By പ്രധാനമന്ത്രിയുടെ ചിത്രത്തിൽ ചവിട്ടി അധിക്ഷേപിച്ചു, മണ്ണാർക്കാട് കോളജ് വിദ്യാർത്ഥികൾക്കെതിരെ കലാപാഹ്വാനത്തിന് കേസ് ബിജെപി നേതാവിന്റെ പരാതി പ്രകാരമാണ് നടപടി
മണ്ണാർക്കാട്: പ്രധാനമന്ത്രി നരേന്ദ്ര മോദിയെ അധിക്ഷേപിച്ചെന്ന പരാതിയിൽ മണ്ണാർക്കാട് എം.ഇ.എസ് കല്ലടി കോളജിലെ കണ്ടാലറിയാവുന്ന 15 വിദ്യാർത്ഥികൾക്കെതിരെ പോലീസ് കേസെടുത്തു. കോളജിലെ എസ്.എഫ്.ഐ, എം.എസ്.എഫ് സംഘടനാ പ്രവർത്തകരായ വിദ്യാർത്ഥികൾക്കെതിരെയാണ് മണ്ണാർക്കാട് പോലീസ് നിയമനടപടി സ്വീകരിച്ചിരിക്കുന്നത്.
ഒക്ടോബർ 13-ന് കോളജ് യൂണിയൻ തിരഞ്ഞെടുപ്പ് പ്രചാരണത്തിന്റെ കൊട്ടിക്കലാശ ആഘോഷങ്ങൾക്കിടെയാണ് കേസിനാസ്പദമായ സംഭവം നടന്നത്. വിദ്യാർത്ഥികൾ പ്രധാനമന്ത്രിയുടെ ചിത്രത്തിൽ ചവിട്ടുകയും ചിത്രം കീറുകയും ചെയ്തുകൊണ്ട് മുദ്രാവാക്യം വിളിക്കുന്ന ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചിരുന്നു.
പ്രദേശത്ത് ബോധപൂർവം കലാപാഹ്വാനം ഉണ്ടാക്കുക എന്ന ലക്ഷ്യത്തോടെയാണ് വിദ്യാർത്ഥികൾ ഇത്തരത്തിൽ പെരുമാറിയതെന്ന് പ്രഥമവിവര റിപ്പോർട്ടിൽ (എഫ്.ഐ.ആർ) വ്യക്തമാക്കുന്നു. മണ്ണാർക്കാട്ടെ ബിജെപി നേതാവായ ബിജു നൽകിയ ഔദ്യോഗിക പരാതിയുടെ അടിസ്ഥാനത്തിലാണ് പോലീസ് നടപടി. സംഭവത്തിൽ ഭാരതീയ ന്യായ സംഹിത (BNS) സെക്ഷൻ 192 പ്രകാരം കേസെടുത്ത് അന്വേഷണം ആരംഭിച്ചതായി മണ്ണാർക്കാട് പോലീസ് അറിയിച്ചു.
