By തിരുവനന്തപുരം: രാഹുൽ മാങ്കൂട്ടത്തിൽ വിഷയത്തിൽ സർക്കാർ എന്ത് നിലപാട് സ്വീകരിക്കുമെന്ന മാധ്യമപ്രവർത്തകരുടെ ചോദ്യത്തിന് ആഭ്യന്തര മന്ത്രി രമേശ് ചെന്നിത്തല നൽകിയ മറുപടി രാഷ്ട്രീയ കേരളത്തിൽ വലിയ ചർച്ചയാകുകയാണ്. “ആര് എന്ത് എന്നത് എൻറെ വിഷയമല്ല. നിയമം അതിന്റെ വഴിക്ക് പോകും. സ്ത്രീകൾക്കും കുട്ടികൾക്കും എതിരായുള്ള അതിക്രമങ്ങളിൽ ശക്തമായ നടപടി ഉറപ്പായും ഉണ്ടാകും” എന്ന മന്ത്രിയുടെ വാക്കുകൾ സർക്കാരിന്റെ കടുത്ത നിലപാടിന്റെ വ്യക്തമായ സൂചനയായാണ് വിലയിരുത്തപ്പെടുന്നത്.
മുൻ എംഎൽഎയാണോ, പ്രമുഖ കോൺഗ്രസ് നേതാവാണോ, സോഷ്യൽ മീഡിയയിൽ സ്വാധീനമുള്ള വ്യക്തിയാണോ എന്നതൊന്നും നിയമത്തിന്റെ മുന്നിൽ പരിഗണിക്കില്ലെന്ന ശക്തമായ സന്ദേശമാണ് ചെന്നിത്തല നൽകിയത്. സ്ത്രീസുരക്ഷയുടെ കാര്യത്തിൽ രാഷ്ട്രീയ ഇടപെടലുകൾക്കും സമ്മർദ്ദങ്ങൾക്കും വഴങ്ങില്ലെന്നും കുറ്റക്കാർക്കെതിരെ മുഖം നോക്കാത്ത നടപടിയാണ് സർക്കാർ സ്വീകരിക്കുകയെന്നും മന്ത്രി വ്യക്തമാക്കി.
മൂന്ന് സ്ത്രീകൾ പരാതിയുമായി രംഗത്ത് വന്ന സാഹചര്യത്തിൽ കേസിനെ അതീവ ഗൗരവത്തോടെ കാണുന്ന സർക്കാരിന്റെ സമീപനവും ഇതിലൂടെ വ്യക്തമാകുന്നു. കേസിന്റെ തുടക്കത്തിൽ തന്നെ രാഹുൽ മാങ്കൂട്ടത്തിൽ രാജിവെക്കണമെന്ന് പരസ്യമായി ആവശ്യപ്പെട്ട നേതാക്കളിൽ മുൻപന്തിയിലുണ്ടായിരുന്നതും രമേശ് ചെന്നിത്തലയായിരുന്നു.
“രാഹുൽ ഒരു മിനിറ്റ് പോലും എംഎൽഎ സ്ഥാനത്ത് തുടരരുത്. ഇത്തരമൊരു ഗുരുതര ആരോപണം നേരിടുന്ന ആളെ ആ സ്ഥാനത്ത് തുടരാൻ അനുവദിക്കുന്നത് പാർട്ടിക്കുതന്നെ ദോഷം ചെയ്യും” എന്നായിരുന്നു അന്ന് ചെന്നിത്തലയുടെ പ്രതികരണം.
സ്ത്രീകൾക്കും കുട്ടികൾക്കും സുരക്ഷ ഉറപ്പാക്കുന്നതിൽ യാതൊരു വിട്ടുവീഴ്ചയും സർക്കാർ നടത്തില്ലെന്നും, നിയമം എല്ലാവർക്കും ഒരുപോലെയാണെന്നും ആവർത്തിച്ച് വ്യക്തമാക്കുന്ന ചെന്നിത്തലയുടെ നിലപാട് ഇപ്പോൾ സംസ്ഥാന രാഷ്ട്രീയത്തിൽ വലിയ ചർച്ചകൾക്ക് വഴിവെച്ചിരിക്കുകയാണ്.
