By കാസർകോട് അടക്കം 6 ജില്ലകളിൽ ഓറഞ്ച് അലർട്ട്, ഓണക്കനവുകൾക്ക് മേൽ തോരാപ്പെയ്ത്ത്
പൂക്കളവും കോടിവസ്ത്രങ്ങളും സദ്യവട്ടങ്ങളുമായി നാടും നഗരവും കാത്തിരുന്ന തിരുവോണനാളിലേക്ക് ഇനി മണിക്കൂറുകൾ മാത്രം ബാക്കിനിൽക്കെ, മലയാളിയുടെ ഓണക്കനവുകൾക്ക് മേൽ ആശങ്കയുടെ പെരുമഴക്കാലം. കാസർകോട് ഉൾപ്പെടെ ആറ് ജില്ലകളിൽ കാലാവസ്ഥാ നിരീക്ഷണ കേന്ദ്രം ഓറഞ്ച് അലർട്ട് പ്രഖ്യാപിച്ചതോടെ, നാടാകെ ഉറ്റുനോക്കിയ ഉത്രാടപ്പാച്ചിൽ പലയിടത്തും മഴയിൽ മുങ്ങി.
കണ്ണീരിലായി തെരുവോര വിപണി
വർഷം മുഴുവൻ കാത്തിരുന്ന്, കടം വാങ്ങിയും വായ്പയെടുത്തും ഓണവിപണിയിലേക്ക് സാധനങ്ങൾ എത്തിച്ച ചെറുകിട വ്യാപാരികളാണ് ഏറ്റവും വലിയ പ്രതിസന്ധിയിലായത്. തെരുവിൽ വസ്ത്രങ്ങളും പൂക്കളും കളിപ്പാട്ടങ്ങളും നിരത്തി കാത്തിരുന്ന കച്ചവടക്കാർക്ക് മുന്നിലേക്ക് ആളുകൾക്ക് പകരം എത്തിയത് ഇരച്ചെത്തിയ പേമാരിയാണ്. ഒരു വർഷത്തെ മുഴുവൻ അന്നം കണ്ടെത്താമെന്ന വ്യാപാരികളുടെ പ്രതീക്ഷകൾക്കാണ് ഈ തോരാമഴ തിരിച്ചടിയാകുന്നത്.
മഴ നനയുന്ന ഓണക്കോടികൾ
കുട്ടികൾക്കായി വാങ്ങിവെച്ച പുതിയ ഉടുപ്പുകളിട്ട്, ബന്ധുവീടുകൾ സന്ദർശിക്കാനും ഓണക്കളികളിൽ ഏർപ്പെടാനും കാത്തിരുന്ന സാധാരണക്കാരുടെ സന്തോഷങ്ങൾക്കും മഴ തടസ്സമാകുന്നു. തെരുവുകളിൽ ആളനക്കം കുറഞ്ഞതോടെ ഉത്സവപ്പറമ്പുകൾ പോലെ തിളങ്ങേണ്ടിയിരുന്ന നഗരവീഥികൾ മൂകമായി.
ജാഗ്രതാനിർദേശം ഇങ്ങനെ:
- ഉരുൾപൊട്ടൽ, മണ്ണിടിച്ചിൽ, മലവെള്ളപ്പാച്ചിൽ സാധ്യതയുള്ള പ്രദേശങ്ങളിൽ താമസിക്കുന്നവർ അധികൃതരുടെ നിർദേശാനുസരണം സുരക്ഷിതമായ സ്ഥലങ്ങളിലേക്ക് മാറി താമസിക്കണം.
- നദിക്കരകൾ, അണക്കെട്ടുകളുടെ കീഴ്പ്രദേശങ്ങൾ എന്നിവിടങ്ങളിൽ താമസിക്കുന്നവരും അപകടസാധ്യത മുൻകൂട്ടി കണ്ട് അധികൃതരുടെ നിർദേശാനുസരണം മാറി താമസിക്കേണ്ടതാണ്.
- ദുരന്തസാധ്യത പ്രദേശങ്ങളിൽ താമസിക്കുന്നവർ നിർബന്ധമായും തങ്ങളുടെ പ്രദേശത്ത് ക്യാമ്പുകൾ തുറന്നു എന്നുറപ്പാക്കേണ്ടതും പകൽ സമയത്ത് തന്നെ അങ്ങോട്ട് മാറി താമസിക്കേണ്ടതുമാണ്. ഇതിനായി തദ്ദേശ സ്ഥാപന, റവന്യൂ അധികാരികളുമായി ബന്ധപ്പെടാവുന്നതാണ്.
- ശക്തമായ കാറ്റിന് സാധ്യതയുള്ളതിനാൽ അടച്ചുറപ്പില്ലാത്ത വീടുകളിൽ താമസിക്കുന്നവരും മേൽക്കൂര ശക്തമല്ലാത്ത വീടുകളിൽ താമസിക്കുന്നവരും പ്രത്യേക ജാഗ്രത പാലിക്കേണ്ടതാണ്. അപകടാവസ്ഥ മുന്നിൽ കാണുന്നവർ അധികൃതരുമായി ബന്ധപ്പെട്ട് സുരക്ഷിതമായ സ്ഥലങ്ങളിലേക്ക് സുരക്ഷാ മുൻകരുതലിന്റെ ഭാഗമായി മാറി താമസിക്കണം.
- കാറ്റിൽ മരങ്ങൾ കടപുഴകി വീണും പോസ്റ്റുകൾ തകർന്നു വീണും ഉണ്ടാകാനിടയുള്ള അപകടങ്ങളെയും ശ്രദ്ധിക്കേണ്ടതാണ്. സംസ്ഥാന ദുരന്ത നിവാരണ അതോറിറ്റി പുറപ്പെടുവിച്ച ശക്തമായ കാറ്റിൽ സ്വീകരിക്കേണ്ട മുൻകരുതൽ നടപടികൾ /windwarning/ എന്ന ലിങ്കിൽ ലഭ്യമാണ്
- ശക്തമായ മഴ പെയ്യുന്ന സാഹചര്യത്തിൽ ഒരു കാരണവശാലും നദികൾ മുറിച്ചു കടക്കാനോ, നദികളിലോ മറ്റ് ജലാശയങ്ങളിലോ കുളിക്കാനോ മീൻപിടിക്കാനോ മറ്റ് ആവശ്യങ്ങൾക്കോ ഇറങ്ങാൻ പാടുള്ളതല്ല.
- ജലാശയങ്ങൾക്ക് മുകളിലെ മേൽപ്പാലങ്ങളിൽ കയറി കാഴ്ച കാണുകയോ സെൽഫി എടുക്കുകയോ ചിത്രങ്ങൾ പകർത്തുകയോ കൂട്ടം കൂടി നിൽക്കുകയോ ചെയ്യാൻ പാടുള്ളതല്ല.
- മഴ ശക്തമാകുന്ന അവസരങ്ങളിൽ അത്യാവശ്യമല്ലാത്ത യാത്രകൾ പൂർണമായും ഒഴിവാക്കുക. വെള്ളച്ചാട്ടങ്ങൾ, ജലാശയങ്ങൾ, മലയോര മേഖലകൾ എന്നിവിടങ്ങളിലേക്കുള്ള വിനോദയാത്രകൾ മഴ മുന്നറിയിപ്പ് മാറുന്നത് വരെ പൂർണമായി ഒഴിവാക്കേണ്ടതാണ്.
- ജലാശയങ്ങളോട് ചേർന്ന റോഡുകളിലൂടെയുള്ള യാത്രകളിൽ പ്രത്യേക ജാഗ്രത പാലിക്കുക. അറ്റകുറ്റപ്പണികൾ നടക്കുന്ന റോഡുകളിലും ജാഗ്രത പാലിക്കുക. അതിശക്തമായ മഴയുണ്ടാകുന്ന സാഹചര്യത്തിൽ റോഡപകടങ്ങൾ വർധിക്കാൻ സാധ്യത മുന്നിൽ കാണണം. ജലാശയങ്ങൾ കരകവിഞ്ഞ് ഒഴുകുന്നയിടങ്ങളിൽ വാഹനം ഓടിക്കാൻ ശ്രമിക്കരുത്.
- സ്വകാര്യ – പൊതു ഇടങ്ങളിൽ അപകടാവസ്ഥയിൽ നിൽക്കുന്ന മരങ്ങൾ/പോസ്റ്റുകൾ/ബോർഡുകൾ, മതിലുകൾ തുടങ്ങിയവ സുരക്ഷിതമാക്കേണ്ടതും മരങ്ങൾ കോതി ഒതുക്കുകയും ചെയ്യേണ്ടതാണ്. അപകടാവസ്ഥകൾ അധികൃതരുടെ ശ്രദ്ധയിൽ പെടുത്തേണ്ടതാണ്.
പ്രതികൂല കാലാവസ്ഥയിലും പെയ്തൊഴിയാത്ത മഴയെ വകഞ്ഞുമാറ്റി, തങ്ങളുടെ വലിയൊരു കാത്തിരിപ്പ് പൂർത്തിയാക്കാൻ കുടചൂടി തെരുവിലേക്ക് ഇറങ്ങുകയാണ് മലയാളികൾ. എങ്കിലും, ആകാശത്തെ കാർമേഘങ്ങൾ മാഞ്ഞ് ഒരു തെളിഞ്ഞ തിരുവോണപ്പുലരി പിറക്കുമെന്ന പ്രതീക്ഷയിലാണ് ഓരോ മനസ്സും
