ഓർമ്മയായത് നാടിന്റെ പ്രിയപ്പെട്ട മുഖം; ‘അത്താഴക്കൊട്ടി’ലെ അവസാന കണ്ണികളിലൊരാളായ ബാബ മൊയ്തു വിടവാങ്ങി

ഓർമ്മയായത് നാടിന്റെ പ്രിയപ്പെട്ട മുഖം; ‘അത്താഴക്കൊട്ടി’ലെ അവസാന കണ്ണികളിലൊരാളായ ബാബ മൊയ്തു വിടവാങ്ങി

കാസർകോട്: നാടിന്റെ സ്പന്ദനമറിഞ്ഞ്, സൗഹൃദത്തിന്റെ ചിരിയുമായി എന്നും ജനങ്ങൾക്കിടയിൽ നിറഞ്ഞുനിന്ന തളങ്കര ബാങ്കോട് സ്വദേശി ബാബ മൊയ്തു ഓർമ്മയായി. നെഞ്ചുവേദനയെ തുടർന്ന് ചെർക്കളയിലെ സ്വകാര്യ ആശുപത്രിയിൽ എത്തിച്ചെങ്കിലും ഹൃദയാഘാതത്തെ തുടർന്ന് ജീവൻ രക്ഷിക്കാനായില്ല. പരേതനായ ബാങ്കോട് ബാവ – നഫീസ ദമ്പതികളുടെ മകനാണ്.

ഓട്ടോറിക്ഷയുടെ വളയം പിടിച്ച് നാടിന്റെ വഴികളിലൂടെ സഞ്ചരിക്കുമ്പോഴും, ദീനാർ നഗറിലും പരിസരങ്ങളിലും എന്നും എല്ലാവർക്കും കാണാൻ കഴിയുന്ന ഒരു സുപരിചിത മുഖമായിരുന്നു അദ്ദേഹം. കക്ഷി-രാഷ്ട്രീയ, മത ഭേദമന്യേ ഏവർക്കും ഒരുപോലെ പ്രിയങ്കരനായ ഒരു നല്ല മനുഷ്യൻ. ഒരു പുഞ്ചിരിയോടെ മാത്രം ആളുകളെ അഭിമുഖീകരിച്ചിരുന്ന ബാബ മൊയ്തുവിന്റെ വിയോഗം നാടിന് തീരാനഷ്ടമാണ് സമ്മാനിച്ചിരിക്കുന്നത്.

ആപത്തിലും ആവശ്യങ്ങളിലും ആർക്കും എപ്പോഴും ആശ്രയിക്കാവുന്ന ഒരു വലിയ മനസ്സിന്റെ ഉടമ കൂടിയായിരുന്നു അദ്ദേഹം. എന്ത് പ്രശ്നമുണ്ടായാലും എന്ത് അത്യാവശ്യത്തിന് ആരു വിളിച്ചാലും, “വാടാ നമുക്ക് പോകാം, നമുക്ക് പോയി നോക്കാം” എന്ന് പറഞ്ഞ് മടിയേതുമില്ലാതെ മുന്നിട്ടിറങ്ങുന്ന ആ സാന്നിധ്യം നാടിന്റെ വലിയൊരു ധൈര്യമായിരുന്നു. നാട്ടിൽ എന്ത് പരിപാടിയായാലും അവിടെ മൊയ്തു ഉണ്ടെങ്കിലേ അതൊരു പൂർണ്ണതയും രസവുമാകൂ. ആ ഒച്ചപ്പാടും ശബ്ദവുമൊക്കെ നാടിന് സമ്മാനിച്ച ആവേശം ചില്ലറയല്ല; അദ്ദേഹത്തിന്റെ സാന്നിധ്യം കാണാനും ആ സംസാരം കേൾക്കാനും തന്നെ വല്ലാത്തൊരു ഭംഗിയായിരുന്നു.

ഒരു കാലഘട്ടത്തിന്റെ ഓർമ്മപ്പെടുത്തലായ കാസർകോടിന്റെ തനത് പാരമ്പര്യ കലാരൂപമായ ‘അത്താഴക്കൊട്ടി’ലെ അവസാനത്തെ കണ്ണികളിൽ ഒരാളായിരുന്നു അദ്ദേഹം. വിശുദ്ധ റംസാൻ രാവുകളിൽ വിശ്വാസികളെ അത്താഴത്തിന് ഉണർത്താൻ നാടുനീളെ മുഴങ്ങിയിരുന്ന ആ ബാൻഡ് മേളത്തിൽ മുൻനിരയിൽ നിന്ന് താളം പിടിച്ച ബാബ മൊയ്തു, ആ പഴയകാല സംസ്കാരത്തിന്റെ മായാത്ത അടയാളം കൂടിയായിരുന്നു.

സാധാരണക്കാരന്റെ ജീവിതവഴികളിൽ അലിഞ്ഞുചേർന്ന്, സൗഹൃദങ്ങൾ മാത്രം സമ്പാദ്യമാക്കി വിടപറഞ്ഞ ആ വലിയ മനസ്സിന് നാട് കണ്ണീരോടെ വിട നൽകുന്നു.