കോൺഗ്രസ് സംരക്ഷണത്തിലാണ് രാഹുൽ മാങ്കൂട്ടത്തിൽ ഒളിവിൽ; ഒളിത്താവള വിവരം പോലീസിനെ അറിയിക്കണം: മുഖ്യമന്ത്രി

തൃശ്ശൂർ: യൂത്ത് കോൺഗ്രസ് നേതാവ് രാഹുൽ മാങ്കൂട്ടത്തിൽ എം.എൽ.എ. ഒളിവിലിരിക്കുന്നത് അദ്ദേഹത്തിന്റെ വ്യക്തിപരമായ കഴിവുകൊണ്ടല്ല, മറിച്ച് കോൺഗ്രസ് രാഷ്ട്രീയ നേതൃത്വം നൽകുന്ന പൂർണ്ണ സംരക്ഷണയിലാണെന്ന് മുഖ്യമന്ത്രി പിണറായി വിജയൻ തുറന്നടിച്ചു. രാഹുൽ എവിടെയാണെന്ന് കോൺഗ്രസ് നേതൃത്വത്തിന് വ്യക്തമായി അറിയാമെന്നും, ആ വിവരം പോലീസിനെ അറിയിക്കാനുള്ള ബാധ്യത അവർക്കുണ്ടെന്നും മുഖ്യമന്ത്രി ആവശ്യപ്പെട്ടു. തൃശ്ശൂരിൽ നടന്ന ‘മീറ്റ് ദ പ്രസ്’ പരിപാടിയിൽ സംസാരിക്കുകയായിരുന്നു അദ്ദേഹം.

രാഹുലിന്റെ അറസ്റ്റ് ഹൈക്കോടതി താത്കാലികമായി തടഞ്ഞതിനെക്കുറിച്ച് മുഖ്യമന്ത്രി നിലപാട് വ്യക്തമാക്കി. കോടതിയുടെ മുന്നിൽ ജാമ്യാപേക്ഷ നിലനിൽക്കുമ്പോൾ അറസ്റ്റ് ചെയ്യുന്നതിൽ നിയമപരമായി തെറ്റില്ല. എങ്കിലും, അന്തിമ തീരുമാനം വരുംവരെ കാത്തിരിക്കുക എന്നത് കേരളത്തിലെ പൊതുരീതിയാണ്. “ഹൈക്കോടതി കേസ് കേൾക്കാൻ ഒരു തീയതിയിലേക്ക് നീട്ടിവെച്ച നടപടി സ്വാഭാവികമാണ്. അതിനപ്പുറം ഇതിന് വ്യാഖ്യാനം നൽകേണ്ടതില്ല,” അദ്ദേഹം പറഞ്ഞു.

പോലീസിന് രാഹുലിനെ കണ്ടെത്താൻ കഴിഞ്ഞില്ലെന്നതാണ് വാസ്തവം. എന്നാൽ, പോലീസ് മനഃപൂർവം അറസ്റ്റ് ചെയ്യാതിരിക്കുകയാണെന്ന ആരോപണം അടിസ്ഥാനരഹിതമാണ്. “രാഹുലിന് ഒളിവിൽ പോകാൻ വേണ്ട എല്ലാ സഹായങ്ങളും ചെയ്‌തുകൊടുത്തത് കോൺഗ്രസ് പ്രവർത്തകരും നേതാക്കളുമാണ്. സംസ്ഥാനത്തിന് പുറത്തടക്കം നല്ല രീതിയിൽ സംരക്ഷണം തീർത്തിരിക്കുകയാണ്,” മുഖ്യമന്ത്രി ആരോപിച്ചു. രാഹുൽ എവിടെയാണെന്ന് കോൺഗ്രസിനറിയാമെന്നും, പോലീസിനെ അറിയിക്കേണ്ടത് അവരുടെ ഉത്തരവാദിത്തമാണെന്നും അദ്ദേഹം ആവർത്തിച്ചു.

ക്രിമിനൽ സ്വഭാവമുള്ള ഈ വ്യക്തി കർണാടകയിലേക്ക് കടന്നത് എന്തിനാണ്? അവിടെ ആരാണ് ഒത്താശകൾ ചെയ്‌തുകൊടുത്തത്? – മുഖ്യമന്ത്രി ചോദിച്ചു. “ഇയാൾ അയാളുടെ കഴിവിന്റെ ബലത്തിൽ മാത്രം ഒളിവിലിരിക്കുകയല്ല. രാഷ്ട്രീയ നേതൃത്വത്തിന്റെ ശക്തമായ സംരക്ഷണമുണ്ട്. ഭാവിയിലെ നിക്ഷേപമായി കണക്കാക്കിയ ഒരാളാണ്. അതുകൊണ്ട് തന്നെ സംരക്ഷിക്കാനുള്ള നടപടികളാണ് കോൺഗ്രസ് സ്വീകരിക്കുന്നത്. രാഹുലിനെ സംരക്ഷിക്കുന്നതിൽ ആർക്കൊക്കെ പങ്കുണ്ടെന്ന് കൂടുതൽ പരിശോധിച്ചാൽ മനസ്സിലാകുമെന്നും” മുഖ്യമന്ത്രി കൂട്ടിച്ചേർത്തു.

ENGLISH SUMMARY:

Chief Minister Pinarayi Vijayan strongly alleged that Youth Congress leader and MLA Rahul Mankootathil is evading arrest not due to his individual ability, but under the full political patronage and protection of the Congress party. Speaking at a ‘Meet the Press’ event in Thrissur, the Chief Minister demanded that if the Congress leadership knows Rahul’s whereabouts, they are obliged to inform the police. He asserted that Congress workers and leaders facilitated Rahul’s escape and provided him protection, even outside the state, suggesting he is being safeguarded as a ‘future investment’ for the party. Addressing critics, the CM dismissed the allegation that the police are deliberately avoiding Rahul’s arrest, stating that the police simply haven’t been able to find him because all necessary assistance for him to go into hiding was provided by his Congress colleagues. Regarding the High Court temporarily staying Rahul’s arrest, the CM clarified that while arresting an accused whose bail plea is pending is not illegal, the general practice in Kerala is to await a decision, calling the High Court’s adjournment of the case for hearing on a specific date a “natural court proceeding” that should not be misinterpreted. Furthermore, the Chief Minister raised pointed questions about why Rahul, described as a person with a criminal nature, fled to Karnataka, and who provided him assistance (Othashakal) there, concluding that further investigation would reveal all those involved in protecting the MLA.