കാസർകോടിന്റെ മുൻ കളക്ടർ ഡോ. ഡി. സജിത് ബാബു കേരളത്തിന്റെ പുതിയ ചീഫ് ഇലക്ടറൽ ഓഫീസറാകും

ഔദ്യോഗിക ഉത്തരവ് ഉടൻ — 2012 ബാച്ച് ഐ.എ.എസ് ഉദ്യോഗസ്ഥന് പുതിയ ദൗത്യം

തിരുവനന്തപുരം: കേരളത്തിന്റെ പുതിയ ചീഫ് ഇലക്ടറൽ ഓഫീസറായി ഡോ. ഡി. സജിത് ബാബു ഐ.എ.എസ്. നിയമിതനായേക്കും. സംസ്ഥാന സർക്കാർ നൽകിയ മൂന്ന് പേരുടെ പട്ടികയിൽ നിന്ന് കേന്ദ്ര തിരഞ്ഞെടുപ്പ് കമ്മിഷൻ ഡോ. ഡി. സജിത് ബാബുവിനെ തിരഞ്ഞെടുത്തതായാണ് വിവരം. സംസ്ഥാന സർക്കാരിന്റെ ഔദ്യോഗിക ഉത്തരവ് ഉടൻ പുറത്തിറങ്ങും.

നിലവിൽ പൊതുവിദ്യാഭ്യാസ വകുപ്പിൽ സ്പെഷ്യൽ സെക്രട്ടറിയായി പ്രവർത്തിക്കുന്ന ഡോ. ഡി. സജിത് ബാബു 2012 ബാച്ച് കേരള കേഡർ ഐ.എ.എസ് ഉദ്യോഗസ്ഥനാണ്. 2026 ജൂണിലെ ഐ.എ.എസ് പുനഃക്രമീകരണത്തിൽ സഹകരണ രജിസ്ട്രാർ സ്ഥാനത്തുനിന്ന് പൊതുവിദ്യാഭ്യാസ വകുപ്പിലെ സ്പെഷ്യൽ സെക്രട്ടറിയായി നിയമിക്കപ്പെട്ട അദ്ദേഹത്തിന് ന്യൂനപക്ഷ ക്ഷേമ വകുപ്പിന്റെ അധിക ചുമതലയും നൽകിയിരുന്നു.

കേരള ഭരണരംഗത്ത് വിവിധ സുപ്രധാന ചുമതലകൾ വഹിച്ചിട്ടുള്ള ഉദ്യോഗസ്ഥനാണ് സജിത് ബാബു. ജില്ലാ കളക്ടർ, സിവിൽ സപ്ലൈസ് കമ്മിഷണർ, സഹകരണ രജിസ്ട്രാർ, നാഷണൽ ആയുഷ് മിഷൻ സ്റ്റേറ്റ് മിഷൻ ഡയറക്ടർ, ഇൻസ്റ്റിറ്റ്യൂട്ട് ഓഫ് ലാൻഡ് ആൻഡ് ഡിസാസ്റ്റർ മാനേജ്മെന്റ് എക്സിക്യൂട്ടീവ് ഡയറക്ടർ തുടങ്ങിയ നിലകളിൽ പ്രവർത്തിച്ചിട്ടുണ്ട്.

കാസർകോടുമായി അടുത്ത ബന്ധമുള്ള ഭരണാധികാരി

കാസർകോട് ജില്ലാ കളക്ടറായിരുന്ന കാലയളവിലാണ് ഡോ. സജിത് ബാബു ജില്ലയിൽ ഏറെ ശ്രദ്ധിക്കപ്പെട്ടത്. 2018 മുതൽ 2021 വരെ കാസർകോട് ജില്ലാ കളക്ടറായി പ്രവർത്തിച്ച അദ്ദേഹം ജില്ലാ ദുരന്തനിവാരണ അതോറിറ്റിയുടെ ചെയർമാനായും പ്രവർത്തിച്ചിരുന്നു. തിരഞ്ഞെടുപ്പ് കാലത്തെ ഭരണനിർവഹണം, കോവിഡ് പ്രതിരോധ പ്രവർത്തനങ്ങൾ, സാമൂഹിക സുരക്ഷാ പദ്ധതികൾ തുടങ്ങിയ മേഖലകളിൽ ജില്ലാ ഭരണകൂടത്തിന് നേതൃത്വം നൽകി.

കാസർകോട് ജില്ലാ ഭരണകൂടത്തിന്റെ ‘WeDeserve – Right Assistance to the Right Person at the Right Time’ എന്ന ഇ-ഗവേണൻസ് പദ്ധതിക്ക് 2019-20ലെ ദേശീയ ഇ-ഗവേണൻസ് പുരസ്കാരത്തിൽ ഗോൾഡ് അംഗീകാരം ലഭിച്ചിരുന്നു. പദ്ധതിയുടെ പ്രോജക്ട് ഹെഡായി അന്നത്തെ ജില്ലാ കളക്ടർ ഡോ. ഡി. സജിത് ബാബുവിന്റെ പേരും കേന്ദ്ര സർക്കാരിന്റെ പുരസ്കാര രേഖയിൽ ഉൾപ്പെട്ടിട്ടുണ്ട്. ഭിന്നശേഷിക്കാർ ഉൾപ്പെടെയുള്ള അർഹരായ ആളുകളിലേക്ക് സർക്കാർ സേവനങ്ങളും സഹായങ്ങളും കൂടുതൽ കാര്യക്ഷമമായി എത്തിക്കുകയായിരുന്നു പദ്ധതിയുടെ ലക്ഷ്യം.

കോവിഡ് കാലത്തും കാസർകോട് ജില്ലയുടെ ഭരണനിർവഹണത്തിൽ അദ്ദേഹം നിർണായക ചുമതല വഹിച്ചു. ദുരന്തനിവാരണവുമായി ബന്ധപ്പെട്ട സംസ്ഥാനതല യോഗങ്ങളിലും പരിശീലന പരിപാടികളിലും കാസർകോട് ജില്ലാ ദുരന്തനിവാരണ അതോറിറ്റി ചെയർമാനെന്ന നിലയിൽ പങ്കെടുത്തിരുന്നു.

വിദ്യാഭ്യാസ രംഗത്തും വ്യത്യസ്ത അക്കാദമിക് പശ്ചാത്തലം

ഭരണരംഗത്തേക്ക് എത്തുന്നതിന് മുമ്പ് അക്കാദമിക്, ബാങ്കിംഗ് മേഖലകളിലും പ്രവർത്തിച്ചിട്ടുള്ള ഉദ്യോഗസ്ഥനാണ് ഡോ. സജിത് ബാബു. കേരള കാർഷിക സർവകലാശാലയിൽ അസിസ്റ്റന്റ് പ്രൊഫസറായി പ്രവർത്തിച്ചിട്ടുണ്ട്. കോർപ്പറേഷൻ ബാങ്കിലും സേവനമനുഷ്ഠിച്ച ശേഷമാണ് റവന്യൂ ഭരണരംഗത്ത് പ്രവേശിച്ചത്.

കൃഷിശാസ്ത്രത്തിൽ ബിരുദവും ബിരുദാനന്തര ബിരുദവും കൂടാതെ കാർഷിക മേഖലയിലെ പി.എച്ച്.ഡി.യും ഉൾപ്പെടെ വിവിധ അക്കാദമിക് യോഗ്യതകൾ അദ്ദേഹത്തിനുണ്ട്. നിയമം, കൊമേഴ്സ്, മാനേജ്മെന്റ്, ബാങ്കിംഗ് തുടങ്ങിയ മേഖലകളിലും അധിക യോഗ്യതകൾ നേടിയിട്ടുണ്ട് .

ജില്ലാ ഭരണസംവിധാനവുമായി ബന്ധപ്പെട്ട് ‘Powers and Functions of District Collectors’ എന്ന പുസ്തകവും ഡോ. സജിത് ബാബു രചിച്ചിട്ടുണ്ട്. 2026 ജൂലൈയിൽ തിരുവനന്തപുരത്ത് വെച്ചാണ് പുസ്തകത്തിന്റെ പ്രകാശനം നടത്തിയത് .

വിവിധ വകുപ്പുകളിൽ ശ്രദ്ധേയമായ ചുമതലകൾ

2018ൽ സഹകരണ രജിസ്ട്രാർ സ്ഥാനത്തും തുടർന്ന് കാസർകോട് ജില്ലാ കളക്ടറായും സേവനമനുഷ്ഠിച്ച അദ്ദേഹം പിന്നീട് സിവിൽ സപ്ലൈസ് വകുപ്പിന്റെ കമ്മിഷണറായി ചുമതലയേറ്റു. നാഷണൽ ആയുഷ് മിഷന്റെ സ്റ്റേറ്റ് മിഷൻ ഡയറക്ടറായും പ്രവർത്തിച്ചു. 2024 മുതൽ സഹകരണ രജിസ്ട്രാർ സ്ഥാനവും വഹിച്ചു.

2026 ജൂണിലെ സംസ്ഥാനത്തെ വലിയ ഐ.എ.എസ് പുനഃക്രമീകരണത്തിന്റെ ഭാഗമായാണ് അദ്ദേഹത്തെ പൊതുവിദ്യാഭ്യാസ വകുപ്പിലെ സ്പെഷ്യൽ സെക്രട്ടറിയായി നിയമിച്ചത്. സമഗ്ര ശിക്ഷ കേരളയുടെ , സ്പെഷ്യൽ സെക്രട്ടറി, ജനറൽ എജ്യുക്കേഷൻ എന്ന നിലയിലും സേവനം നൽകിയിട്ടുണ്ട് .

ഇനി തിരഞ്ഞെടുപ്പ് ദൗത്യം

ചീഫ് ഇലക്ടറൽ ഓഫീസർ സ്ഥാനത്തേക്ക് സജിത് ബാബുവിന്റെ പേര് തിരഞ്ഞെടുക്കപ്പെട്ടതോടെ കേരളത്തിലെ വരാനിരിക്കുന്ന തിരഞ്ഞെടുപ്പ് പ്രവർത്തനങ്ങളുടെ ഏകോപനത്തിൽ അദ്ദേഹത്തിന് നിർണായക ഉത്തരവാദിത്വമാണ് ലഭിക്കുക. വോട്ടർ പട്ടിക പുതുക്കൽ, തിരഞ്ഞെടുപ്പ് നടപടികളുടെ ഏകോപനം, ജില്ലാ തിരഞ്ഞെടുപ്പ് സംവിധാനങ്ങളുടെ മേൽനോട്ടം, തിരഞ്ഞെടുപ്പ് കമ്മിഷന്റെ നിർദേശങ്ങൾ സംസ്ഥാനത്ത് നടപ്പാക്കൽ തുടങ്ങിയ സുപ്രധാന ചുമതലകൾ ചീഫ് ഇലക്ടറൽ ഓഫീസർക്കാണ്.

കാസർകോട് ജില്ലാ കളക്ടറെന്ന നിലയിൽ തിരഞ്ഞെടുപ്പ് ഭരണത്തിന്റെ നേരിട്ടുള്ള അനുഭവമുള്ള സജിത് ബാബുവിന് പുതിയ ചുമതല കൂടുതൽ പ്രസക്തമാകുകയാണ്. 2019ലെ ലോക്സഭാ തിരഞ്ഞെടുപ്പിൽ കാസർകോട് പാർലമെന്റ് മണ്ഡലത്തിന്റെ റിട്ടേണിംഗ് ഓഫീസറായും അദ്ദേഹം പ്രവർത്തിച്ചിരുന്നു .

നിലവിലെ ചീഫ് ഇലക്ടറൽ ഓഫീസർ ഡോ. എ. കൗശിഗൻ ഐ.എ.എസ് ആണ്. അദ്ദേഹത്തിന്റെ കേന്ദ്ര ഡെപ്യൂട്ടേഷൻ പശ്ചാത്തലത്തിലാണ് പുതിയ നിയമനത്തിനുള്ള നടപടികൾ നടന്നത്. ഔദ്യോഗിക സർക്കാർ ഉത്തരവ് പുറത്തിറങ്ങുന്നതോടെ ഡോ. ഡി. സജിത് ബാബു കേരളത്തിന്റെ പുതിയ ചീഫ് ഇലക്ടറൽ ഓഫീസറായി ചുമതലയേൽക്കും.