ഉപ്പളയിൽ വനിതാ ബിഎൽഒയെ തടഞ്ഞുനിർത്തി ഭീഷണി; ഔദ്യോഗിക വിവരങ്ങൾ ചോർത്തി; ബിജെപി പ്രവർത്തകൻ അറസ്റ്റിൽ

കാസർകോട്: തിരഞ്ഞെടുപ്പ് ഉദ്യോഗസ്ഥയുടെ (ബിഎൽഒ) ഔദ്യോഗിക കൃത്യനിർവഹണം തടസ്സപ്പെടുത്തുകയും, വോട്ടർ വിവരങ്ങൾ അടങ്ങിയ രഹസ്യരേഖകൾ ഫോണിലേക്ക് പകർത്തി വാട്‌സ്ആപ്പ് ഗ്രൂപ്പിൽ പ്രചരിപ്പിക്കുകയും ചെയ്ത സംഭവത്തിൽ ബിജെപി പ്രവർത്തകൻ അറസ്റ്റിൽ. ഉപ്പള, മണിമുണ്ട സ്വദേശി ഇ.എസ്. അമിത് (34) ആണ് മഞ്ചേശ്വരം പോലീസിന്റെ പിടിയിലായത്.

തിരഞ്ഞെടുപ്പ് കമ്മീഷന്റെ രഹസ്യരേഖകൾ ചോർത്തുകയും വനിതാ ഉദ്യോഗസ്ഥയെ ഭീഷണിപ്പെടുത്തുകയും ചെയ്ത സംഭവം അതീവ ഗൗരവത്തോടെയാണ് അധികൃതർ കാണുന്നത്.

സംഭവത്തിനു ആസ്പദമായത് വെള്ളിയാഴ്ച ഉച്ചകഴിഞ്ഞ് 2:30-ഓടെ ഉപ്പള ബസ് സ്റ്റാൻഡിന് സമീപത്താണ്. ബേക്കർ, കണ്ണാടിപ്പാറ, മാതൃനിലയത്തിൽ സ്വദേശിനി എ. സുഭാഷിണി (41) എന്ന വനിതാ ബിഎൽഒ (ബൂത്ത് ലെവൽ ഓഫീസർ) ആണ് പരാതിക്കാരി. അവർ ‘എസ്ഐആർ ഡാറ്റാ കളക്ഷൻ’പൂർത്തിയാക്കി മടങ്ങുന്നതിനിടെയാണ് അമിത് തടഞ്ഞുനിർത്തിയത്.

പോലീസ് രജിസ്റ്റർ ചെയ്ത കേസ് പ്രകാരം, അമിത് ബിഎൽഒയെ തടഞ്ഞു നിർത്തി ഭീഷണിപ്പെടുത്തുകയും, കൈവശമുണ്ടായിരുന്ന ഔദ്യോഗിക ഫോൺ നിർബന്ധിച്ച് വാങ്ങി എസ്ഐആർ ഡീറ്റെയിൽസിന്റെ ആപ്ലിക്കേഷൻ തുറന്നു കാണിക്കുകയുമായിരുന്നു.

തുടർന്ന്, ആപ്ലിക്കേഷനിലെ ഔദ്യോഗിക വിവരങ്ങൾ പ്രതി തന്റെ ഫോണിലേക്ക് പകർത്തിയ ശേഷം, അത് വാട്‌സ്ആപ്പ് ഗ്രൂപ്പുകളിൽ ഇട്ട് പ്രചരിപ്പിക്കുകയും ചെയ്തു. ഇത് ബിഎൽഒയുടെ കൃത്യനിർവഹണം തടസ്സപ്പെടുത്തുന്നതിന് തുല്യമാണെന്ന് കേസിൽ പറയുന്നു.

സംഭവത്തിന്റെ ഗൗരവം കണക്കിലെടുത്ത് ജില്ലാ കളക്ടറുടെയും ജില്ലാ പോലീസ് മേധാവിയുടെയും നിർദ്ദേശപ്രകാരമാണ് മഞ്ചേശ്വരം പോലീസ് കേസെടുത്തത്. വോട്ടർ പട്ടികയുമായി ബന്ധപ്പെട്ട രഹസ്യ വിവരങ്ങൾ ചോർത്തിയതിനെതിരെ കർശന നിയമ നടപടികൾ ഉണ്ടാകുമെന്നാണ് സൂചന.

ENGLISH SAMMARY:

bjp worker arrested for obstructing blo duty and leaking voter data in uppala

in kasaragod, a bjp worker named e.s. amit (34), a resident of uppala, manimunda, has been arrested by the manjeshwaram police for obstructing the official duties of a female booth level officer (blo) and illegally obtaining and circulating confidential voter data. the incident took place on friday afternoon around 2:30 pm near the uppala bus stand. the complainant, the woman blo a. subhashini (41), was intercepted by amit while she was returning after completing the ‘sir data collection’ (special initiative revision). according to the police case, amit threatened subhashini, forcibly took her official phone, compelled her to open the sir details application, copied the confidential data onto his own phone, and subsequently shared it in whatsapp groups, severely obstructing her official duty. the authorities are treating the unauthorized leaking of the election commission’s sensitive documents and the threat against a woman official with extreme gravity. the manjeshwaram police registered the case following the directives of the district collector and the district police chief, and have indicated that strict legal action will be pursued against the accused for the data breach and obstruction of duty.