By നാളേക്ക് വേണ്ടി നമ്മൾ കരുതിവെക്കുന്ന പച്ചപ്പുകൾ ഒരിക്കലും വീൺപോകില്ലെന്നതിന്റെ ജീവിക്കുന്ന തെളിവായി മാറുകയാണ് ചിറ്റാരിക്കാൽ പോലീസ് സ്റ്റേഷൻ പരിസരം. 2019-ൽ ചിറ്റാരിക്കാൽ സബ് ഇൻസ്പെക്ടർ (SI) ആയിരുന്ന സമയത്ത് പരിസ്ഥിതി ദിനത്തോടനുബന്ധിച്ച് ഉമേഷൻ കെ.വി നട്ടുപിടിപ്പിച്ച ഫലവൃക്ഷത്തൈകളാണ് ഇന്ന് സ്റ്റേഷൻ പരിസരത്ത് നിറയെ കായ്ച്ചു നിൽക്കുന്നത്.
അന്ന് അദ്ദേഹം ആ നിരയിൽ നട്ടുപിടിപ്പിച്ച തൈകളിൽ മൂന്നോളം മാവുകളും, ഒരു സപ്പോട്ട മരവും, റമ്പൂട്ടാനും ഉണ്ടായിരുന്നു. കഴിഞ്ഞ വർഷങ്ങളിൽ കായ്ക്കാതിരുന്ന റമ്പൂട്ടാൻ മരത്തിൽ ഇത്തവണയാണ് ആദ്യമായി കായ്കൾ ഉണ്ടായത്. സൂക്ഷിച്ചു നോക്കിയാൽ മരത്തിന്റെ മുകൾഭാഗത്ത് നിറയെ റമ്പൂട്ടാൻ പഴങ്ങൾ വിളഞ്ഞു നിൽക്കുന്നത് കാണാം.
ഏറ്റവും കൗതുകകരമായ കാര്യം, അന്ന് എസ്.ഐ ആയിരുന്ന ഉമേഷൻ കെ.വി ഇപ്പോൾ പ്രൊമോഷനായി ഇൻസ്പെക്ടർ (CI) ആയി വീണ്ടും ചിറ്റാരിക്കാൽ സ്റ്റേഷനിലേക്ക് തന്നെ തിരിച്ചെത്തിയിരിക്കുകയാണ്. താൻ വർഷങ്ങൾക്ക് മുൻപ് നട്ടുവളർത്തിയ കുഞ്ഞു തൈകൾ ഇന്ന് വലിയ മരങ്ങളായി പന്തലിച്ച്, അതിൽ കായ്കൾ നിറഞ്ഞുനിൽക്കുന്നത് കാണാൻ കഴിഞ്ഞതിന്റെ സന്തോഷത്തിലാണ് അദ്ദേഹം ഇപ്പോൾ.
ഒരു പോലീസ് ഉദ്യോഗസ്ഥൻ എന്ന നിലയിലുള്ള ഔദ്യോഗിക തിരക്കുകൾക്കിടയിലും പ്രകൃതിയെ സ്നേഹിക്കാനും പരിപാലിക്കാനും കാണിച്ച ആ മനസ്സിന് ഇന്ന് ചിറ്റാരിക്കാലിലെ ഉദ്യോഗസ്ഥരും നാട്ടുകാരും ഹൃദയം നിറഞ്ഞ നന്ദി പറയുകയാണ്. പുതിയ തലമുറയ്ക്കും മറ്റ് സഹപ്രവർത്തകർക്കും ഒരുപോലെ മാതൃകയും വലിയൊരു പ്രചോദനവുമാണ് ഇൻസ്പെക്ടർ ഉമേഷൻ കെ.വിയുടെ ഈ പച്ചപ്പുള്ള ഓർമ്മകൾ.
