By തുമ്പില്ലാത്ത കേസിൽ നിർണായക വഴിതിരിവ് ,തളങ്കര കൊലപാതക കേസിൽ മൂന്ന് പ്രതികളും പിടിയിൽ, പ്രതികളെ വലയിലാക്കി കാസർകോട് പോലീസിന്റെ അന്വേഷണ മികവ്
കാസർകോട് തളങ്കര കടുവത്തിൽ നാടിനെ നടുക്കിയ കൊലപാതക കേസിൽ ചുരുളുകൾ കൃത്യമായ അന്വേഷണത്തിലൂടെ അഴിച്ചെടുത്ത് കാസർകോട് ടൗൺ പോലീസ്. കർണാടക ദേവങ്കര സ്വദേശി നജീമുള്ളയുടെ കൊലപാതകവുമായി ബന്ധപ്പെട്ട് മുഴുവൻ പ്രതികളെയും നിയമത്തിന് മുന്നിൽ കൊണ്ടുവരാൻ സാധിച്ചത് കേരള പോലീസിന്റെ, പ്രത്യേകിച്ച് കാസർകോട് ജില്ലയിലെ അന്വേഷണ സംഘത്തിന്റെ സമാനതകളില്ലാത്ത മിടുക്കിന് തെളിവാണ് ഒരു തുമ്പ് പോലും ലഭിക്കാതിരുന്ന കേസിനാണ് പോലീസ് ഉദ്യോഗസ്ഥരുടെ ഇച്ഛാശക്തിയിലൂടെ തുമ്പുണ്ടാക്കാനായത്.
ഒന്നര മാസം മുമ്പ് ബംഗളൂരുവിൽ വെച്ച് പരിചയപ്പെട്ട രണ്ട് സുഹൃത്തുക്കളോടൊപ്പം കാസർകോട്ടെത്തിയതായിരുന്നു കൊല്ലപ്പെട്ട നജീമുള്ള. തുടർന്ന് തളങ്കര കടുവത്തിൽ ഒരു കടമുറിക്കും മുകളിലുള്ള റൂമിൽ വാടകയ്ക്ക് താമസിച്ച് വരുമ്പോഴാണ് ക്രൂരമായ കൊലപാതകം അരങ്ങേറിയത്. എന്നാൽ ആറ് ദിവസങ്ങൾക്ക് ശേഷമാണ് മുറിയിൽ നിന്ന് അഴുകിയ നിലയിൽ മൃതദേഹം കണ്ടെത്തുന്നത്. മൃതദേഹം പൂർണ്ണമായി അഴുകിപ്പോയതിനാൽ ആരുടേതാണ് മൃതദേഹം എന്ന് തിരിച്ചറിയാൻ കഴിയാത്ത വിധം വികൃതമായിരുന്നു. നജീമുള്ള കാസർകോട്ടെത്തി ദിവസങ്ങൾ മാത്രമായതിനാൽ ആർക്കും അദ്ദേഹത്തെ മുഖപരിചയം പോലുമില്ലായിരുന്നു. കൊല്ലപ്പെട്ടത് ആരാണെന്നോ പ്രതികൾ ആരെന്നോ കണ്ടെത്താനാവാതെ പോലീസ് വലിയ വെല്ലുവിളിയാണ് നേരിട്ടത്.റൂം എടുക്കുമ്പോൾ നൽകിയ ആധാർ കാർഡ് മാത്രമാണ് ലഭിച്ചിരുന്നത് ,പോസ്റ്റ്‌മോർട്ടം നടപടികൾക്ക് ശേഷം ഇത് കൊലപാതകമാണെന്ന് ശാസ്ത്രീയമായി ഉറപ്പിച്ച പോലീസ്, തുടർന്ന് നടത്തിയ ഊർജിതമായ അന്വേഷണമാണ് കേസിൽ നിർണ്ണായക വഴിതിരിവായത്. ഒരു തെളിവുമില്ലാത്ത കേസിൽ അത്യന്തം ജാഗ്രതയോടെയാണ് പോലീസ് നീങ്ങിയത്. ജില്ലാ പോലീസ് മേധാവി നിതിൻ രാജ് പി ഐ പി എസ് , അസിസ്റ്റന്റ് പോലീസ് സൂപ്രണ്ട് അച്യുത് അശോക് ഐ പി എസ് എന്നിവരുടെ ശക്തമായ മേൽനോട്ടവും മികച്ച നേതൃപാടവവുമാണ് ഈ കേസന്വേഷണത്തിന് മുതൽക്കൂട്ടായത്. വെറുമൊരു ഐഡന്റിറ്റി കാർഡിന്റെ ബലത്തിൽ ആദ്യം ഒരു പ്രതിയെ പിടികൂടിയ പോലീസ്, പിന്നീട് ശാസ്ത്രീയമായ നീക്കങ്ങളിലൂടെ മറ്റ് പ്രതികളെയും ഓരോന്നായി കസ്റ്റഡിയിലെടുക്കുകയായിരുന്നു. കൊലപാതകത്തിൽ നേരിട്ട് പങ്കെടുത്ത മൂന്ന് പ്രതികളും ഇപ്പോൾ കാസർകോട് പോലീസിന്റെ പിടിയിലാണ്. പ്രാഥമിക വിവരങ്ങൾ പ്രകാരം മദ്യലഹരിയിലുണ്ടായ തർക്കമാണ് കൊലപാതകത്തിൽ കലാശിച്ചതെന്നാണ് സൂചന.
തിരിച്ചറിയൽ പരേഡ് നടക്കാനുള്ളതുകൊണ്ട് പ്രതികളുടെ പേരുവിവരങ്ങളോ ചിത്രങ്ങളോ പോലീസ് ഇതുവരെ പുറത്തുവിട്ടിട്ടില്ല. പ്രതികളെ തിരിച്ചറിയുന്നതിനുള്ള നിയമപരമായ നടപടിക്രമങ്ങൾ പൂർത്തിയാക്കാൻ പോലീസ് കാണിച്ച ഈ ജാഗ്രത തികച്ചും പ്രശംസനീയമാണ്. മാധ്യമങ്ങളോടും പൊതുജനങ്ങളോടും പ്രതികളുടെ ദൃശ്യങ്ങൾ പ്രസിദ്ധീകരിക്കരുതെന്ന് അഭ്യർത്ഥിച്ചുകൊണ്ട് അന്വേഷണത്തിന്റെ രഹസ്യസ്വഭാവം കാത്തുസൂക്ഷിക്കാൻ പോലീസിന് സാധിച്ചു.
ഭാര്യയും നാല് മക്കളുമടങ്ങുന്ന നജീമുള്ളയുടെ കുടുംബത്തിന് സംഭവിച്ച ഈ വലിയ നഷ്ടത്തിന് പൂർണ്ണമായ നീതി ഉറപ്പാക്കുന്നതിൽ കാസർകോട് സി.ഐ മെൽബിൻ ജോസിനും സംഘത്തിനും സാധിച്ചിരിക്കുന്നു. ഒരു തുമ്പും ലഭിക്കാത്ത കേസുകളിൽ പോലും പോലീസിന്റെ ആധുനിക അന്വേഷണ രീതികളും അർപ്പണബോധവും എത്രമാത്രം ഫലം കാണുന്നു എന്നതിന്റെ മികച്ച ഉദാഹരണമാണ് ഈ കേസ്.
