പാർട്ടിക്കിടെ ശ്വാസതടസ്സം, യുവ എയർ ഹോസ്റ്റസിന് ദാരുണാന്ത്യം

ഗുരുഗ്രാം: വർണ്ണാഭമായ സ്വപ്നങ്ങളുമായി ആകാശചെരുവുകളിൽ പറന്നുയർന്ന സിമ്രാൻ ദദ്വാൾ എന്ന ഇരുപത്തിയഞ്ചുകാരിയുടെ ജീവിതയാത്ര അപ്രതീക്ഷിതമായി അവസാനിച്ചു. ഗുരുഗ്രാമിലെ സുഹൃത്തിന്റെ അപ്പാർട്മെന്റിൽ ശനിയാഴ്ച രാത്രി നടന്ന ചെറിയൊരു സൗഹൃദ കൂട്ടായ്മയ്ക്കിടെ ശ്വാസതടസ്സം അനുഭവപ്പെട്ട സിമ്രാൻ ചികിത്സയിലിരിക്കെയാണ് മരണത്തിന് കീഴടങ്ങിയത്. കഴിഞ്ഞ രണ്ട് വർഷമായി പ്രമുഖ സ്വകാര്യ വിമാനക്കമ്പനിയിൽ എയർ ഹോസ്റ്റസായി ജോലി ചെയ്തുവരികയായിരുന്നു പഞ്ചാബ് സ്വദേശിനിയായ ഈ യുവതി.

ഡൽഹിയിൽ സ്ഥിരതാമസമാക്കിയിരുന്ന സിമ്രാൻ, സുഹൃത്തുക്കൾക്കൊപ്പം പാർട്ടിയിൽ പങ്കെടുക്കാനാണ് ഗുരുഗ്രാം ഡിഎൽഎഫ് ഫേസ്-1 ലെ സുഹൃത്തിന്റെ അപ്പാർട്മെന്റിൽ എത്തിയത്. രാത്രിയിൽ സന്തോഷത്തോടെ സുഹൃത്തുക്കളുമായി സമയം പങ്കിട്ടെങ്കിലും, പുലർച്ചെ അഞ്ചുമണിയോടെ പെട്ടെന്ന് അനുഭവപ്പെട്ട ശക്തമായ ശ്വാസതടസ്സം സിമ്രാനെ അവശയാക്കുകയായിരുന്നു. ഉടൻതന്നെ പരിഭ്രാന്തരായ സുഹൃത്തുക്കൾ അവരെ സമീപത്തെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

ആരോഗ്യവതിയായിരുന്ന ഒരു യുവതിക്ക് അപ്രതീക്ഷിതമായി ഇത്തരമൊരു ശാരീരിക അസ്വസ്ഥത ഉണ്ടായതിന്റെ നടുക്കത്തിലാണ് സഹപ്രവർത്തകരും ബന്ധുക്കളും. മരണകാരണം സംബന്ധിച്ച് നിലവിൽ ദുരൂഹതകളൊന്നുമില്ലെങ്കിലും, പോസ്റ്റ്മോർട്ടം റിപ്പോർട്ട് പുറത്തുവന്നാൽ മാത്രമേ ശ്വാസതടസ്സത്തിന്റെ യഥാർത്ഥ കാരണം വ്യക്തമാകൂ എന്ന് പോലീസ് അറിയിച്ചു. സംഭവത്തിൽ ഗുരുഗ്രാം പോലീസ് അന്വേഷണം ആരംഭിച്ചിട്ടുണ്ട്.

മരണവാർത്തയറിഞ്ഞ് പഞ്ചാബിൽ നിന്നും കുടുംബാംഗങ്ങൾ ഗുരുഗ്രാമിൽ എത്തിയിട്ടുണ്ട്.

English Summary

Simran Dadwal, a 25-year-old air hostess working for a private airline, passed away following a sudden medical emergency during a gathering at a friend’s apartment in Gurugram. A native of Punjab residing in Delhi, Simran had visited her friends in DLF Phase-1 for the weekend. According to reports, she experienced severe breathing difficulties around 5:00 AM on Sunday. Although her friends rushed her to a nearby hospital, she succumbed during treatment. While no foul play is suspected, the police have initiated an investigation and are awaiting the post-mortem report to determine the exact cause of death.