By നാട്ടിലേക്ക് മടങ്ങുംവഴി ബൈക്കപകടം; കണ്ണൂർ തളാപ്പ് സ്വദേശിയായ വിദ്യാർത്ഥിക്ക് ദാരുണാന്ത്യം, ബംഗളൂരുവിൽ ഇന്റീരിയർ ഡിസൈനിങ് കോഴ്സ് പഠിക്കുകയായിരുന്നു
കണ്ണൂർ : കണ്ണൂരിന്റെ പ്രിയപ്പെട്ടൊരു ചെറുപ്പക്കാരൻ കൂടി യാത്ര പറഞ്ഞു… നാടിന്റെ നന്മയും സ്വപ്നങ്ങളുമായി ബംഗളൂരുവിൽ പഠനം തുടരുകയായിരുന്ന കണ്ണൂർ തളാപ്പ് സ്വദേശി ഫസീലിന്റെ വിയോഗത്തിന്റെ ഞെട്ടലിലാണ് നാടും കുടുംബവും. ബംഗളൂരു-മൈസൂരു ഹൈവേയിൽ മാണ്ഡ്യക്ക് സമീപമുണ്ടായ ദാരുണമായ ബൈക്കപകടമാണ് ഒരു കുടുംബത്തിന്റെ മുഴുവൻ പ്രതീക്ഷകളും കരിച്ചുകളഞ്ഞത്.
ബംഗളൂരുവിൽ ഇന്റീരിയർ ഡിസൈനിങ് കോഴ്സ് പഠിക്കുകയായിരുന്നു ഫസീലും സുഹൃത്ത് ഇംറാനും. പഠനത്തിനിടയിലെ ചെറിയൊരു അവധിക്ക് സ്വന്തം നാട്ടിലേക്ക്, പ്രിയപ്പെട്ടവരുടെ അടുത്തേക്ക് പുറപ്പെട്ടതായിരുന്നു ഇരുവരും. എന്നാൽ വിധി മറ്റൊന്നായിരുന്നു. യാത്രാമധ്യേ മറ്റൊരു വാഹനത്തെ മറികടക്കുന്നതിനിടെ റോഡരികിൽ നിർത്തിയിട്ടിരുന്ന ക്രെയിൻ റിക്കവറി വാനിലേക്ക് അവരുടെ ബൈക്ക് ഇടിച്ചു കയറുകയായിരുന്നു. അപകടത്തിന്റെ ആഘാതത്തിൽ നിയന്ത്രണം നഷ്ടപ്പെട്ട് തെറിച്ചുവീണ ഇരുവരെയും ഉടൻ തന്നെ മൈസൂരുവിലെ മണിപ്പാൽ ആശുപത്രിയിൽ എത്തിച്ചെങ്കിലും, ഫസീലിന്റെ ജീവൻ രക്ഷിക്കാനായില്ല.
ഗുരുതര പരിക്കുകളോടെ ആശുപത്രിയിൽ കഴിയുന്ന ഇംറാന്റെ ജീവനുവേണ്ടിയുള്ള പ്രാർത്ഥനയിലാണ് സുഹൃത്തുക്കളും കുടുംബവും. നാളെയുടെ വലിയ സ്വപ്നങ്ങളുമായി നടന്നിരുന്ന ഒരു ചെറുപ്പക്കാരന്റെ ചിരിയാണ് ഈ വേനലിൽ മാഞ്ഞുപോയത്. പ്രിയപ്പെട്ട മകന്റെ വിയോഗവാർത്ത താങ്ങാനാകാതെ വിതുമ്പുന്ന കുടുംബത്തിന്റെ ദുഃഖത്തിൽ നാടൊന്നാകെ പങ്കുചേരുന്നു.
