By തിരുവനന്തപുരം: നെടുമങ്ങാട്ട് ഒന്നര വയസുകാരൻ ദുരൂഹ സാഹചര്യത്തിൽ മരിച്ച സംഭവത്തിൽ അന്വേഷണം ശക്തമാക്കി പൊലീസ്. നെടുമങ്ങാട് സ്വദേശിനിയായ അഖിലയുടെ മകൻ ആർഷിദിന്റെ മരണത്തിലാണ് ദുരൂഹതയുണ്ടെന്ന സംശയം ഉയർന്നിരിക്കുന്നത്.
കുഞ്ഞിന്റെ മരണത്തിന് പിന്നാലെ അമ്മയുടെ ഭർത്താവിനെതിരെ ഗുരുതര ആരോപണങ്ങളാണ് കുടുംബം ഉന്നയിച്ചിരിക്കുന്നത്. കുട്ടിയെ മർദിച്ചതിനെ തുടർന്നാകാം മരണമെന്ന് സംശയിക്കുന്നതായി ബന്ധുക്കൾ ആരോപിക്കുന്നു. സംഭവത്തിൽ അസ്വാഭാവിക മരണത്തിന് പൊലീസ് കേസെടുത്ത് അന്വേഷണം ആരംഭിച്ചു.
മരണത്തിന് മുൻപ് കുഞ്ഞിന് ശരീരത്തിൽ പരിക്കുകളുടെ ലക്ഷണങ്ങൾ ഉണ്ടായിരുന്നോയെന്നും മർദനമേറ്റിട്ടുണ്ടോയെന്നും ഉൾപ്പെടെയുള്ള കാര്യങ്ങൾ പൊലീസ് പരിശോധിച്ചുവരികയാണ്. പോസ്റ്റ്മോർട്ടം റിപ്പോർട്ടും മറ്റ് ശാസ്ത്രീയ പരിശോധനാഫലങ്ങളും ലഭിച്ച ശേഷമേ മരണകാരണം സംബന്ധിച്ച് വ്യക്തത ലഭിക്കൂ എന്ന് അന്വേഷണ ഉദ്യോഗസ്ഥർ അറിയിച്ചു.
സംഭവം വലിയ ചർച്ചയായതോടെ പട്ടികജാതി-പട്ടികവർഗ കമ്മീഷനും റിപ്പോർട്ട് തേടിയിട്ടുണ്ട്. കുഞ്ഞിന്റെ മരണത്തിന് പിന്നിലെ യഥാർത്ഥ കാരണം കണ്ടെത്തുന്നതിനായി വിശദമായ അന്വേഷണം തുടരുകയാണെന്ന് പൊലീസ് അറിയിച്ചു.
