ആലപ്പുഴ: കുട്ടനാടൻ പാടശേഖരങ്ങളിലും കോട്ടയത്തിന്റെ വിവിധ ഭാഗങ്ങളിലും പക്ഷിപ്പനി വീണ്ടും സ്ഥിരീകരിച്ചു. ഭോപ്പാലിലെ ലാബിൽ നടത്തിയ പരിശോധനയിൽ വൈറസ് സാന്നിധ്യം കണ്ടെത്തിയതോടെ ആലപ്പുഴയിലെ എട്ട് പഞ്ചായത്തുകളിലും കോട്ടയത്തെ മൂന്ന് വാർഡുകളിലും അതീവ ജാഗ്രതാ നിർദ്ദേശം നൽകി. രോഗം സ്ഥിരീകരിച്ച സ്ഥലങ്ങളുടെ ഒരു കിലോമീറ്റർ ചുറ്റളവിലുള്ള കോഴി, താറാവ്, കാട തുടങ്ങിയ വളർത്തുപക്ഷികളെ അടിയന്തരമായി കൊന്നൊടുക്കാൻ (Culling) മൃഗസംരക്ഷണ വകുപ്പ് ഉത്തരവിട്ടു.

ആലപ്പുഴ ജില്ലയിലെ നെടുമുടി, ചെറുതന, കരുവാറ്റ, കാർത്തികപ്പള്ളി, അമ്പലപ്പുഴ തെക്ക്, പുന്നപ്ര തെക്ക്, തകഴി, പുറക്കാട് പഞ്ചായത്തുകളിലാണ് രോഗം പടരുന്നത്. ഇവിടെ താറാവുകൾ കൂട്ടത്തോടെ ചത്തൊടുങ്ങിയത് കർഷകരെ കണ്ണീരിലാഴ്ത്തിയിരിക്കുകയാണ്. കോട്ടയത്ത് കുറുപ്പന്തറ, മാഞ്ഞൂർ, വേളൂർ എന്നിവിടങ്ങളിലെ കോഴികളിലും കാടകളിലുമാണ് വൈറസ് ബാധ കണ്ടെത്തിയത്. രോഗവ്യാപനം തടയാൻ ദ്രുതകർമ്മ സേന ഉടൻ രംഗത്തിറങ്ങും.

പക്ഷിപ്പനി ബാധിച്ച പ്രദേശങ്ങളെ നിലവിൽ കണ്ടെയ്ൻമെന്റ് സോണുകളായി പ്രഖ്യാപിച്ചു. ഇവിടെനിന്നും പക്ഷികൾ, മുട്ട, മാംസം എന്നിവ വിൽക്കുന്നതിനും കടത്തുന്നതിനും കർശന നിരോധനമുണ്ട്. പക്ഷിപ്പനി മനുഷ്യരിലേക്ക് പകരാൻ നേരിയ സാധ്യതയുള്ളതിനാൽ ചത്ത പക്ഷികളെ കൈകാര്യം ചെയ്യുന്നവർ മാസ്കും ഗ്ലൗസും നിർബന്ധമായും ധരിക്കണമെന്ന് ആരോഗ്യവകുപ്പ് മുന്നറിയിപ്പ് നൽകി.

കർഷകർക്ക് അർഹമായ നഷ്ടപരിഹാരം നൽകുമെന്ന് സർക്കാർ അറിയിച്ചിട്ടുണ്ടെങ്കിലും ആവർത്തിച്ചുണ്ടാകുന്ന പക്ഷിപ്പനി വലിയ സാമ്പത്തിക പ്രതിസന്ധിയാണ് സൃഷ്ടിക്കുന്നത്. പക്ഷികളിൽ അസ്വാഭാവിക മരണം ശ്രദ്ധയിൽപ്പെട്ടാൽ ഒളിച്ചുവെക്കാതെ ഉടൻ തന്നെ അധികൃതരെ വിവരം അറിയിക്കണമെന്ന് ജില്ലാ കളക്ടർമാർ നിർദ്ദേശിച്ചു.

English Summary:
Avian influenza has re-emerged in Kerala, with confirmed cases reported from the Kuttanad region of Alappuzha and several areas in Kottayam district. Laboratory tests conducted in Bhopal detected the presence of the virus, prompting authorities to issue high-alert warnings in eight panchayats of Alappuzha and three wards of Kottayam. The Animal Husbandry Department has ordered the immediate culling of chickens, ducks, and quails within a one-kilometre radius of the affected locations. Large-scale duck deaths have been reported in parts of Alappuzha, causing severe distress among farmers. Containment zones have been declared, banning the movement and sale of birds, eggs, and poultry products. Rapid response teams are being deployed to prevent further spread, while the government has assured compensation to affected farmers amid concerns over recurring economic losses.