By കൊച്ചി: ചക്രങ്ങൾ തകരാറിലായ വിമാനം 160 ജീവനുകളുമായി മരണത്തിന് തൊട്ടരികിലൂടെ പറന്നപ്പോൾ, ഒരു നാട് മുഴുവൻ ശ്വാസമടക്കിപ്പിടിച്ചു നിന്നു. ഒടുവിൽ, പൈലറ്റുമാരുടെ അസാമാന്യ ധീരതയ്ക്കും തീരുമാനങ്ങൾക്കും മുന്നിൽ അപകടം ഒഴിവായി . ജിദ്ദയിൽ നിന്ന് കരിപ്പൂരിലേക്ക് പറന്ന എയർ ഇന്ത്യ എക്സ്പ്രസ് വിമാനം നെടുമ്പാശ്ശേരിയിൽ സുരക്ഷിതമായി നിലംതൊട്ടപ്പോൾ സഫലമായത് നൂറുകണക്കിന് കുടുംബങ്ങളുടെ പ്രാർത്ഥനയാണ്.
ജിദ്ദയിൽ നിന്ന് പുറപ്പെട്ട വിമാനം കരിപ്പൂരിൽ ഇറങ്ങാൻ മിനിറ്റുകൾ മാത്രം ബാക്കിയുള്ളപ്പോഴാണ് ലാൻഡിംഗ് ഗിയറിലെ ഗുരുതരമായ തകരാർ പൈലറ്റുമാരുടെ ശ്രദ്ധയിൽപ്പെടുന്നത്. വിമാനത്തിന്റെ ചക്രങ്ങൾ വിന്യസിക്കുന്നതിലെ അസ്വാഭാവികത അപകടകരമായ സൂചനയാണെന്ന് തിരിച്ചറിഞ്ഞതോടെ കരിപ്പൂരിൽ ലാൻഡ് ചെയ്യാനുള്ള തീരുമാനം ഉപേക്ഷിച്ചു. ടേബിൾ ടോപ്പ് റൺവേയായ കരിപ്പൂരിൽ തകരാറുള്ള ചക്രങ്ങളുമായി ഇറങ്ങുന്നത് വൻ ദുരന്തത്തിന് കാരണമായേക്കാമെന്ന ദീർഘവീക്ഷണമാണ് വിമാനത്തെ നെടുമ്പാശ്ശേരിയിലേക്ക് തിരിച്ചുവിടാൻ പ്രേരിപ്പിച്ചത്.
നെടുമ്പാശ്ശേരി വിമാനത്താവളത്തിൽ ‘ഫുൾ എമർജൻസി’ പ്രഖ്യാപിച്ചതോടെ അന്തരീക്ഷം വല്ലാതെ മുറുകി. റൺവേയ്ക്ക് ഇരുവശവും അഗ്നിശമന സേനയുടെ വാഹനങ്ങളും ആംബുലൻസുകളും നിലയുറപ്പിച്ചു. ആകാശത്ത് വട്ടമിട്ട് പറന്ന് വിമാനത്തിലെ ഇന്ധനം പരമാവധി കുറച്ച ശേഷമാണ് പൈലറ്റുമാർ വിമാനം റൺവേയിലേക്ക് താഴ്ത്തിയത്. വിമാനം നിലംതൊട്ട നിമിഷം യാത്രക്കാർക്കിടയിൽ പരിഭ്രാന്തി പടർത്തിയെങ്കിലും പൈലറ്റുമാർ വിമാനം നിയന്ത്രണവിധേയമാക്കി സുരക്ഷിതമായി നിർത്തി. ലാൻഡിംഗിന് ശേഷം നടന്ന പരിശോധനയിലാണ് വിമാനത്തിന്റെ ടയറുകൾ പൊട്ടിയ നിലയിൽ കണ്ടെത്തിയത്. ടയറുകൾ തകർന്നിട്ടും വിമാനം റൺവേയിൽ നിന്ന് തെന്നിമാറാതെ കാത്ത പൈലറ്റുമാരുടെ വൈദഗ്ധ്യം വിസ്മയത്തോടെയാണ് വ്യോമയാന വിദഗ്ധർ കാണുന്നത്.
തങ്ങൾ ഒരു മഹാദുരന്തത്തിന്റെ വക്കിൽ നിന്നാണ് ജീവിതത്തിലേക്ക് തിരിച്ചുവന്നതെന്ന തിരിച്ചറിവ് യാത്രക്കാരെ കണ്ണീരിലാഴ്ത്തി. സിയാൽ (CIAL) അധികൃതരും എയർ ട്രാഫിക് കൺട്രോളും കാണിച്ച പക്വമായ ഏകോപനം ഈ രക്ഷാദൗത്യത്തിന് വലിയ കരുത്തായി. സംഭവത്തിൽ സിവിൽ ഏവിയേഷൻ വിഭാഗം വിശദമായ അന്വേഷണം പ്രഖ്യാപിച്ചിട്ടുണ്ട്. വിമാനത്തിന്റെ സാങ്കേതിക അറ്റകുറ്റപ്പണികളിൽ ഉണ്ടായ പാളിച്ചയാണോ ഇതിന് പിന്നിലെന്ന് പരിശോധിച്ചുവരികയാണ്.
English Summary:
An Air India Express aircraft flying from Jeddah to Karipur narrowly averted a major disaster after a serious technical fault was detected in its landing gear moments before landing. With 160 passengers on board, the pilots identified abnormal deployment of the wheels, signalling a potentially catastrophic risk. Considering Karipur’s tabletop runway and the danger of landing with damaged wheels, the crew took the critical decision to divert the aircraft to Kochi’s Nedumbassery International Airport.
A full emergency was declared at Kochi airport as fire and rescue teams, along with ambulances, were placed on high alert along the runway. The aircraft circled in the air to burn excess fuel before attempting landing. Despite moments of intense anxiety among passengers, the pilots managed to bring the aircraft down safely and bring it to a controlled stop on the runway. Subsequent inspections confirmed that the aircraft’s tyres had burst.
Aviation experts have praised the pilots’ skill and calm judgement, noting that landing a wide-body aircraft with damaged tyres without veering off the runway reflects exceptional expertise. Passengers, many visibly emotional, later realised how close they had come to a potential tragedy. Coordinated efforts by the pilots, Air Traffic Control, and Cochin International Airport Limited (CIAL) were instrumental in ensuring a safe outcome. India’s civil aviation authorities have launched a detailed investigation to determine whether maintenance lapses or technical failures led to the incident.
