By തിരുവനന്തപുരം: വ്യവസായ വകുപ്പിന് കീഴിലുള്ള അഞ്ച് ബോർഡ് കോർപ്പറേഷൻ ചെയർമാൻ സ്ഥാനങ്ങളിലേക്ക് മുസ്‌ലിം ലീഗ് നേതാക്കളെ നിയമിക്കുന്നു. പാർട്ടിയിലെ മുതിർന്ന നേതാക്കൾക്ക് നിർണായക പദവികൾ ലഭിക്കുന്നതോടെ വിവിധ പൊതുമേഖലാ സ്ഥാപനങ്ങളുടെ തലപ്പത്ത് ലീഗ് സാന്നിധ്യം ഉറപ്പാകും. നിയമന ഉത്തരവുകൾ ഇന്ന് തന്നെ പുറത്തിറങ്ങുമെന്നാണ് ലഭിക്കുന്ന വിവരം.
മുസ്‌ലിം ലീഗ് സംസ്ഥാന ജനറൽ സെക്രട്ടറി പി.എം.എ. സലാം സിൽക്കിന്റെ ചെയർമാനാകും. സംസ്ഥാന വൈസ് പ്രസിഡന്റ് ശ്യാം സുന്ദറിന് ഇൻകെൽ ചെയർമാൻ സ്ഥാനം ലഭിക്കും. മറ്റൊരു വൈസ് പ്രസിഡന്റ് ടി.എം. സലീം കെ.എ.എൽ ചെയർമാനായി നിയമിതനാകും. സിഡ്കോയുടെ അധ്യക്ഷ സ്ഥാനത്തേക്ക് ലീഗ് വയനാട് ജില്ലാ ജനറൽ സെക്രട്ടറി ടി. മുഹമ്മദ് എത്തും. സംസ്ഥാന വൈസ് പ്രസിഡന്റ് സി.എച്ച്. റഷീദിനും വ്യവസായ വകുപ്പിന് കീഴിലുള്ള മറ്റൊരു ബോർഡ് കോർപ്പറേഷൻ ചെയർമാൻ സ്ഥാനം ലഭിക്കും.
അതേസമയം, തദ്ദേശ സ്വയംഭരണ വകുപ്പിന് കീഴിലുള്ള റൂറൽ എംപ്ലോയ്മെന്റ് ആൻഡ് വെൽഫെയർ സൊസൈറ്റി (ക്രൂസ്) ചെയർമാനായി നേരത്തെ നിശ്ചയിക്കപ്പെട്ട വയനാട് ജില്ലാ ഭാരവാഹി യഹിയാ ഖാൻ ഇന്ന് ചുമതലയേൽക്കും. നിയമനവുമായി ബന്ധപ്പെട്ട് പാർട്ടിക്കുള്ളിൽ ചില അതൃപ്തികൾ ഉയർന്നിരുന്നുവെന്ന വിവരവും പുറത്തുവന്നിട്ടുണ്ട്. ഭരണപരിഷ്‌കാര കമ്മിഷൻ അധ്യക്ഷനായി ഡോ. എം.കെ. മുനീറിനെ നേരത്തെ നിയമിച്ചിരുന്നു.
ഇതോടെ വിവിധ സർക്കാർ സ്ഥാപനങ്ങളിലേക്കുള്ള രാഷ്ട്രീയ നിയമനങ്ങളിൽ മുസ്‌ലിം ലീഗിന്റെ പ്രാതിനിധ്യം കൂടുതൽ വ്യക്തമാവുകയാണ്. വരാനിരിക്കുന്ന മറ്റ് നിയമനങ്ങളിൽ യൂത്ത് ലീഗ്, വനിതാ ലീഗ് തുടങ്ങിയ പോഷക സംഘടനകൾക്കും അർഹമായ പരിഗണന ലഭിക്കുമെന്നാണ് പാർട്ടി വൃത്തങ്ങളിൽ നിന്നുള്ള സൂചന.
