By പ്രക്ഷോഭകരെ വെടിവച്ചുകൊല്ലാൻ ജന്തർ മന്തറിൽ ‘നാലുമണിക്കൂർ നരഹത്യ’ റെസിപ്പി; ടി.ജി. മോഹൻദാസിന്റെ കൊലവിളിയിൽ പണികിട്ടി, അന്വേഷിക്കാൻ സൈബർ സെൽ ഐ.ജി
ദില്ലിയിൽ നീറ്റ് ചോദ്യപേപ്പർ ചോർച്ചയ്ക്കെതിരെ സമാധാനപരമായി തെരുവിലിറങ്ങിയ വിദ്യാർത്ഥികളെ വെടിവച്ചുകൊല്ലണമെന്ന് പരസ്യമായി ആഹ്വാനം ചെയ്ത ആർ.എസ്.എസ് സൈദ്ധാന്തികൻ ടി.ജി. മോഹൻദാസിനെതിരെ പോലീസിന്റെ കടുത്ത നടപടി. ജനാധിപത്യപരമായ പ്രതിഷേധങ്ങളെ നേരിടാൻ സ്വന്തം ഭാവനയിൽ വിരിഞ്ഞ അരുംകൊലയുടെ ‘രക്തരൂക്ഷിത തിരക്കഥ’ അവതരിപ്പിച്ച മോഹൻദാസിനെതിരെയുള്ള പരാതിയിൽ സൈബർ സെൽ ഐ.ജി പി. പ്രകാശ് അന്വേഷണം നടത്തും.
ഒരു യൂട്യൂബ് ചാനലിലൂടെയായിരുന്നു ലോകത്തെ സകല സമാധാന തത്ത്വങ്ങളെയും പരിഹസിച്ചുകൊണ്ട് ‘സൈബർ സൈദ്ധാന്തികന്റെ’ ഈ വിചിത്രമായ കൊലവിളി. ജന്തർ മന്തറിൽ നാല് കിലോമീറ്റർ ചുറ്റളവിൽ കർഫ്യൂ പ്രഖ്യാപിക്കണം, ജനക്കൂട്ടത്തോട് പിരിഞ്ഞുപോകാൻ മൂന്ന് തവണ മുന്നറിയിപ്പ് നൽകിയ ശേഷം നിർദാക്ഷിണ്യം വെടിയുതിർക്കണം എന്നൊക്കെയായിരുന്നു ഈ ‘ഉപദേശകന്റെ’ മാസ്റ്റർ പ്ലാൻ! കുറച്ചുപേർ മരിക്കും, കുറച്ചുപേർക്ക് അംഗഭംഗം സംഭവിക്കും, അങ്ങനെ ഒരു നാലുമണിക്കൂർ കൊണ്ട് രംഗം ശാന്തമാകും, പിന്നീട് ശവങ്ങൾ പെറുക്കി ആശുപത്രിയിലെത്തിച്ചാൽ മതിയെന്നുമുള്ള മോഹൻദാസിന്റെ അതിഭീകരമായ യുക്തി കേട്ട് ഞെട്ടിയിരിക്കുകയാണ് പൊതുസമൂഹം. ഭാവിക്ക് വേണ്ടി പോരാടുന്ന ജെൻസി പ്രക്ഷോഭകരെ മുഴുവൻ ക്രിമിനലുകളും ബലാത്സംഗ വീരന്മാരുമായി മുദ്രകുത്താനും ഈ ‘മഹാമനസ്കൻ’ മടിച്ചില്ല.
യൂട്യൂബ് ക്യാമറയ്ക്ക് മുന്നിലിരുന്ന് ലളിതമായി ‘ആളെക്കൊല്ലാ ഉപദേശം’ തട്ടിവിട്ട മോഹൻദാസിന്റെ ക്രൂരമനോഭാവത്തിനെതിരെ ശക്തമായ പ്രതിഷേധമാണ് ഉയർന്നത്. എ.ഐ.വൈ.എഫ് സംസ്ഥാന സെക്രട്ടറി ടി.ടി. ജിസ്മോൻ നൽകിയ പരാതിയുടെ അടിസ്ഥാനത്തിൽ ആഭ്യന്തരമന്ത്രി രമേശ് ചെന്നിത്തലയാണ് അന്വേഷണത്തിന് നിർദേശം നൽകിയത്. ഇതിന് പുറമെ എസ്.എഫ്.ഐ തിരുവനന്തപുരം ജില്ലാ സെക്രട്ടറി എം.എ. നന്ദനും ഡി.ജി.പിക്ക് പരാതി നൽകിയിട്ടുണ്ട്. യൂട്യൂബിൽ ഇരുന്ന് ‘തോക്കെടുക്കാൻ’ ആഹ്വാനം ചെയ്ത സൈബർ വീരന് ഇനി കസേരയിലിരുന്ന് പോലീസിന്റെ ചോദ്യങ്ങൾക്ക് മറുപടി പറയേണ്ടി വരുമെന്ന് ഉറപ്പായിട്ടുണ്ട്.
