By കാൻസർ രോഗികൾക്ക് വലിയ ആശ്വാസം; ജീവൻരക്ഷാ മരുന്നുകളുടെ വില 70 ശതമാനം വരെ കുറഞ്ഞേക്കും,. നിലവിൽ 2,700 രൂപ മാത്രം വിലവരുന്ന മരുന്ന് വിപണിയിൽ 27,000 രൂപയ്ക്കാണ് വിൽക്കുന്നത്
ന്യൂഡൽഹി: കാൻസർ ഉൾപ്പെടെയുള്ള ജീവൻരക്ഷാ മരുന്നുകളുടെ അമിതവില നിയന്ത്രിക്കുന്നതിനായി കേന്ദ്രസർക്കാർ സുപ്രധാന നടപടികളിലേക്ക്. സുപ്രീം കോടതിയുടെ ശക്തമായ വിമർശനത്തിന് പിന്നാലെയാണ് മരുന്നുവില കുത്തനെ കുറയ്ക്കാനുള്ള പുതിയ നീക്കവുമായി സർക്കാർ രംഗത്തെത്തിയിരിക്കുന്നത്.
വിപണിയിൽ മരുന്നുകൾക്ക് ഈടാക്കുന്ന വ്യാപാര ലാഭവിഹിതം അഥവാ ട്രേഡ് മാർജിൻ 30 ശതമാനമായി പരിമിതപ്പെടുത്താനാണ് നീക്കം. വിതരണക്കാർക്ക് നൽകുന്ന യഥാർത്ഥ വിലയ്ക്ക് മുകളിലായി മാർജിൻ നിശ്ചയിക്കുന്നതോടെ പേറ്റന്റുള്ള മരുന്നുകൾ ഉൾപ്പെടെയുള്ളവയ്ക്ക് 70 ശതമാനം വരെ വിലക്കുറവ് ഉണ്ടായേക്കുമെന്നാണ് റിപ്പോർട്ടുകൾ വ്യക്തമാക്കുന്നത്. ഉയർന്ന വിലയുള്ള മരുന്നുകളിൽ ചെറിയൊരു ലാഭവിഹിതം പോലും രോഗികൾക്ക് താങ്ങാനാവാത്ത വലിയ തുകയായി മാറുന്ന സാഹചര്യം ഒഴിവാക്കാനാണ് ഈ പുതിയ പടി.
ഇതിന്റെ ഭാഗമായി വില നിയന്ത്രണത്തിൽ ഉൾപ്പെടുത്തേണ്ട മരുന്നുകളുടെ പട്ടിക തയ്യാറാക്കാൻ ഡയറക്ടർ ജനറൽ ഓഫ് ഹെൽത്ത് സർവീസസിന്റെ നേതൃത്വത്തിലുള്ള സമിതി ഇതിനോടകം നടപടികൾ ആരംഭിച്ചു കഴിഞ്ഞു. ഇന്ത്യയിൽ കാൻസർ ചികിത്സയ്ക്കായി അംഗീകരിച്ചിട്ടുള്ളതും ഏറ്റവും അധികം ഉപയോഗിക്കപ്പെടുന്നതുമായ മരുന്നുകളായിരിക്കും പ്രധാനമായും ഈ പട്ടികയിൽ ഉൾപ്പെടുത്തുക. 2019-ൽ 42 കാൻസർ മരുന്നുകളുടെ വ്യാപാര മാർജിൻ പരിമിതപ്പെടുത്തിക്കൊണ്ട് നടപ്പിലാക്കിയ പൈലറ്റ് പദ്ധതിയുടെ തുടർച്ചയാണ് നിലവിലെ ഈ വിപുലമായ നീക്കം. ഔദ്യോഗിക നടപടിക്രമങ്ങൾ പൂർത്തിയാക്കി അടുത്ത 10 ദിവസത്തിനുള്ളിൽ പുതിയ ഉത്തരവുകൾ പ്രാബല്യത്തിൽ വരുമെന്നാണ് പ്രതീക്ഷിക്കുന്നത്.
ചില ജീവൻരക്ഷാ മരുന്നുകൾക്ക് അമിതമായി പത്തിരട്ടിവില വരെ ഈടാക്കുന്നുവെന്ന് സുപ്രീംകോടതി നേരത്തെ കടുത്ത വിമർശനം ഉന്നയിച്ചിരുന്നു. 2,700 രൂപ മാത്രം വിലവരുന്ന മരുന്ന് വിപണിയിൽ 27,000 രൂപയ്ക്കാണ് വിൽക്കുന്നത് എന്നായിരുന്നു കോടതിയുടെ പ്രധാന നിരീക്ഷണം. അതേസമയം, വിലകുറഞ്ഞ മരുന്നുകൾക്കും 30 ശതമാനം എന്ന ഏകീകൃത മാർജിൻ പരിധി ബാധകമാക്കിയാൽ, കമ്പനികൾ കുറഞ്ഞ വിലയുള്ള മരുന്നുകൾ വിപണിയിൽ എത്തിക്കാൻ മടിച്ചേക്കുമോ എന്ന ആശങ്കയും വിദഗ്ധർക്കിടയിൽ ഉയരുന്നുണ്ട്. എങ്കിലും കാൻസർ രോഗികൾക്കും അവരുടെ കുടുംബങ്ങൾക്കും ഏറെ സാമ്പത്തിക ആശ്വാസം നൽകുന്ന ഒന്നായിരിക്കും സർക്കാരിന്റെ ഈ പുതിയ തീരുമാനം.
