കാസർകോട് നഗരത്തിലെ ഓട്ടോ തൊഴിലാളികൾക്ക് നല്ല പേരുണ്ട്; പക്ഷേ ചിലരുടെ കണ്ണാടി നോട്ടങ്ങൾ സ്ത്രീകളെ ഭയപ്പെടുത്തുന്നു – യാത്രയ്ക്കിടെ അനുഭവിക്കുന്ന മാനസിക പീഡനത്തിനെതിരെ ശബ്ദമുയരുന്നു

കാസർകോട്: രാത്രിയെന്നോ പകലെന്നോ ഭേദമില്ലാതെ അധ്വാനിച്ച് യാത്രക്കാരെ സുരക്ഷിതമായി ലക്ഷ്യസ്ഥാനങ്ങളിലെത്തിക്കുന്ന ആയിരക്കണക്കിന് ഓട്ടോറിക്ഷാ തൊഴിലാളികളാണ് കാസർകോട് നഗരത്തിന്റെ ഗതാഗത മേഖലയുടെ നട്ടെല്ല്. അവരുടെ ആത്മാർത്ഥമായ സേവനവും മാന്യമായ പെരുമാറ്റവുമാണ് പൊതുസമൂഹത്തിൽ ഓട്ടോ തൊഴിലാളികൾക്ക് വലിയ അംഗീകാരം നേടിക്കൊടുത്തത്. എന്നാൽ, ഈ നല്ല പേരിന് മങ്ങലേൽപ്പിക്കുന്ന ചില സംഭവങ്ങളാണ് ഇപ്പോൾ സ്ത്രീകളുടെ ഇടയിൽ ആശങ്കയ്ക്കും പ്രതിഷേധത്തിനും കാരണമായിരിക്കുന്നത്. നഗരത്തിൽ കുടുംബത്തോടൊപ്പം യാത്ര ചെയ്ത ഒരു യുവതി പങ്കുവെച്ച അനുഭവമാണ് ഇപ്പോൾ ചർച്ചയാകുന്നത്. ഓട്ടോയ്ക്കുള്ളിൽ ഇരിക്കുന്ന യാത്രക്കാരെ നേരിട്ട് നോക്കാതെ, റിയർവ്യൂ മിററിലൂടെയും അകത്തളത്തിൽ ഘടിപ്പിച്ചിരിക്കുന്ന വലിയ കണ്ണാടികളിലൂടെയും ചില ഡ്രൈവർമാർ നടത്തുന്ന അസ്വസ്ഥമാക്കുന്ന നോട്ടങ്ങളാണ് സ്ത്രീകളെ ഏറ്റവും കൂടുതൽ മാനസികമായി തളർത്തുന്നതെന്നാണ് ആരോപണം.

യാത്രയ്ക്കിടെ ഒരു സ്ത്രീയ്ക്ക് അനുഭവപ്പെടുന്ന അസ്വസ്ഥത വാക്കുകളിൽ വിവരിക്കാൻ എളുപ്പമല്ല; കുടുംബാംഗങ്ങൾ ഒപ്പമുണ്ടെങ്കിലും, സ്വന്തം ശരീരത്തിലേക്ക് ആരോ നിരന്തരം കണ്ണോടിക്കുന്നുവെന്ന തോന്നൽ പല സ്ത്രീകളെയും ഭയപ്പെടുത്തുകയും അപമാനിതരാക്കുകയും ചെയ്യുന്നു. ലക്ഷ്യസ്ഥാനത്തെത്തുന്നതുവരെ ആ യാത്ര എന്നവസാനിക്കും എന്ന ആഗ്രഹത്തോടെ നിശബ്ദമായി ഇരിക്കേണ്ടി വരുന്ന അവസ്ഥയാണ് പലർക്കും. പ്രതികരിക്കാൻ ശ്രമിച്ചാൽ തെറ്റിദ്ധാരണയാണെന്നോ, കുട്ടിയെ നോക്കിയതാണെന്നോ, പിന്നിലേക്ക് ശ്രദ്ധിച്ചതാണെന്നോ പറഞ്ഞ് നിഷേധിക്കപ്പെടുമെന്ന ഭയവും സ്ത്രീകളെ മൗനത്തിലാക്കുന്നു. ഈ മൗനമാണ് ഇത്തരം പെരുമാറ്റങ്ങൾക്ക് ധൈര്യം പകരുന്നത് . പരാതി പറയാൻ മടിക്കുന്ന സ്ത്രീകൾ ഒരുവശത്തും, പരാതി പറഞ്ഞാൽ തന്നെ സംശയത്തിന്റെ നിഴലിൽ നിർത്തപ്പെടുമോ എന്ന ആശങ്ക മറുവശത്തും നിലനിൽക്കുമ്പോൾ ഒടുവിൽ മാനസികമായി മുറിവേൽക്കുന്നത് യാത്രക്കാരിയായ സ്ത്രീ തന്നെയാകുന്നു.

ഈ സാഹചര്യത്തിൽ, സ്ത്രീകളുടെ സുരക്ഷയും സ്വകാര്യതയും കൂടുതൽ ഉറപ്പാക്കുന്നതിനായി ഓട്ടോറിക്ഷകളിൽ സ്ഥാപിച്ചിരിക്കുന്ന ചില അകത്തള കണ്ണാടികളുടെ ആവശ്യകത പുനഃപരിശോധിക്കണമെന്ന ആവശ്യവും ശക്തമാകുകയാണ്. റോഡ് സുരക്ഷയ്ക്കാവശ്യമായ സൈഡ് മിററുകൾ നിലനിർത്തിക്കൊണ്ട്, യാത്രക്കാരുടെ ഭാഗം അനാവശ്യമായി പ്രതിഫലിപ്പിക്കുന്ന സംവിധാനങ്ങൾ ഒഴിവാക്കാനുള്ള സാധ്യത പരിശോധിക്കണമെന്നാണ് പലരും ആവശ്യപ്പെടുന്നത്. ഇത് കാസർകോട്ടെ മുഴുവൻ ഓട്ടോ തൊഴിലാളികളെയും കുറ്റപ്പെടുത്തുന്ന വിമർശനമല്ല; മറിച്ച്, സത്യസന്ധമായും മാന്യമായും ജോലി ചെയ്യുന്ന ഭൂരിഭാഗം തൊഴിലാളികളുടെ പേരിന് കളങ്കമുണ്ടാക്കുന്ന ചിലരുടെ പെരുമാറ്റത്തിനെതിരെയുള്ള മുന്നറിയിപ്പാണ്. സ്വന്തം കുടുംബാംഗങ്ങളെപ്പോലെ യാത്രക്കാരെ കാണുന്ന നല്ലവരായ ഓട്ടോ തൊഴിലാളികൾ തന്നെയാണ് ഇത്തരം പ്രവണതകളെ തുറന്നെതിർക്കുകയും ഒറ്റപ്പെടുത്തുകയും ചെയ്യേണ്ടത്. സ്ത്രീകൾക്കും കുട്ടികൾക്കും ഭയമോ അസ്വസ്ഥതയോ കൂടാതെ യാത്ര ചെയ്യാൻ കഴിയുന്ന സുരക്ഷിതമായ പൊതുഗതാഗത അന്തരീക്ഷം ഉറപ്പാക്കേണ്ടത് കാലത്തിന്റെ ആവശ്യമാണ്. അതിനായി മോട്ടോർ വാഹന വകുപ്പും പൊലീസും കൂടുതൽ ജാഗ്രതയോടെയും കർശനമായ നിരീക്ഷണത്തോടെയും ഇടപെടണമെന്ന് യാത്രക്കാരും ആവശ്യപ്പെടുന്നു; ഒരു സ്ത്രീയ്ക്ക് യാത്രയ്ക്കിടെ സുരക്ഷിതത്വം നഷ്ടപ്പെടുന്ന ഓരോ നിമിഷവും സമൂഹത്തിന്റെ പരാജയമാണെന്നും, അതിനെ ഗൗരവത്തോടെ കാണേണ്ട സാഹചര്യമാണിത്