണം ഉറപ്പാക്കാൻ പ്രത്യേക സർക്കുലർ പുറത്തിറക്കണമെന്ന് ഉന്നത വിദ്യാഭ്യാസ പ്രിൻസിപ്പൽ സെക്രട്ടറി ബി. അശോകിന് ഗവർണർ നിർദേശം നൽകിയതായാണ് വിവരം.
സംഭവം പുറത്തുവന്നതോടെ, “കേരളം ഭരിക്കുന്നത് ഗവർണറോ അതോ ജനങ്ങൾ തെരഞ്ഞെടുത്ത സർക്കാരോ?” എന്ന ചോദ്യമാണ് രാഷ്ട്രീയ കേരളത്തിൽ ഉയരുന്നത്. സംസ്ഥാന സർക്കാരിന്റെ ഭരണപരമായ ഉത്തരവാദിത്തത്തിലുള്ള വിഷയങ്ങളിൽ തുടർച്ചയായി ഗവർണർ നേരിട്ട് ഇടപെടുന്നതായി വിമർശകർ ആരോപിക്കുന്നു. മന്ത്രിമാരും ജനങ്ങൾ തെരഞ്ഞെടുത്ത ഭരണകൂടവും നോക്കുകുത്തികളായി മാറുന്ന സാഹചര്യമാണ് രൂപപ്പെടുന്നതെന്ന ആക്ഷേപവും ശക്തമാണ്.
സർക്കാർ നടത്തേണ്ട പരിപാടികളുടെ ആസൂത്രണവും നിർവഹണവും വിലയിരുത്താൻ ഗവർണർ നേരിട്ട് ഉദ്യോഗസ്ഥരുടെ യോഗം വിളിക്കുന്നത് ഭരണഘടനാ കീഴ്വഴക്കങ്ങളുടെ ലംഘനമാണെന്ന് പ്രതിപക്ഷ നേതാവ് പിണറായി വിജയൻ ആരോപിച്ചു. സർക്കാർ സംവിധാനങ്ങളെ മറികടന്ന് സമാന്തര ഭരണകേന്ദ്രമായി രാജ്ഭവൻ പ്രവർത്തിക്കുന്നുവെന്ന വിമർശനവും അദ്ദേഹം ഉയർത്തി.
സർവകലാശാലകളിലെ നിയമനങ്ങളിലും സെനറ്റ് അംഗങ്ങളുടെ നാമനിർദേശങ്ങളിലും ഗവർണറുടെ സജീവ ഇടപെടൽ ഇതിനകം തന്നെ വിവാദമായിരിക്കുകയാണ്. കാർഷിക സർവകലാശാല വൈസ് ചാൻസലർ നിയമന വിഷയത്തിലും ഗവർണറുടെ നേരിട്ടുള്ള ഇടപെടൽ ചർച്ചയായിരുന്നു. അതിനിടെയാണ് സർക്കാർ വകുപ്പുകളിലെ ഉദ്യോഗസ്ഥരെ നേരിട്ട് വിളിച്ചുചേർത്ത് യോഗാദിനാചരണവുമായി ബന്ധപ്പെട്ട നിർദേശങ്ങൾ നൽകിയത്.
കേന്ദ്ര സർക്കാരിന്റെയും സംഘപരിവാർ ആശയങ്ങളുടെയും അജണ്ടകൾ സംസ്ഥാനത്ത് നടപ്പാക്കാനുള്ള ശ്രമത്തിന്റെ ഭാഗമായാണ് ഇത്തരം ഇടപെടലുകളെ പലരും കാണുന്നത്. ദേശീയ തലത്തിൽ സംഘപരിവാർ മുന്നോട്ട് വയ്ക്കുന്ന പദ്ധതികൾക്കും പരിപാടികൾക്കും സംസ്ഥാന സർക്കാരിന്റെ ഔദ്യോഗിക സംവിധാനങ്ങളെ ഉപയോഗപ്പെടുത്തി പ്രചാരണം നൽകാൻ ശ്രമിക്കുന്നുവെന്ന ആരോപണവും ഉയരുന്നുണ്ട്.
ഏറ്റവും ശ്രദ്ധേയമായ കാര്യം, ഉന്നത വിദ്യാഭ്യാസ വകുപ്പ് പ്രിൻസിപ്പൽ സെക്രട്ടറി ഉൾപ്പെടെയുള്ള ഉന്നത ഉദ്യോഗസ്ഥർ യോഗത്തിൽ പങ്കെടുത്തതാണ്. വകുപ്പ് മന്ത്രിയോ മുഖ്യമന്ത്രിയുടെയോ അറിവോടെയാണോ ഉദ്യോഗസ്ഥർ പങ്കെടുത്തത് എന്ന കാര്യത്തിൽ ഇതുവരെ വ്യക്തത വന്നിട്ടില്ല. ഇക്കാര്യത്തിൽ സർക്കാരിന്റെ ഔദ്യോഗിക വിശദീകരണത്തിനായാണ് രാഷ്ട്രീയ നിരീക്ഷകരും പൊതുസമൂഹവും കാത്തിരിക്കുന്നത്.
ഒരു ജനാധിപത്യ സംവിധാനത്തിൽ ഭരണനിർവഹണ ചുമതല വഹിക്കുന്നത് ജനങ്ങൾ തെരഞ്ഞെടുത്ത സർക്കാരാണ്. എന്നാൽ കഴിഞ്ഞ കുറച്ച് മാസങ്ങളായി സംസ്ഥാന ഭരണത്തിന്റെ വിവിധ മേഖലകളിൽ ഗവർണറുടെ വർധിച്ചുവരുന്ന ഇടപെടലുകൾ ജനാധിപത്യ സംവിധാനത്തിന്റെ അടിസ്ഥാന തത്വങ്ങൾക്കെതിരാണോ എന്ന ചോദ്യം ശക്തമാവുകയാണ്. മുഖ്യമന്ത്രി, ഉന്നത വിദ്യാഭ്യാസ മന്ത്രി, യു.ഡി.എഫ്. നേതൃത്വം എന്നിവർ ഈ വിഷയത്തിൽ എന്ത് നിലപാട് സ്വീകരിക്കും എന്നതാണ് ഇനി രാഷ്ട്രീയ കേരളം ഉറ്റുനോക്കുന്നത്.
