മലപ്പുറം: വീടിന്റെ ഉമ്മറത്ത് കളിചിരികളുമായി നിറഞ്ഞാടിയ ഒരു വയസ്സുകാരന്റെ അപ്രതീക്ഷിത വിയോഗം ഒരു നാടിനെയാകെ കണ്ണീരിലാഴ്ത്തി. ചങ്ങരംകുളം പള്ളിക്കര തെക്കുമുറി സ്വദേശി മഹറൂഫിന്റെ മകൻ അസ്ലം നൂഹ് ആണ് കളിക്കിടെയുണ്ടായ ദാരുണമായ അപകടത്തിൽ മരിച്ചത്.

വീട്ടുമുറ്റത്ത് കളിച്ചുകൊണ്ടിരുന്ന കുഞ്ഞ് അശ്രദ്ധമായി കൈയിൽ കിട്ടിയ മണ്ണും കല്ലും വായിലിടുകയായിരുന്നു. ഇതുകണ്ട വീട്ടുകാർ ഉടനടി ഓടിയെത്തി വായിൽ നിന്ന് മണ്ണും കല്ലും നീക്കം ചെയ്യാൻ ശ്രമിച്ചെങ്കിലും, നിർഭാഗ്യവശാൽ ഒരു ചെറിയ കല്ല് തൊണ്ടയിൽ ഉറച്ചുപോയി. ശ്വാസനാളത്തിൽ കല്ല് കുടുങ്ങിയതോടെ കുഞ്ഞിന് കടുത്ത ശ്വാസതടസ്സം അനുഭവപ്പെടുകയും തളർന്നു വീഴുകയുമായിരുന്നു. പരിഭ്രാന്തരായ കുടുംബാംഗങ്ങൾ ഉടൻതന്നെ കുഞ്ഞിനെ അടുത്തുള്ള ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

സംഭവത്തിൽ ചങ്ങരംകുളം പോലീസ് കേസെടുത്ത് അന്വേഷണം ആരംഭിച്ചു. കളിച്ചിരികൾ മായും മുൻപേ വിടപറഞ്ഞ അസ്ലം നൂഹ് പള്ളിക്കര ഗ്രാമത്തിന് തീരാനോവായി മാറി.

കുട്ടികളുടെ കാര്യത്തിൽ നിസ്സാരമെന്നു കരുതി നാം അവഗണിക്കുന്ന പലതും വലിയ അപകടങ്ങളിലേക്ക് നയിക്കുമെന്നതിന്റെ നടുക്കുന്ന ഓർമ്മപ്പെടുത്തലാണ് ഈ സംഭവം. വീടിനുള്ളിലും മുറ്റത്തും കുട്ടികൾ കളിക്കുമ്പോൾ കല്ലുകൾ, നാണയങ്ങൾ, പ്ലാസ്റ്റിക് കഷണങ്ങൾ, ബട്ടണുകൾ തുടങ്ങിയ ചെറുവസ്തുക്കൾ അവരുടെ കൈയെത്തും ദൂരത്ത് ഇല്ലെന്ന് മുതിർന്നവർ ഉറപ്പുവരുത്തണം . ചെറിയ കുട്ടികൾ എന്തിനെയും വായിലിട്ട് പരിശോധിക്കുന്ന പ്രവണതയുള്ളവരായതിനാൽ മുതിർന്നവരുടെ നിരന്തരമായ ശ്രദ്ധ ഇത്തരം അപകടങ്ങൾ ഒഴിവാക്കാൻ അത്യന്താപേക്ഷിതമാണ്.

English Summary:

A tragic incident in Changaramkulam, Malappuram, left an entire community in shock after a one-year-old boy, Aslam Nuha, died when a small stone became lodged in his throat. The child, son of Maharoof of Pallikkara Thekkummuri, was playing in the courtyard on Monday afternoon (December 29) when he accidentally put mud and pebbles into his mouth. Though family members rushed to remove them, a pebble slipped into his throat, causing severe breathing difficulty. He was taken to a nearby hospital immediately but could not be saved. Health workers warn that small objects within the reach of toddlers pose serious choking risks and stress the importance of constant adult supervision. Changaramkulam Police have registered a case and begun an investigation. The child’s sudden death has cast a deep pall of grief over the village.