By ഒരിക്കലും തീരാത്ത വേദന; എൻഡോസൾഫാൻ ദുരിതബാധിതരിൽ ഒരാൾ കൂടി വിടവാങ്ങി
കാസർകോട്: എൻഡോസൾഫാൻ ദുരിതത്തിന്റെ മുറിവുകൾ ഇനിയും ഉണങ്ങിയിട്ടില്ല. ഓരോ മരണവും ആ ദുരന്തത്തിന്റെ ബാക്കിപത്രത്തിലെ മറ്റൊരു കറുത്ത വരിയായി മാറുമ്പോൾ, കാസർകോട് ഒരിക്കൽ കൂടി വേദനയിൽ. എൻഡോസൾഫാൻ ദുരിതബാധിതയായി ചികിത്സയിലായിരുന്ന ഒരാൾ കൂടി മരണത്തിന് കീഴടങ്ങി.
കല്ലക്കട്ട ചിത്താരിക്കുന്നിലെ ഷേഖ് ഹസീന (37) യാണ് മരിച്ചത്. ജന്മനാ കിടപ്പിലായിരുന്ന ഹസീന ബുദ്ധിപരമായ വെല്ലുവിളികളും നേരിട്ടിരുന്നു. ജീവിതത്തിന്റെ പിന്നീടുള്ള ഘട്ടത്തിൽ അർബുദവും പിടികൂടി. രോഗം മൂർച്ഛിച്ചതിനെ തുടർന്നായിരുന്നു അന്ത്യം.
വേദനകൾക്കിടയിലും ഹസീനയുടെ ജീവിതത്തിലേക്ക് ഒരിക്കൽ പ്രതീക്ഷയുടെ ഒരു കിരണം കടന്നുവന്നിരുന്നു. കാഞ്ഞങ്ങാട് നെഹ്റു കോളേജ് സാഹിത്യവേദിയുടെ ഭവനനിർമാണ പദ്ധതിയിൽ ഉൾപ്പെടുത്തി സിനിമാതാരവും കേന്ദ്രമന്ത്രിയുമായ സുരേഷ് ഗോപി ഹസീനയ്ക്കും കുടുംബത്തിനും വീട് കൈമാറിയിരുന്നു. സുരക്ഷിതമായൊരു വീടെന്ന സ്വപ്നം യാഥാർഥ്യമായെങ്കിലും, രോഗങ്ങളുടെ പിടിയിൽ നിന്ന് ആ ജീവിതത്തിന് മോചനം ലഭിച്ചില്ല. കരീം–ബൾക്കീസ് ദമ്പതികളുടെ മകളാണ് ഹസീന. സഹോദരൻ: അഷ്റഫ്.
ഹസീനയുടെ വേർപാട് ഒരു കുടുംബത്തിന്റെ മാത്രം ദുഃഖമല്ല. കാസർകോടിന്റെ മണ്ണിൽ പതിറ്റാണ്ടുകളായി തുടരുന്ന എൻഡോസൾഫാൻ ദുരന്തത്തിന്റെ ആഴം വീണ്ടും ഓർമിപ്പിക്കുന്ന വേദനാജനകമായ വാർത്ത കൂടിയാണിത്.
ഒരുകാലത്ത് പ്രതീക്ഷകളോടെ വളരേണ്ടിയിരുന്ന ജീവിതങ്ങൾ രോഗങ്ങളുടെയും പരിമിതികളുടെയും വേദനകളുടെയും നടുവിൽ ഒതുങ്ങിപ്പോയി. പലർക്കും ബാല്യം മുതൽ തന്നെ കിടപ്പിലാകേണ്ടിവന്നു. ചിലർക്ക് ബുദ്ധിപരമായ വെല്ലുവിളികൾ നേരിടേണ്ടിവന്നു. മറ്റുചിലരുടെ ജീവിതത്തിലേക്ക് മാരകരോഗങ്ങളും കടന്നുവന്നു.
മരണങ്ങൾ ഒന്നിനു പിന്നാലെ ഒന്നായി എത്തുമ്പോൾ, എൻഡോസൾഫാൻ ദുരിതത്തിന്റെ കണക്കുകളിൽ ചേർക്കപ്പെടുന്ന മറ്റൊരു പേര് മാത്രമല്ല ഹസീനയുടേത്. ജീവിക്കാൻ ഏറെ ആഗ്രഹിച്ചിട്ടും അതിന് കഴിയാതെ പോയ ഒരു ജീവിതത്തിന്റെ ഓർമ കൂടിയാണ്.
