By കാസർകോട്: സജീവ മുസ്ലിം ലീഗ് പ്രവർത്തകനും ദീർഘകാല പ്രവാസിയുമായിരുന്ന ചാല അബ്ദുള്ളയുടെ മകൻ സുലൈമാൻ (60) അന്തരിച്ചു. അർബുദ ബാധയെ തുടർന്ന് ചികിത്സയിലിരിക്കെയാണ് ഇന്ന് വൈകുന്നേരം നാലുമണിയോടെ മരണം സംഭവിച്ചത്.
കഴിഞ്ഞ മാസം നാലാം തീയതി ചില ശാരീരിക അസ്വസ്ഥതകളെ തുടർന്ന് ചികിത്സ തേടിയപ്പോഴാണ് രോഗം കണ്ടെത്തിയത്. എന്നാൽ അപ്പോഴേക്കും അർബുദം നാലാം ഘട്ടത്തിലേക്ക് കടന്നിരുന്നു. തുടർന്ന് ചികിത്സ തുടരുന്നതിനിടെയാണ് മരണം സംഭവിച്ചത്.
വർഷങ്ങളോളം പ്രവാസ ജീവിതം നയിച്ച സുലൈമാൻ പിന്നീട് നാട്ടിലേക്ക് മടങ്ങി വന്ന് പ്രദേശത്തെ നൈഫ് വെന്യൂ സ്ഥാപനത്തിൽ സേവനമനുഷ്ഠിച്ചു വരികയായിരുന്നു. രാഷ്ട്രീയ-സാമൂഹിക രംഗങ്ങളിൽ സജീവ സാന്നിധ്യമായിരുന്ന അദ്ദേഹം മുസ്ലിം ലീഗിന്റെ വിശ്വസ്ത പ്രവർത്തകരിൽ ഒരാളായി അറിയപ്പെട്ടിരുന്നു. കഴിഞ്ഞ പഞ്ചായത്ത് തിരഞ്ഞെടുപ്പിലും യു.ഡി.എഫിന്റെ വിജയത്തിനായി ആത്മാർത്ഥമായി പ്രവർത്തിച്ച പ്രവർത്തകനായിരുന്നു.
സുലൈമാനെ പരിചയപ്പെട്ടവർക്ക് അദ്ദേഹത്തെ മറക്കാൻ പ്രയാസമാണ്. ഭൂമിയിലുള്ള എല്ലാവരെയും പരിചയപ്പെടണമെന്നും സൗഹൃദത്തിന്റെ വലയത്തിലേക്ക് ചേർത്തുനിർത്തണമെന്നും ആഗ്രഹിച്ച അപൂർവ വ്യക്തിത്വമായിരുന്നു അദ്ദേഹം. പുതിയ ആളുകളെ കാണുമ്പോൾ സ്വയം പരിചയപ്പെടാനും അവരുമായി ആത്മബന്ധം സ്ഥാപിക്കാനുമുള്ള അദ്ദേഹത്തിന്റെ സ്വഭാവം അനേകം സൗഹൃദങ്ങളുടെ ഉടമയാക്കി. പുഞ്ചിരിയോടെയുള്ള പെരുമാറ്റവും സഹായ മനോഭാവവും കൊണ്ട് സമൂഹത്തിൽ അദ്ദേഹം സ്വന്തമാക്കിയ സ്ഥാനം വേറിട്ടതായിരുന്നു.
സൗഹൃദങ്ങളെയും മനുഷ്യബന്ധങ്ങളെയും അതിരുകളില്ലാതെ സ്നേഹിച്ച ഒരാളുടെ വേർപാട് കുടുംബത്തിനും സുഹൃത്തുക്കൾക്കും രാഷ്ട്രീയ സഹപ്രവർത്തകർക്കും ഒരുപോലെ വേദനയാകുകയാണ്. മനുഷ്യരെ സമ്പാദിക്കാനായിരുന്നു സുലൈമാൻ ഇഷ്ടപ്പെട്ടത്; സമ്പത്തുകളെയല്ല. കണ്ടുമുട്ടുന്ന ഓരോരുത്തരോടും സൗഹൃദത്തിന്റെ കൈ നീട്ടിയ ആ നല്ല മനുഷ്യൻ ഇന്ന് ഓർമ്മകളിലേക്ക് മടങ്ങുമ്പോൾ, അദ്ദേഹത്തിന്റെ പുഞ്ചിരിയും സ്നേഹവും നന്മയും സമൂഹത്തിന്റെ മനസ്സിൽ ജീവിച്ചുകൊണ്ടിരിക്കും.
അല്ലാഹു അദ്ദേഹത്തിന്റെ പാപങ്ങൾ പൊറുത്ത് നൽകി സ്വർഗത്തിൽ ഉന്നത സ്ഥാനം നൽകട്ടെ. കുടുംബാംഗങ്ങൾക്ക് ഈ ദുഃഖം താങ്ങാനുള്ള ക്ഷമയും ശക്തിയും പ്രദാനം ചെയ്യട്ടെ. ആമീൻ.
അല്ലാഹു അദ്ദേഹത്തിന്റെ പാപങ്ങൾ പൊറുത്ത് നൽകി സ്വർഗത്തിൽ ഉന്നത സ്ഥാനം നൽകട്ടെ. കുടുംബാംഗങ്ങൾക്ക് ഈ ദുഃഖം താങ്ങാനുള്ള ക്ഷമയും ശക്തിയും പ്രദാനം ചെയ്യട്ടെ. ആമീൻ.
ഭാര്യ: ആയിഷ.
മയ്യത്ത് നമസ്കാരവും ഖബറടക്കവും കബറടുക്കം ബെദിര ജുമാ മസ്ജിദ് ഖബർസ്ഥാനിൽ നടക്കും.
