By ആത്മീയ സൂര്യനസ്തമിച്ചു; ഖാളി ത്വാഖാ അഹമ്മദ് മുസ്ലിയാർ ഇനി നോവോർമ്മ; കണ്ണീരണിഞ്ഞ് കേരളക്കരയും കർണാടകയും
ചെമ്പരിക്ക/മംഗലാപുരം: വിശ്വാസി ഹൃദയങ്ങളിൽ വിജ്ഞാനത്തിൻ്റെയും ലാളിത്യത്തിൻ്റെയും പവിത്രമായ പ്രകാശം പരത്തിയ ആ വലിയ വെളിച്ചം ഒടുവിൽ അണഞ്ഞു. സമസ്ത കേരള ജംഇയ്യത്തുൽ ഉലമയുടെ സമുന്നത നേതാവും മംഗലാപുരം-ചെമ്പരിക്ക-കീഴൂർ സംയുക്ത ജമാഅത്ത് ഖാളിയുമായ ബഹുമാനപ്പെട്ട ത്വാഖാ അഹമ്മദ് മുസ്ലിയാർ അല്ലാഹുവിൻ്റെ വിളിക്കുത്തരം നൽകി ഈ നശ്വര ലോകത്തോട് വിടപറഞ്ഞു (ഇന്നാ ലില്ലാഹി വ ഇന്നാ ഇലൈഹി റാജിഊൻ). വാർദ്ധക്യസഹജമായ അസുഖങ്ങളെത്തുടർന്ന് മംഗലാപുരത്തെ എനപ്പോയ ആശുപത്രിയിൽ ചികിത്സയിലായിരിക്കെ ഇന്ന് ചൊവ്വാഴ്ച രാവിലെ 10:30 ഓടെയായിരുന്നു 80 വയസ്സുകാരനായ ആ പുണ്യത്മാവിൻ്റെ വിയോഗം. ആത്മീയതയുടെ തണൽ തേടി ഒരുകൂട്ടം വിശ്വാസികൾ എന്നും ഓടിയെത്തിയിരുന്ന ആ വലിയ സാന്നിധ്യമാണ് ഇനി ഓർമ്മകളുടെ താളുകളിലേക്ക് മറയുന്നത്.
സമസ്ത കേരള ജംഇയ്യത്തുൽ ഉലമായുടെ കേന്ദ്ര മുശാവറ അംഗം, സമസ്ത കാസർഗോഡ് ജില്ലാ പ്രസിഡന്റ് എന്നീ പരമോന്നത പദവികൾ അലങ്കരിച്ച അദ്ദേഹം നൂറുകണക്കിന് മഹല്ലുകളുടെ വഴികാട്ടിയായിരുന്നു. ഇതിനുപുറമെ കാസിലൈൻ ബദ്രിയ മസ്ജിദ് പ്രസിഡന്റ്, റൗളത്തുൽ ഉലൂം സംഘം പ്രസിഡന്റ്, കർണാടക കാശിപട്ടണം ദാറുന്നൂർ കോളേജ് ചെയർമാൻ എന്നീ നിലകളിലെല്ലാം പതിറ്റാണ്ടുകളായി അദ്ദേഹം ചെയ്ത സമാനതകളില്ലാത്ത സേവനങ്ങൾ ഒന്നുമാത്രം മതി ആ വ്യക്തിത്വം എത്രത്തോളം ജനഹൃദയങ്ങളിൽ വേരൂന്നിയിരുന്നു എന്ന് മനസ്സിലാക്കാൻ. മുൻപ് ചെമ്പരിക്ക ഖാളിയായിരുന്ന പ്രമുഖ പണ്ഡിതൻ സി.എം. അബ്ദുള്ള മൗലവിയുടെ സഹോദരീപുത്രൻ കൂടിയായ ഉസ്താദ്, അഗാധമായ പാണ്ഡിത്യമുണ്ടായിട്ടും നെറ്റിയിൽ ഒട്ടും ഗർവില്ലാതെ, ആരെയും ആകർഷിക്കുന്ന ആ നിർമ്മലമായ പുഞ്ചിരിയോടെ മാത്രം സംസാരിക്കുന്ന ലാളിത്യത്തിൻ്റെ പര്യായമായിരുന്നു. ഒരു നാടിനെ മുഴുവൻ സന്മാർഗത്തിൻ്റെ വഴിയിലൂടെ കൈപിടിച്ചു നടത്തിയ ആ പവിത്രമായ ശബ്ദം ഇനി നമ്മെ തേടിയെത്തില്ല എന്ന കയ്പേറിയ സത്യം ഉൾക്കൊള്ളാനാകാതെ വിങ്ങിപ്പൊട്ടുകയാണ് കേരളത്തിലെയും കർണാടകയിലെയും വിശ്വാസി സമൂഹം.
ജാതി-മത ഭേദമന്യേ ഏതു സാധാരണക്കാരനും എപ്പോഴും സമീപിക്കാവുന്ന സാന്ത്വനമായിരുന്ന ഉസ്താദിൻ്റെ വേർപാട് നമ്മുടെ മത-സാമൂഹിക-സാംസ്കാരിക മേഖലകൾക്ക് ഒട്ടും നികത്താനാകാത്ത വലിയൊരു നഷ്ടം തന്നെയാണ്. ഒരു ആലിമിൻ്റെ മരണം ഒരു ലോകത്തിൻ്റെ മരണമാണെന്ന യാഥാർത്ഥ്യം ഓർമ്മിപ്പിച്ചുകൊണ്ട്, ഇനിയൊരു ഖാളി ഉസ്താദ് നമുക്ക് ഉണ്ടാകുമോ എന്ന ചോദ്യം ബാക്കിയാക്കി ആയിരങ്ങളെ കണ്ണീർക്കടലിലാഴ്ത്തിയാണ് ആ പുണ്യത്മാവ് യാത്രയായത്. ആശുപത്രിയിൽ നിന്നുള്ള മയ്യത്ത് നാട്ടിലേക്ക് കൊണ്ടുവരുന്നതിനുള്ള നടപടികൾ പുരോഗമിക്കുകയാണ്; ഖബറടക്ക സമയവും സ്ഥലവും പിന്നീട് തീരുമാനിക്കും.
അല്ലാഹു ഉസ്താദിൻ്റെ പരലോക ജീവിതം ധന്യമാക്കിക്കൊടുക്കട്ടെ, അവർ ചെയ്ത സൽക്കർമ്മങ്ങളെല്ലാം സ്വീകരിച്ച്, പിഴവുകൾ പൊറുത്ത്, മഗ്ഫിറത്തും മർഹമത്തും നൽകി അനുഗ്രഹിക്കുമാറാകട്ടെ. നാഥാ… നിൻ്റെ റഹ്മത്തിൻ്റെ വിശാലമായ ജന്നത്തുൽ ഫിർദൗസിൽ നമ്മുടെ പ്രിയപ്പെട്ട ഉസ്താദിന് ഉന്നതമായ സ്ഥാനം നൽകി അനുഗ്രഹിക്കണേ… ആമീൻ.
