By തളങ്കര: തളങ്കരയിലെയും കാസർകോട്ടെയും വലിയൊരു ജനവിഭാഗത്തെ അക്ഷരവെളിച്ചത്തിലേക്ക് നയിച്ച പ്രിയപ്പെട്ട ‘ടീച്ചർ’ ഇനി ഓർമ്മ. സാമൂഹിക-സാംസ്കാരിക രംഗങ്ങളിലെ സജീവ സാന്നിധ്യവും കാസർകോട് നഗരസഭ മുൻ കൗൺസിലറുമായ തളങ്കരയിലെ ശരീഫ സലീം (79) അന്തരിച്ചു. നെഞ്ചുവേദനയെ തുടർന്ന് ആശുപത്രിയിൽ ചികിത്സയിലിരിക്കെ ഇന്ന് പുലർച്ചെ സുബഹി നമസ്കാര സമയത്തോടെയായിരുന്നു (ഏകദേശം നാല് മണിക്ക്) അന്ത്യം. കുറച്ചു ദിവസങ്ങളായി ആരോഗ്യപ്രശ്നങ്ങൾ അലട്ടിയിരുന്ന ഇവരെ കഴിഞ്ഞ ദിവസം രാത്രി വീണ്ടും നെഞ്ചുവേദന അനുഭവപ്പെട്ടതിനെ തുടർന്ന് ആസ്റ്റർ ആശുപത്രിയിൽ പ്രവേശിപ്പിച്ചുവെങ്കിലും പുലർച്ചെയോടെ ആരോഗ്യനില വഷളാവുകയും മരണത്തിന് കീഴടങ്ങുകയുമായിരുന്നു.
തളങ്കര മുഹിമ്മാത്തുൽ ഇസ്ലാം എയ്ഡഡ് എൽ.പി സ്കൂളിലെ റിട്ടയേർഡ് ഹെഡ്മിസ്ട്രസ് ആയിരുന്ന ശരീഫ ടീച്ചർ, കേവലം ഒരു അധ്യാപിക എന്നതിനപ്പുറം ഒരു നാടിന്റെയാകെ വഴികാട്ടിയായിരുന്നു. അക്ഷരങ്ങൾ അന്യമായിരുന്ന, വിദ്യാഭ്യാസപരമായി പിന്നോക്കം നിന്നിരുന്ന ഒരു കാലഘട്ടത്തിൽ, കുട്ടികളുടെ പുരോഗതിക്കായി അവർ സവിശേഷ ശ്രദ്ധ പുലർത്തി. താൻ പഠിപ്പിക്കുന്ന കുട്ടികൾ നാളെ സർക്കാർ സംവിധാനങ്ങളുടെ തലപ്പത്തും ഉന്നത നിലകളിലും എത്തിച്ചേരണമെന്നത് അവരുടെ വലിയൊരു സ്വപ്നമായിരുന്നു. കുട്ടികളുടെ പൾസ് അറിഞ്ഞ്, സ്നേഹത്തോടെയും കരുതലോടെയും പെരുമാറിയിരുന്ന ടീച്ചർ നാട്ടുകാരുടെയും വിദ്യാർത്ഥികളുടെയും ഒരുപോലെ പ്രിയങ്കരിയായി മാറി.
അധ്യാപന ജീവിതത്തിനൊപ്പം തന്നെ സാമൂഹിക പ്രവർത്തനങ്ങളിലും അവർ മാതൃകയായി. എം.ജി.എം (MGM) ഉൾപ്പെടെയുള്ള സംഘടനകളുടെ ദഅ്വ-സാമൂഹിക പ്രവർത്തനങ്ങളിൽ എന്നും മുൻപന്തിയിൽ തന്നെയുണ്ടായിരുന്നു. വാർദ്ധക്യസഹജമായ ബുദ്ധിമുട്ടുകൾ അലട്ടുമ്പോഴും ജനങ്ങൾക്കിടയിലേക്ക് ഇറങ്ങിച്ചെല്ലാനും അവരുടെ പ്രശ്നങ്ങളിൽ ഇടപെടാനും ശരീഫ സലീം മടി കാണിച്ചില്ല.
ഷഹനാസ്, ഷംഷാദ്, സാജിദ എന്നിവർ മക്കളാണ്. അബ്ദുൽ ഖാദർ ഷെരീഫ്, ഷെരീഫ് എന്നിവർ മരുമക്കളാണ്. കബറടക്കം ളുഹർ നമസ്കാരത്തിന് ശേഷം തളങ്കര മാലിക് ദീനാർ ജുമഅ മസ്ജിദ് കബർസ്ഥാനിൽ നടക്കും. സ്വന്തം ജീവിതം കൊണ്ട് ഒരു നാടിന് മുഴുവൻ വെളിച്ചം പകർന്ന ആ കർമ്മധീരയായ വനിതയുടെ വിയോഗം കാസർകോടിന് തീരാനഷ്ടമാണ്.
