By കാസർകോട്: ജനാധിപത്യ പ്രക്രിയ സുഗമവും സമാധാനപരവുമാക്കാൻ എല്ലാ ഒരുക്കങ്ങളും പൂർത്തിയാക്കിയതായി ജില്ലാ ഭരണകൂടം അറിയിച്ചു. ത്രിതല പഞ്ചായത്ത് തിരഞ്ഞെടുപ്പ് നീതിയുക്തമായി നടത്താൻ ജില്ല പൂർണ്ണമായും സജ്ജമായതായി ജില്ലാ കളക്ടർ കെ. ഇമ്പശേഖറും ജില്ലാ പൊലീസ് മേധാവി വിജയഭാരത് റെഡ്ഡിയും അറിയിച്ചു .
വോട്ടെടുപ്പ് നടക്കുന്ന ഈ മാസം 11-ന് രാവിലെ ഏഴുമണി മുതൽ വൈകുന്നേരം ഏഴുമണിവരെയാണ് പോളിംഗ് സമയം. തിരഞ്ഞെടുപ്പ് പ്രക്രിയയുടെ സുഗമമായ നടത്തിപ്പിന് പൊതുജനങ്ങളുടെ പൂർണ്ണ സഹകരണം അനിവാര്യമാണെന്ന് ജില്ലാ അധികൃതർ അഭ്യർത്ഥിച്ചു.
പ്രശ്നബാധിത ബൂത്തുകളുടെ എണ്ണം കണക്കിലെടുത്ത് ജില്ലയിലെ സുരക്ഷാ സംവിധാനങ്ങൾ വൻതോതിൽ വർദ്ധിപ്പിച്ചതായി ജില്ലാ പോലീസ് മേധാവി അറിയിച്ചു. ജില്ലയിൽ 436 സെൻസിറ്റീവ് ബൂത്തുകളും 97 ക്രിട്ടിക്കൽ ബൂത്തുകളും ഉൾപ്പെടെ 533 പ്രശ്നസാധ്യതയുള്ള പോളിംഗ് കേന്ദ്രങ്ങൾ തിരിച്ചറിഞ്ഞിട്ടുണ്ട്. സമാധാന ലംഘനത്തിന് സാധ്യതയുള്ള ഈ മേഖലകളിലെല്ലാം സുരക്ഷാ വിന്യാസം ശക്തിപ്പെടുത്തി. ഇതിന്റെ ഭാഗമായി, പോലീസ്-ദ്രുതകർമ്മസേനയുടെ സംയുക്ത റൂട്ട് മാർച്ച് ആരംഭിച്ചു. നെല്ലിക്കുന്ന് പ്രദേശങ്ങൾ, കറന്തക്കാട് മുതൽ കാസർകോട് പുതിയ ബസ് സ്റ്റാൻഡ് വരെയുള്ള തന്ത്രപ്രധാന മേഖലകൾ എന്നിവിടങ്ങളിൽ തിങ്കളാഴ്ച റൂട്ട് മാർച്ച് നടന്നു. എ.എസ്.പി എം. നന്ദഗോപൻ, ദ്രുതകർമ്മസേന ഇൻസ്പെക്ടർ ജെ. ആൽബർട്ട്, അസിസ്റ്റന്റ് ഇൻസ്പെക്ടർമാരായ ജപകുമാർ, കെ.കെ. ജയ എന്നിവർ റൂട്ട് മാർച്ചിന് നേതൃത്വം നൽകി. ചൊവ്വാഴ്ചയും മറ്റു തന്ത്രപ്രധാന മേഖലകളിൽ റൂട്ട് മാർച്ച് തുടരുമെന്ന് പോലീസ് വിഭാഗം അറിയിച്ചു.
തിരഞ്ഞെടുപ്പ് സാമഗ്രികളുടെ വിതരണത്തിനായി പ്രത്യേക ക്രമീകരണങ്ങൾ ഏർപ്പെടുത്തിയിട്ടുണ്ടെന്ന് കളക്ടർ അറിയിച്ചു. വോട്ടിംഗ് ദിനത്തിൽ അനാവശ്യ തിരക്ക് ഒഴിവാക്കുകയും പോളിംഗ് കേന്ദ്രങ്ങളിലും പരിസരത്തും പൊതുശാന്തിയും ക്രമവും ഉറപ്പുവരുത്തേണ്ടത് തിരഞ്ഞെടുപ്പിന്റെ വിജയകരമായ നിർവഹണത്തിന് നിർണായകമാണെന്നും അദ്ദേഹം കൂട്ടിച്ചേർത്തു. ജില്ലയിലെ ജനാധിപത്യപരമായ കടമ നിറവേറ്റാൻ എല്ലാ വോട്ടർമാരും സമാധാനപരമായി സഹകരിക്കണമെന്ന് ജില്ലാ ഭരണകൂടം അഭ്യർത്ഥിച്ചു.
English Summary:
The Kasaragod district administration has completed all arrangements for the upcoming three-tier panchayat elections. Polling will be held on the 11th of this month from 7 AM to 7 PM. District Collector K. Imbashekhar and District Police Chief Vijayabharath Reddy stated that the district is fully prepared to conduct a peaceful and transparent election.
A total of 533 sensitive polling booths have been identified across the district, including 436 sensitive and 97 critical booths. In response, security has been significantly strengthened. Joint route marches by the police and Rapid Action Force have begun in strategically important areas such as Nellikkunnu, Karanthakkad, and routes leading to the new bus stand in Kasaragod. The march was led by ASP M. Nandagopan and other senior officers.
Special arrangements have also been made for the distribution of election materials. Authorities urged the public to avoid unnecessary crowding on polling day and to cooperate fully to ensure a smooth and peaceful democratic process.
