മൂന്ന് ദിവസത്തെ കനത്ത മഴയിൽ നേപ്പാൾ വിറച്ചു; പ്രളയവും മണ്ണിടിച്ചിലും, 24 മരണം, 14 പേരെ കാണാതായി

മൂന്ന് ദിവസത്തെ കനത്ത മഴയിൽ നേപ്പാൾ വിറച്ചു; പ്രളയവും മണ്ണിടിച്ചിലും, 24 മരണം, 14 പേരെ കാണാതായി

കാഠ്മണ്ഡു : നേപ്പാളിൽ തുടർച്ചയായ മൂന്ന് ദിവസത്തെ കനത്ത മഴയെ തുടർന്ന് പ്രളയവും മണ്ണിടിച്ചിലും വ്യാപക നാശം വിതച്ചു. വിവിധ ജില്ലകളിലായി കുറഞ്ഞത് 24 പേർ മരിക്കുകയും 14 പേരെ കാണാതാവുകയും ചെയ്തതായി തിങ്കളാഴ്ച പുറത്തുവന്ന റിപ്പോർട്ടുകൾ വ്യക്തമാക്കുന്നു. മനാങ്, മ്യാഗ്ദി, ബാഗ്ലുങ്, പർവത്, പാൽപ എന്നിവിടങ്ങളിലാണ് ദുരന്തത്തിന്റെ ആഘാതം രൂക്ഷമായത്.

നേപ്പാളിലെ ദേശീയ ദുരന്തസാധ്യത കുറയ്ക്കൽ-നിർവഹണ അതോറിറ്റിയുടെ (NDRRMA) കണക്കുകൾ പ്രകാരം 747 കുടുംബങ്ങളെ ദുരന്തം നേരിട്ട് ബാധിച്ചു. 143 വീടുകൾ പൂർണമായും 51 വീടുകൾ ഭാഗികമായും തകർന്നു. ആയിരക്കണക്കിന് ആളുകളെ സുരക്ഷിത സ്ഥാനങ്ങളിലേക്ക് മാറ്റിയിട്ടുണ്ട്.

കാളിഗണ്ഡകി കരകവിഞ്ഞു; മലയിടിഞ്ഞ് നദിയിലേക്ക്

കനത്ത മഴയിൽ കാളിഗണ്ഡകി നദി അപകടകരമായ നിലയിൽ കരകവിഞ്ഞതോടെ വ്യാപകമായ വെള്ളപ്പൊക്കവും മണ്ണൊലിപ്പും ഉണ്ടായി. നദിയുടെ തീരത്തെ മലയുടെ വലിയൊരു ഭാഗം ഇടിഞ്ഞ് നദിയിലേക്ക് പതിക്കുന്ന ദൃശ്യങ്ങളും പുറത്തുവന്നു. സ്യാങ്ജയെയും ഗുൽമിയെയും ബന്ധിപ്പിക്കുന്ന കോൺക്രീറ്റ് പാലവും പ്രളയത്തിൽ തകർന്നതോടെ പ്രദേശത്തെ ഗതാഗത ബന്ധം തടസ്സപ്പെട്ടു. വിവിധ ദേശീയപാതകളും ഗ്രാമീണ റോഡുകളും മണ്ണിടിച്ചിലിനെ തുടർന്ന് അടഞ്ഞ നിലയിലാണ്.

ബാഗ്ലുങിലും മ്യാഗ്ദിയിലും കനത്ത നാശം

ബാഗ്ലുങിലാണ് ഗണ്ഡകി പ്രവിശ്യയിൽ ഏറ്റവും കൂടുതൽ മരണങ്ങൾ റിപ്പോർട്ട് ചെയ്തിരിക്കുന്നത്. നിസിഖോള ഗ്രാമത്തിൽ മണ്ണിടിച്ചിലിൽ വീട് തകർന്നുവീണ് ഒരു അമ്മയും മൂന്ന് മക്കളും ഉൾപ്പെടെ ഒരു കുടുംബത്തിലെ നാല് പേർ മരിച്ചതായി റിപ്പോർട്ടുകളുണ്ട്. മ്യാഗ്ദിയിലും വ്യാപകമായ മണ്ണിടിച്ചിലും വെള്ളപ്പൊക്കവും റിപ്പോർട്ട് ചെയ്തു.

ഹിമലുങ് ഹിമാലയത്തിൽ ഹിമപാതം; രക്ഷാപ്രവർത്തനം ദുഷ്കരം

മനാങ് ജില്ലയിലെ 7,126 മീറ്റർ ഉയരമുള്ള ഹിമലുങ് ഹിമാലയത്തിലും കനത്ത മഴയ്ക്കും മഞ്ഞുവീഴ്ചയ്ക്കും പിന്നാലെ ഹിമപാതമുണ്ടായി. ആദ്യ റിപ്പോർട്ടുകളിൽ രണ്ട് പേരുടെ മരണം സ്ഥിരീകരിച്ചിരുന്നെങ്കിലും തിങ്കളാഴ്ച പുറത്തുവന്ന പുതിയ വിവരങ്ങൾ പ്രകാരം നാല് മൃതദേഹങ്ങൾ കണ്ടെത്തി തിരിച്ചറിഞ്ഞിട്ടുണ്ട്; 12 പേരെ ഇപ്പോഴും കാണാതായിട്ടുണ്ട്. മോശം കാലാവസ്ഥ രക്ഷാപ്രവർത്തനത്തിന് വലിയ തടസ്സമായി തുടരുകയാണ്.

വൈദ്യുതി ഉൽപാദനവും ബാധിച്ചു

പ്രളയവും മണ്ണിടിച്ചിലും നേപ്പാളിന്റെ വൈദ്യുതി അടിസ്ഥാനസൗകര്യങ്ങളെയും ബാധിച്ചു. ജലനിരപ്പ് ഉയർന്നതിനെ തുടർന്ന് 144 മെഗാവാട്ട് ശേഷിയുള്ള കാളിഗണ്ഡകി ‘A’ ജലവൈദ്യുത പദ്ധതിയുടെ അണക്കെട്ടിന്റെ ഷട്ടറുകൾ തുറക്കുകയും വൈദ്യുതി ഉൽപാദനം നിർത്തിവയ്ക്കുകയും ചെയ്തു.

മഴ തുടരാൻ സാധ്യത; ജാഗ്രതയിൽ നേപ്പാൾ

സെപ്റ്റംബർ 24 മുതൽ ബംഗാൾ ഉൾക്കടലിൽ രൂപപ്പെട്ട ന്യൂനമർദത്തിന്റെ സ്വാധീനമാണ് രാജ്യത്തിന്റെ വിവിധ ഭാഗങ്ങളിൽ അതിശക്തമായ മഴയ്ക്ക് കാരണമായതെന്ന് നേപ്പാളിലെ ദുരന്തനിവാരണ അധികൃതർ അറിയിച്ചു. ചില പ്രദേശങ്ങളിൽ 100 മില്ലിമീറ്ററിലധികം മഴ രേഖപ്പെടുത്തി; നൗവൽപരാസിയിലെ ദേഢ്ഗാവിൽ 544.2 മില്ലിമീറ്റർ മഴയാണ് രേഖപ്പെടുത്തിയത്. അപകടസാധ്യതയുള്ള പ്രദേശങ്ങളിൽ നിന്ന് ആളുകളെ ഒഴിപ്പിക്കുകയും രക്ഷാപ്രവർത്തനം ശക്തമാക്കുകയും ചെയ്തിട്ടുണ്ട്.